Jeobá niʼthúu̱n Moisés: “Atsimaaʼ náa kúbá. Maxna̱ʼ xtángoo ndrígóʼ rí maniraʼmáʼ náa itsí wajpa”. Moisés nitsimuu náa kúbá ga̱jma̱a̱ niguanúu ikhí 40 mbiʼi ga̱jma̱a̱ 40 mbruʼun. Índo̱ xtáa ikhí, Jeobá niʼnirámáʼ gu̱wa̱ʼ xtángoo náa itsí wajpa ga̱jma̱a̱ nixnúu Moisés.

Ninújngoo mbiʼi, bi̱ israelitas nigi̱ʼdu̱u̱ nikumu̱ún rí Moisés niniñúúnʼ. ikha jngó nitháán Aarón: “¡Nanduxu mbáa bi̱ mbayá edxu̱u̱. Atani mbáa dios!”. Aarón niriʼña: “Gáguwaʼ kudala oro dí kuaʼdáá”. Ikhú, ikhaa niruiʼya̱a̱ʼ oro mu maʼnii mbáa aʼdá xede̱. Xa̱bu̱ xuajin nithi: “¡Aʼdá xede̱ bugi̱ niʼni káwáanʼ náa Egipto!”. Nini mbá ndxa̱a̱ ga̱jma̱a̱ nigi̱ʼdi̱i̱ nini ndiyamajkuíí aʼdá xede̱ bi̱ ki̱ʼni̱i̱ ga̱jma̱a̱ oro. Lá ra̱májánʼ nindxu̱u̱ rúʼko̱ ráʼ. Xúʼko̱, numuu dí xa̱bu̱ xuajin nithi dí i̱ndó Jeobá muni̱ mba̱a̱. Rí xúgi̱ tsenimbaníí ajngún.

Jeobá ndiʼyoo xúgíʼ rí xtáa rarígá ga̱jma̱a̱ niʼthúu̱n Moisés: “Ayajta̱ʼ gáta̱ya̱a̱ xuajin, numuu rí tsénimbu̱ún  kuyoʼ. Kuwa runi mba̱a̱ mbáa dios bi̱ ragájkhun”. Moisés nigajta̱a̱ náa kúbá ga̱jma̱a̱ kagu̱ a̱jma̱ itsí wajpa.

Índo̱ Moisés na̱ʼkha̱ mijngii náa gíinʼ, niʼdxuun rí xa̱bu̱ kuwa runi ajmúú. Índo̱ ni̱jkha̱nú ndiʼyoo rí kuwa rusian ga̱jma̱a̱ nuni mba̱a̱ aʼdá xédé. Moisés nikiʼnáa wéñuʼ, nidaʼ a̱jma̱ itsí wajpa dí kagu̱ ga̱jma̱a̱ nixpiʼta. Nacha̱ ni̱jkha̱ gáʼni gámbóo xándú ga̱jma̱a̱ niraxu̱u̱ Aarón: “Ndiéjunʼ niniaʼ ikha jngó nitani̱ rígi̱ rí xkawiʼ wéñuʼ rá.” Aarón niriʼña: “Xákiʼnán, natayáá má xú kaʼnii ni̱ndxu̱ún. Nindúún mbáa dios, ikha jngó nidaʼ oro náa aguʼ, ikhú nigájnuu aʼdá xédé bugi̱”. Ra̱májánʼ rí niʼni Aarón. Mbu̱júu̱ Moisés nitsimuu náa kúbá ga̱jma̱a̱ niʼtákáñuu Jeobá rí maʼni mba̱a̱ a̱jkiu̱u̱n kaʼyoo xuajin rígi̱.

Jeobá niʼni mba̱a̱ a̱jkiu̱u̱n kaʼñún israelitas bi̱ nandún munimbu̱ún. Majphú gíʼdoo numuu rí munimbu̱ún kuyáá Jeobá ga̱jma̱a̱ Moises, lá ragájkhun ráʼ.