Índo̱ Jesús xóó xtáa gajmíi̱n apóstoles náa cuarto náa iwáá nikuiʼtsu wañuu gajmíi̱n, niʼthún: “Xúgiáanʼ ikháanʼla muniʼñúʼ mbruʼun rígi̱”. Pedro niʼthúu̱n: “Ikhúúnʼ na̱nguá. Maski ajndu eʼwíínʼ guniñanʼ, ikhúúnʼ xániʼñánʼ nditháan”. Mú Jesús niriʼñuu Pedro: “Nákha xóó tsindxaʼwá mbaxtá, ikháánʼ maratha ajtsú nuthu rí tsetatsiniúnʼ”.

Índo̱ soldados nigún ku̱ya̱a̱ Jesús náa goʼwóo Caifás, mbaʼin má apóstoles nigáñun. Mú a̱jmi̱i̱n rí ikhiin nigún gajmiún xa̱bu̱. Mbáa ninindxu̱u̱ Pedro. Ikhaa nito̱ʼo̱o̱ náa rexo̱o̱ goʼwóo Caifás ga̱jma̱a̱ nikuʼmaminaʼ náa rígá aguʼ mu mataguuʼ. Ga̱jma̱a̱ mbáa a̱ʼgu̱ bi̱ nañajunʼ mbáá ndiʼyoo inuu Pedro náa nambiʼi aguʼ ga̱jma̱a̱ niʼthúu̱n: “¡Ikhúúnʼ naniʼnííʼ! ¡Ikháánʼ nijngruigaʼ ga̱jma̱a̱ Jesús!”.

Pedro niriʼña̱a̱: “Na̱nguá. Ragájkhun nindxu̱u̱. Tséyóo dí xtaa rarathá”, ga̱jma̱a̱ ni̱jkha̱ gawi̱ji̱ náa riejun. Ikhú imba̱a̱ a̱ʼgu̱ bi̱ mañajunʼ mbáá ndiʼyoo náa xkrugua ga̱jma̱a̱ niʼthún eʼwíínʼ: “¡Xa̱bu̱ bugi̱ nijngruigo̱o̱ ga̱jma̱a̱ Jesús!”. Pedro niriʼña: “¡Asndu nditháan tséyóo tsáa nindxu̱u̱ Jesús!”. Ma̱ngaa mbáa xa̱bu̱ niʼthí: “Ikháánʼ ni̱ndxa̱ʼ mbáa rí ikhiin. Xúʼko̱ ku̱jmáán, naratá xóo ethi galileos, xó má Jesús”. Mú Pedro niʼthí: “¡Tséninúwiinʼ!”.

Ikhú, mbáa mbaxtá nindxa̱ʼwá. Pedro ndiʼyoo rí Jesús xtáa raʼyoo ga̱jma̱a̱ nirmáʼáan a̱jkiu̱u̱n ajngáa rí niʼthí Jesús. Ikha jngó nigájnuu ga̱jma̱a̱ nimbiyaʼ wéñuʼ.

Ikhú, Sanedrín nigimbíin náa goʼwóo Caifás mu muthi rí gúni̱i̱ Jesús. Sanedrín ninindxu̱u̱ náa nunimbaníí xkujndu xa̱bu̱ ede̱ bi̱ kuwa náa mbaʼa guʼwá ndxajkun. Nimbánun má rí muxiyáa ga̱jma̱a̱ ndiyááʼ mbá numuu mu muxiyáa. Mú túxkamaa nimbá rí muni tsu̱di̱i̱. Nda̱wa̱á, Caifás niraxu̱u̱ Jesús: “Lá ikháánʼ ni̱ndxa̱ʼ A̱ʼdióo Dios ráʼ.” Jesús niriʼña: “Xúʼko̱, ikhúúnʼ ni̱ndxu̱ʼ”. Ikhú Caifás niʼthí: “Tséyóóʼ má mbuʼyááʼ itháan. ¡Rígi̱ nindxu̱u̱ mbá nduwaʼ!”. Xa̱bu̱ Ñajunʼ nithi rí xúʼko̱ nindxu̱u̱  ga̱jma̱a̱ nithi: “Xa̱bu̱ bugi̱ gíʼmaa rí makhañúu”. Nixubáá inuu ga̱jma̱a̱ nindujtáʼ, niruguáá iduu, nixnáá ga̱jma̱a̱ nitháán: “¡Á mu ni̱ndxa̱ʼ gaʼyee ndrígóo Dios, aratúxuʼ tsáa nixnáʼ!”.

Índo̱ nijtsi, nigún ku̱ya̱a̱ Jesús náa Sanedrin ga̱jma̱a̱ ikhí niraxi̱i̱ mbu̱júu̱: “Lá ikháánʼ ni̱ndxa̱ʼ A̱ʼdióo Dios ráʼ.” Jesús niriʼñún: “Xúʼko̱. Ikháanʼla má nuta rí ikhúúnʼ ni̱ndxu̱ʼ”. Ikhú ninitsudi̱i̱ rí niʼthá wéñuʼ Dios, ga̱jma̱a̱ nigún ku̱ya̱a̱ náa palacio ndrígóo Xa̱bu̱ Ñajunʼ romano Poncio Pilato. Ndiéjunʼ nirígá nda̱wa̱á rá. Guʼyáá.