Isaac gíʼdoo 40 tsiguuʼ índo̱ ndiyáa Rebeca. Ikhaa nindoo kaʼyoo wéñuʼ. Nda̱wa̱á niguáʼdiin a̱jmi̱i̱n e̱ji̱n gemelos.

Bi̱ giʼnii nigumbiʼyuu Esaú, bi̱ gi̱ʼta̱ nigumbiʼyuu Jacob. Esaú niniguuʼ wéñuʼ maxtáa xaná ga̱jma̱a̱ najmañuu nagudíin xujkhúʼ. Mú Jacob itháan naniguuʼ maxtáa guʼwáá.

Nákha ikhú, ada̱ bi̱ giʼnii nakhánaa itháan mbaaʼ ga̱jma̱a̱ mbújkha̱a̱ ki xóo eʼwíínʼ a̱ngui̱i̱n índo̱ nakháñuu anu̱ún. Rúʼko̱ nagumbiʼyuu herencia. Náa a̱ngui̱i̱n Isaac, herencia ma̱ngaa ninindxu̱u̱ rí mambanúu náa ikhiin rí nikudaminaʼ Jeobá maxnúu Abrahán. Esaú na̱nguá exmiéjuunʼ kaʼyoo dí Jeobá nikudaminaʼ maʼni. Mú Jacob ndiʼyoo dí gíʼdoo wéñuʼ numuu.

Mbá miʼtsú, nagaʼ wéñuʼ Esaú ni̱ʼkha̱núu̱ náa goʼwóo nda̱wa̱á dí kañiʼ mbiʼi ni̱jkha̱ gáñíinʼ xujkhúʼ maxnún. Ikhú, niyeyuu ga̱jma̱a̱ ninigu̱u̱ʼ xóo ndataun ganitsu dí xtáa raʼnimújúunʼ Jacob, ga̱jma̱a̱ niʼthí: “¡Naxkidxuʼ wéñuʼ! ¡Araxnúʼ chíʼgíʼ ganitsu dí maña̱ʼ rúʼko̱!”. Jacob niʼthúu̱n: “Májánʼ, mú ginii arathúnʼ dí ma̱ndoo maguanúʼ ga̱jma̱a̱ herencia ndrígá”. Esaú niriʼñuu: “¡Na̱nguá exmiéjunʼ eʼni herencia rúʼko̱! Aguanáʼ ga̱jma̱a̱. Ikhúúnʼ i̱ndó nandoʼ makuíʼtsu”. Lá naku̱ma̱ʼ ikháánʼ dí nindxa̱ʼóo edxu̱u̱ Esaú  índo̱ niʼni rúʼko̱ ráʼ. Na̱nguá. Taʼyamajkuu mbá dí gíʼdoo wéñuʼ numuu mu makhánúu mbá xúbá ganitsu.

Índo̱ Isaac niʼni xiʼñáanʼ, ni̱jkha̱nú mbiʼi dí maʼni tsajkurámaaʼ a̱ʼdióo bi̱ giʼnii. Mú Rebeca nimbáyúu Jacob, ada̱ bi̱ gi̱ʼta̱, mu anu̱u̱ maʼni tsajkurámaaʼ ikhaa. Esaú ni̱jkha̱nú niʼdxuun, nikiʼnáa wéñuʼ ga̱jma̱a̱ niríyaʼ awan mu maxíyáa giʼtio̱o̱ bi̱ mbóó mbiʼi nigumaa ga̱jma̱a̱. Isaac ga̱jma̱a̱ Rebeca nindúún muñewa̱a̱n Jacob, ikha jngó nitháán: “Ayuʼ gáraxtaa ga̱jma̱ʼ amaaʼ Labán, ndxájuu rudáaʼ, asndu índo̱ Esaú gáʼni̱i̱ a̱jkiu̱u̱n”. Jacob niʼnimbo̱o̱ kaʼyoo anu̱u̱ ga̱jma̱a̱ ru̱dúu̱, ikha jngó nigájnuu ni̱jkha̱ mu xáxíyáa ndxájuu.