Elcaná ninindxu̱u̱ mbá israelita bi̱ nigiʼdiin a̱jmi̱i̱n gu̱ʼu̱: Ana ga̱jma̱a̱ Peniná. Mú ikhaa nindoo kaʼyoo itháan Ana. Peniná nigiʼdiin mbaʼin e̱ji̱i̱n, mú Ana na̱nguá nigiʼdaa nimbáa. Ikha jngó, Peniná nanduʼwájmaa Ana. Xúgíʼ tsiguʼ, Elcaná na̱jkha̱ kagu̱u̱n bi̱ kuwa náa goʼwóo náa Siló, mu mbuyamajkuíí Jeobá náa tabernáculo. Mbá miʼtsú, índo̱ kuwa ikhí, Elcaná ndiʼyoo dí Ana, a̱ʼgiu̱u̱ bi̱ nandoo kaʼyoo xtáa gíná wéñuʼ. Ikha jngó niʼthúu̱n: “Mbá péñu Ana, xátambiyaʼ. Ikháánʼ xtaʼdúún ikhúúnʼ, ga̱jma̱a̱ ikhúúnʼ nandoʼ ka̱ya̱ʼ”.

Nda̱wa̱á, Ana ni̱jkha̱ gaʼtájkáan mbáwíi. Tséniñuʼ rambiyaʼ, ga̱jma̱a̱ niʼthá kháñuu Jeobá rí mambáyúu. Niʼthúu̱n Jeobá: “Jeobá, á mu naraxniúʼ mbáa ada̱, maxniaʼ mu maʼni ñajuanʼ xúgíʼ mbiʼi rí gáxtáa”.

Elí bi̱ phú kayá edxu̱u̱ náa ndxajkun ndiʼyoo rí Ana xtáa rambiyaʼ ga̱jma̱a̱ naʼba̱a̱n rawunʼ mu tséʼthi, ga̱jma̱a̱ nikumu̱u̱ rí najnga̱a̱. Ana niʼthúu̱n: “Na̱nguá, tátá, tséjngu̱u̱n. Gúʼdoo mbá xkujndu gakhi̱i̱ wéñuʼ ga̱jma̱a̱ xtáá ratamíjná ga̱jmu̱ʼ Jeobá”. Elí ndiʼyoo rí nijngawa̱a̱n ga̱jma̱a̱ niʼthúu̱n Ana: “Gaxnáʼ Jeobá rí nitanda̱ʼa̱a̱”. Ana niʼni̱i̱ a̱jkiu̱u̱n, ikhú ni̱jkha̱a̱. Táʼni mbá tsiguʼ  índo̱ ikhaa nigiʼdaa mbáa ada̱ ga̱jma̱a̱ nixná mbiʼyuu Samuel. Lá natatsaʼwáminaʼ xú káʼnii gagi wéñuʼ nixtáa Ana ráʼ.

Ana támbumuu rí nikudaminaʼ náa Jeobá. Índo̱ niniñuʼ raʼxúu Samuel, ni̱jkha̱ kayáa náa tabernáculo mu maʼni ñajunʼ Dios. Ikhaa niʼthúu̱n Elí: “Nitakháñu Jeobá mu maxniúʼ ada̱ bugi̱. Rí xúgi̱ naxnaxíi mu maʼ ni ñajunʼ xúgíʼ mbiʼi rí gáxtáa”. Elcaná ga̱jma̱a̱ Ana nagún ruyáá Samuel xúgíʼ tsiguʼ ga̱jma̱a̱ nagún ku̱ñu̱u̱n mbá xtíin rí nda̱a̱ ñawúunʼ. Nda̱wa̱á, núma̱a̱ má Jeobá Ana nigiʼdiin xóó ajtsíin jiáma ga̱jma̱a̱ a̱jmi̱i̱n wa̱ʼxa̱ʼ.