Abrahán ga̱jma̱a̱ Sara mba̱yu̱ʼ tsiguʼ má dí nidamijná. Niniñaaʼ guʼwún rí májánʼ dí rígá náa Ur mu makuwá náa guʼwá xtíin. Mú Sara na̱nguá má nixiéʼkhá, numuu rí naku̱mu̱u̱ kaʼyoo Jeobá.

Sara nindoo wéñuʼ magiʼdaa mbáa ada̱, ikha jngó niʼthúu̱n Abrahán: “Á mu naraʼdaa mbáa ada̱ ga̱jma̱ʼ Agar bi̱ nambáyuʼ, ada̱ maʼni asndu xó má a̱ʼdióʼ”. Ninújngoo mbiʼi, Agar nigiʼdaa mbáa ada̱ ga̱jma̱a̱ nixna mbiʼí Ismael.

Mba̱yu̱ʼ tsiguʼ nda̱wa̱á, índo̱ Abrahán nigiʼdoo 99 tsiguuʼ ga̱jma̱a̱ Sara, nigiʼdoo 89, ajtsíin xa̱bu̱ niguwáʼ gúñún. Abrahán niʼthúún rí mbu̱ya̱a̱ xu̱únʼ náa xkamixoo mbá ixi̱ ga̱jma̱a̱ rí maguanún muphiʼtsu. Lá natayáá tsíin ñajúnʼ xa̱bu̱ bugi̱ ráʼ Ñajúúnʼ ángeles. Ikhiin nitháán Abrahán: “Tsiguʼ rí na̱ʼkha̱, ikháánʼ ga̱jma̱a̱ a̱ʼgia̱ʼ maguaʼdaa mbáa ada̱”. Sara xtáa raʼdxuun náa awúu̱n guʼwá xtíin, índo̱ niʼdxuun rúʼko̱ ninduʼwá náa awúu̱n a̱jkiu̱u̱n ga̱jma̱a̱ nindxa̱ʼwáminaʼ: “Lá gajkhun rí magúʼdaa mbáa ada̱ xúgi̱, rí nikiu̱u̱n má ráʼ.”

Tsiguʼ rí ni̱ʼkha̱, Sara nigiʼdaa mbáa ada̱, xó má niʼthí ángel ndrígio̱o̱ Jeobá. Abrahán nixná mbiʼyuu Isaac, dí nandoo gáʼthúu̱n “xnduʼwá”.

 Índo̱ Isaac nigiʼdoo witsu tsiguʼ, Sara ndiʼyoo rí Ismael natsíjmaa. Ikhaa nindoo mañawu̱u̱n a̱ʼdióo, ikha jngó ni̱jkha̱ gáʼthúu̱n Abrahán: “Aratháán maʼga̱a̱ Agar ga̱jma̱a̱ Ismael”. Nákhi ginii, Abrahán tsíyoo gaʼni rúʼko̱. Mu Jeobá ma̱ngaa nindoo mañawu̱u̱n Isaac, ikha jngó niʼthúunʼ Abrahán: “Atadxun dí naʼthí Sara. Ikhúúnʼ má gañewu̱u̱n Ismael. Mú, rí nikuʼdáminaʼ mani ga̱jma̱á ni̱ndxa̱ʼ mambanúu náa Isaac”.