Nda̱wa̱á rí Jesús nikháñuu, mbáa xa̱bu̱ bi̱ nigiʼdoo wéñuʼ bi̱ nigumbiʼyuu José nindo̱ʼo̱o̱ Pilato rí maniñuʼ maríguíi Jesús náa ixi̱. José nimbráʼaa Jesús mbá xtíin lino rí májánʼ, ga̱jma̱a̱ rí ndataun, ga̱jma̱a̱ ni̱jkha̱ kayáa náa mbá iñáʼ nuxi̱ʼ náa majnguáan. Nda̱wa̱á niʼtáñajunʼ rí murngaxi̱i̱ mbá itsí mu murugua̱a̱ iñáʼ. Ndxajkun nitháán Pilato: “Naxmiéjunʼxu rí xa̱bi̱i̱ Jesús muni kuʼwáʼ xuyuʼ ga̱jma̱a̱ muthi rí nigabi̱i̱”. Ikha jngó Pilato niʼthún: “Guruguáa májánʼ iñáʼ ga̱jma̱a̱ guʼgínʼ bi̱ muñewa̱a̱n”.

Ajtsú mbiʼi nda̱wa̱á, tikhun gu̱ʼu̱ nigún miʼcha̱ náa iñáʼ wa̱jinʼ. Ndiyáá rí mbá nirngáxi̱i̱ itsí ga̱jma̱a̱ kambaʼta iñáʼ. Náa awúu̱n iñáʼ gídaaʼ mbáa ángel, bi̱ niʼthún: “Xámiñala. Jesús nituxi̱i̱. Guthu̱u̱n discípulos rí magún Galilea mu ikhí guyamijná”.

María Magdalena ni̱jkha̱ nacha̱ gáyáaʼ Pedro ga̱jma̱a̱ Juan. Niʼthún: “Xtáa tsáa ni̱jkha̱ kayóo xuyuʼ Jesús”. Pedro ga̱jma̱a̱ Juan nigún ragañun náa iñáʼ wa̱jinʼ. Índo̱ ndiyáá rí ní nda̱wa̱a̱, nitangi̱i̱n náa guʼwún.

Nda̱wa̱á, María nitanga̱a̱ náa iñáʼ wa̱jinʼ. Awúu̱n iñáʼ ndiʼñún a̱jmi̱i̱n ángeles ga̱jma̱a̱ niʼthún: “Tséya̱a̱xu náa nigún ku̱ya̱a̱ Señor ndrígúxu̱”. Ikhú ndiʼyoo mbáa xa̱bu̱ ga̱jma̱a̱ nindxa̱ʼwáminaʼ rí nindxu̱u̱ bi̱ nañewu̱u̱n ixi̱ ri̱ʼi̱. Niraxu̱u̱: “Señor, mbá péñu, arathúnʼ náa nitaniʼ”. Índo̱ xa̱bu̱ niriʼñuu: “¡María!”, ikhú ikhaa ndiʼyoo rí nindxu̱u̱ Jesús. María niʼthí: “¡Maestro!”, ga̱jma̱a̱ ikhaa ndiyáraʼaa. Jesús niʼthúu̱n: “Arathún a̱ngui̱nʼ rí nitayoʼ”. Núkhu má María ni̱jkha̱a̱ ragáyúu ga̱jma̱a̱ niʼthún discípulos rí ndiʼyoo Jesús.

Itháan wakhííʼ, rí mbiʼi má rúʼko̱, a̱jmi̱i̱n discípulos nigájnun náa Jerusalén mu magún náa Emaús. Mbáa xa̱bu̱ ni̱jkha̱ gajmíi̱n ga̱jma̱a̱ niraxu̱u̱n ndiéjunʼ egún ruthi. Ikhiin nitháán: “Lá tatadxun ráʼ. Niʼni má ajtsú mbiʼi, ndxajkun nixuʼma rí muxiyáa Jesús. Rí xúgi̱ tikhun gu̱ʼu̱ kuwa ruthi rí ikhaa xtáa”. Xa̱bu̱ niraxu̱u̱n: “Lá tsenimbala ku̱ñu̱u̱n  gaʼyee ráʼ. Ikhiin nitháán rí Cristo ndayóoʼ makhañúu ga̱jma̱a̱ nda̱wa̱á matuxi̱i̱”. Nda̱wa̱á niʼthún má xúʼko̱ rí naʼthí náa Escrituras. Índo̱ niguánu náa Emaús, discípulos ninda̱ʼa̱a̱ rí maguanúu gajmíi̱n. Índo̱ kuwa ruphiʼtsu, ikhaa niʼtájkáan ga̱jma̱a̱ numuu pan ga̱jma̱a̱ discípulos niguánu ndiyáá rí ikhaa nindxu̱u̱ Jesús. Ikhú nindáti̱ga̱a̱.

Discípulos nigúun ragañun náa Jerusalén. Niguánu náa guʼwá náa nigimbíin apóstoles ga̱jma̱a̱ nithúún rí nirígá. Índo̱ kuwa awúu̱n guʼwá, ikhú Jesús nikujmaa. Nákha ginii, apóstoles tsíñún munimbu̱ún rí ikhaa nindxu̱u̱ Jesús. Mú ikhaa niʼthún: “Gu̱ya̱a̱ ñawúunʼ ga̱jma̱a̱ guxkajmúún. Kiʼniraʼmáʼ rí Cristo matuxi̱i̱ náa majñúnʼ wa̱jinʼ”.