Bi̱ kayá edxu̱u̱ náa dxajkun bi̱ mbiʼyuu Elí nigiʼdiin a̱jmi̱i̱n e̱ji̱i̱n: Hofní ga̱jma̱a̱ Finehás. Ikhiin ninindxu̱ún ndxajkun ga̱jma̱a̱ niñejunʼ náa tabernáculo. Mú túnimbu̱ún xtángoo ndrígóo Jeobá ma̱ngaa nuniu̱u̱n dí raʼkhí xa̱bu̱. Índo̱ israelitas nagún kudúún tsigijñaʼ náa Jeobá, Hofní ga̱jma̱a̱ Finehás nuniñanʼ xuwiʼ rí itháan májánʼ mu̱phu̱ ikhiin. Elí ndaʼyoo rí e̱ji̱i̱n nuni dí ra̱májánʼ, mu tséʼni nimbá mu maxpríguun. Lá marigá rí maʼni Jeobá ráʼ.

Maski ajndu Samuel nindxu̱u̱ itháan chíʼgíʼ ki xóo Hofní ga̱jma̱a̱ Finehás, tséʼni dí ra̱májánʼ xóo ikhiin. Ikha jngó, Jeobá nidxuu kaʼyoo wéñuʼ. Mbóo mbruʼun, Samuel naʼgu ga̱jma̱a̱ niʼdxuun mbá aʼwá rí nandxa̱ʼóo. Ikhú nituxu̱u̱, nigáyúu ni̱jkha̱ gáʼyoo Elí ga̱jma̱a̱ niʼthúu̱n: “Gi̱jyooʼ xtáá”. Mú Elí niriʼña: “Ikhúúnʼ na̱nguá nindxa̱ʼwa̱ʼ. Ayuʼ gínuʼ”. Samuel ni̱jkha̱a̱ gábooʼ. Ikhaa má nigíʼnuu rí maʼni a̱jma̱ núthu. Índo̱ Samuel niʼdxuun aʼwá rí maʼni ajtsú aʼphu̱ Elí ndiʼyoo rí Jeobá eʼthúu̱n Samuel. Elí niʼthúu̱n rí á mu naʼdxuun mbu̱júu̱ aʼwóo Jeobá, mariʼña: “Arathúnʼ Jeobá. Xa̱bia̱ʼ xtáa raʼdxuun”.

Samuel nitanga̱a̱ náa xiyao ikhú niʼdxuun mbu̱júu̱: “Samuel, Samuel”. Ikhaa niriʼña: “Arathúnʼ, Jeobá. Xa̱bia̱ʼ xtáa raʼdxuun”. Jeobá  niʼthúu̱n: “Arathán Elí rí ma̱ʼkhá ka̱yo̱ʼ castigo náa ikhaa ga̱jma̱a̱ bi̱ kuwa náa goʼwóo. Ikhaa ndaʼyoo rí e̱ji̱i̱n kuwa runi dí ra̱májánʼ náa tabernáculo ndrígóʼ, mú nda̱a̱ rí eʼni mu maxprígún”. I̱mba̱ néjtsuu, Samuel nimbáʼtoo xkrugua náa tabernáculo, xó má eʼni. Nimíñuu gáʼthúu̱n bi̱ kayá edxu̱u̱ náa ndxajkun ajngóo Jeobá. Mú Elí nindxa̱ʼóo ga̱jma̱a̱ niraxu̱u̱: “A̱ʼdióʼ ni̱ndxa̱ʼ, ndiéjunʼ niʼtháanʼ Jeobá rá.” Ikhú Samuel niʼthúu̱n xúgíʼ.

Samuel ni̱jkha̱ raja̱a̱ ma̱ngaa nimbáxu̱u̱ má xúʼko̱ ga̱jma̱a̱ Jeobá. Xúgínʼ Israelitas bi̱ kuwa náa xúgíʼ xuajen ndiyáá rí Jeobá niraʼwíí Samuel mu mani̱ndxu̱u̱ gaʼyee ga̱jma̱a̱ juez.