Jeobá nikudaminaʼ dí mañawu̱u̱n Jacob, xó má niñewu̱u̱n ga̱jma̱a̱ Abrahán ma̱ngaa Isaac. Jacob nixtáa náa mbá xuajen dí mbiʼyuu Harán. Ikhí ninigúnʼ, ga̱jma̱a̱ nigiʼdiin mbaʼin e̱ji̱n ga̱jma̱a̱ nigiʼdoo wéñuʼ.

Índo̱ ninújngoo mbiʼi, Jeobá niʼthúu̱n Jacob: “Atanga̱án náa ku̱ba̱ʼ ndrígóo ana̱ʼ”. Ikha jngó Jacob ga̱jma̱a̱ bi̱ kuwa náa goʼwóo nigájnun nigún. Náa kamba̱a̱, bi̱ numbayíí niguwáʼ gútháán: “Ndxájuaʼ Esaú na̱ʼkha̱ náa ikháánʼ gajmíi̱n 400 xa̱bu̱”. Jacob nimíñuu índo̱ nindxa̱ʼwáminaʼ á mu Esaú maʼni gawúunʼ ikhaa gajmíi̱n bi̱ kuwa náa goʼwóo. Ikha jngó niʼthúu̱n Jeobá: “Mbá péñu atani kríñunʼ náa ñawúunʼ ndxájuʼ”. Imbo̱ʼ mbiʼi, Jacob nikuʼma mbá regalo inuu Esaú: Mbaʼin mugu̱, tsu̱jtuunʼ, xede̱, camellos ga̱jma̱a̱ xtángidiʼ.

Mbruʼun rúʼko̱, índo̱ Jacob niguanúu mbáwíi, ndiʼyoo mbáa ángel. Ikhú ángel niʼniminaʼ ga̱jma̱a̱ Jacob asndu índo̱ nijtsi. Maski asndu Jacob nigawúunʼ, tániñaminaʼ. Ikhú ángel niʼthúu̱n: “Atatsíñuʼ maʼgáaʼ”. Mú Jacob niriʼñuu: “Na̱nguá, na̱nguá asndu índo̱ gátani tsajkurámuʼ”.

Nda̱wa̱á ángel niʼni tsajkurámaaʼ Jacob. Ikhú ndiʼyoo Jacob dí Jeobá xániñuʼ dí Esaú maʼni gawúunʼ.

Miʼcha̱ rúʼko̱, Jacob ndiʼyoo rí mitsínguánʼ e̱ʼkha̱ Esaú ga̱jma̱a̱ 400 xa̱bu̱. Nigájnuu ginii ki xóo bi̱ kuwa náa  goʼwóo mu maraʼnuu Esaú, índo̱ ni̱jkha̱nú mijngii nismbátigo̱o̱ náa inuu mbá juwan aʼphu̱. Esaú nigáyúu náa Jacob ga̱jma̱a̱ ndiyáraʼaa. Nájmi̱i̱n nigíʼdi̱i̱ nimbiyaʼ ga̱jma̱a̱ nimbáxi̱i̱n. Lá naku̱ma̱ʼ dí Jeobá niniguʼ dí niʼni Jacob rá.

Nda̱wa̱á dí ninújngoo rígi̱, Esaú nitanga̱a̱ náa goʼwóo, ga̱jma̱a̱ Jacob nigujtuun kambo̱o̱ ni̱jkha̱. Jacob gíʼdiin mbá 12 e̱ji̱n: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ga̱jma̱a̱ Benjamín. Nda̱wa̱á Jeobá majmiuu José mu maʼni káwíin xa̱bu̱ xuajñu. Lá nandaʼ ma̱ta̱ya̱a̱ xú káʼnii nirígá ráʼ. Guʼyáá.