A̱jma̱ igu̱nʼ nda̱wa̱á rí israelitas nigájnun náa Egipto, niguáʼnu náa kúbá rí mbiʼyuu Sinaí. ga̱jma̱a̱ niguanún ikhí. Ikhú Jeobá nindo̱ʼo̱o̱ Moisés dí matsimuu náa inuu kúbá ga̱jma̱a̱ niʼthúu̱n: “Ikhúúnʼ nini káwíin israelitas. Á mu ikhiin nunimbu̱ún kuyoʼ ga̱jma̱a̱ nunimbaníí xtángoo ndrígóʼ mani̱ndxu̱ún mbá xuajin kiejunʼ”. Índo̱ Moisés nigajta̱a̱, nithúún bi̱ israelitas dí Jeobá niʼthí. Ndiéjunʼ niriʼña̱a̱n xá. Nithi: “Munixu̱ʼ xúgíʼ dí Jeobá gáʼtuxu”.

Nda̱wa̱á mbu̱júu̱ Moisés nitsimuu náa kúbá. Ikhí Jeobá niʼthúu̱n: “Índo̱ gáʼni ajtsú mbiʼi matamíjná gajmíi̱nʼ xa̱bu̱ xuajen. Arathún rí ma xátsimún náa kúbá Sinaí”. Moisés nigajta̱a̱ ga̱jma̱a̱ niʼthún israelitas rí muniratamijná mudxawíín aʼwóo Jeobá.

Niʼni ajtsú mbiʼi nda̱wa̱á, índo̱ israelitas ndiyáá mbá du̱u̱n skuniʼ inuu kúbá, ma̱ngaa nidxawíín rí gamíi wéñuʼ eni a̱jkhu̱u̱n ga̱jma̱a̱ nawáán xóo aʼwóo mbá chi̱ji̱ʼ. Nda̱wa̱á Jeobá nigajtaa náa tapo̱o̱ aguʼ. Bi̱ israelita nimiñun wéñuʼ. Xúgíʼ kúbá nirugoo ga̱jma̱a̱ gúní ma̱ngaa niʼxma wéñuʼ. Aʼwóo chi̱ji̱ʼ niwán itháan gakhi̱i̱. Ikhú Jeobá niʼthí: “Ikhúúnʼ ñajunʼ Jeobá. Ragíʼmaa mbuyamajkuíí imba̱a̱ Dios”.

Moisés nitsimuu mbu̱júu̱ náa kúbá, ikhí Jeobá nixnúu xtángoo mu mbuyáá xa̱bu̱ xuajen. Náa xtángoo rúʼko̱ naʼthí xú káʼnii gíʼmaa mbuyamajkuíí ma̱ngaa naʼthí xú káʼnii gíʼmaa mani̱ndxu̱u̱n. Moisés niʼnirámáʼ rígi̱ nda̱wa̱á niguxnuu náa inún israelitas. Ikhiin nithi: “Munixu̱ʼ xúgíʼ rí Jeobá nandoo”. Ikhiin nixudami̱jna̱ muni rí nandoo Dios, mú, lá munimbánii xá.