Itháan má marigá Pascua tsiguʼ 32, apóstoles nitangi̱ín náa nigún gutaraʼa. Néʼngu̱u̱n, ikha jngó Jesús niʼthún rí magún gajmiún náa barca mu magún náa Betsaida, mu mbu̱ya̱a̱ xúnʼ. Mú índo̱ kuwa raguáʼnu náa rawunʼ iyaʼ, Jesús ndiʼyoo rí mbaʼin xa̱bu̱ nigún ruxkáá asndu ikhí. Ikhaa nindoo maxtáa i̱ndó gajmíi̱n apóstoles, mú nigruiguíin xa̱bu̱ ga̱jma̱a̱ májánʼ. Niʼni thanún xa̱bu̱ bi̱ naʼniún nandii ga̱jma̱a̱ mbaʼa rí niʼsngúún. Niʼthún ga̱jma̱a̱ numuu Reino xúgíʼ mbiʼi. Índo̱ niʼni wakhííʼ, apóstoles nithi: “Mbáa xa̱bu̱ naxkidxu̱u̱n. Arathún rí magúun mu magún gúyááʼ rí mu̱phu̱”.

Mú Jesús niriʼña̱a̱: “Tséyóoʼ má magúun. Guxnu̱u̱n ikháanʼ rí mu̱phu̱”. Apóstoles niraxi̱i̱: “Nandaʼ rí mu̱ʼguáxu gutsi pan mu mu̱phu̱ xáʼ.” Felipe, mbáa apóstol, niʼthí: “Maski ajndu muguaʼdáá wéñuʼ mbújkha̱a̱, xándoo gúʼtsi pan mu mu̱phu̱ mbaʼin wéñuʼ xa̱bu̱”.

Jesús niraxu̱u̱n: “Nguáthá mba̱a̱ ganitsu kuaʼdáálu rá.” Andrés niriʼñuu: “Kuaʼdáá mbá witsu pan ga̱jma̱a̱ a̱jmi̱i̱n e̱gi̱ʼ. Mú xáʼngo̱o̱ mu̱phu̱ xúgínʼ xa̱bu̱”. Jesús niʼthí: “Aguwáʼ kudala pan ga̱jma̱a̱ e̱gi̱ʼ”. Nda̱wa̱á nindu̱ʼu̱u̱n xa̱bu̱ rí mutrigi̱i̱n náa raxa rí 50 mámbá grupo ga̱jma̱a̱ rí 100. Ikhú ndiyá pan ga̱jma̱a̱ e̱gi̱, niyexi mekhuíí ga̱jma̱a̱ niʼtájkáan. Nda̱wa̱á nixnúún ganitsu apóstoles mu muxnún xúgínʼ xa̱bu̱. Bi̱ mbá 5,000 xa̱bu̱ bi̱ kuwa ikhí, ga̱jma̱a̱ gu̱ʼu̱ mangiin e̱ji̱n, niphiʼtsu asndu nigiʼmún. Nda̱wa̱á apóstoles niraxi̱i̱ rí niguanúu mu xagadíí nditháan. ¡Nini  majtíí mbá 12 extu̱ʼ! Lá ragájkhun dí rígi̱ ninindxu̱u̱ mbá milagro mitsaan wéñuʼ ráʼ.

Xúgínʼ niguanún tsiánguá rí asndu nindúún rí Jesús mani̱ndxu̱u̱ rey ndrígu̱ún. Mú Jeobá táʼndoo mani̱ndxu̱u̱ rey numuu rí xóó raʼkháa ikhaa mbiʼi, ga̱jma̱a̱ Jesús má ndaʼyoo rúʼko̱. Ikha jngó niʼtángawún xa̱bu̱ ga̱jma̱a̱ niʼthún apóstoles rí magún imbo̱o̱ ridoo lamáa ndrígóo Galilea. Ikhiin nigún náa barca, ga̱jma̱a̱ Jesús nitsimuu mbáwíi náa mbá kúbá. Náa numuu rá. Numuu rí nindoo magiʼdoo mbiʼi mu maʼtá kháñuu Anu̱u̱. Jesús ndiyáaʼ má xúʼko̱ mbiʼi mu maʼtájkáan maski ajndu gíʼdoo wéñuʼ ñajunʼ.