Mbá miʼtsú nirígá ewiʼ náa Israel. Ikha jngó mbáa a̱ʼgu̱ bi̱ nigumbiʼyuu Noemí nigájnuu ga̱jma̱a̱ ajmbio̱o̱ gajmíi̱n e̱ji̱i̱n mu magún gákuwá náa ku̱ba̱ʼ ndrígóo Moab. Nda̱wa̱á ajmbio̱o̱ Noemí nikháñuu. E̱ji̱i̱n nidiin a̱jmi̱i̱n wa̱ʼxa̱ʼ moabitas: Mbáa nigumbiʼyuu Rut imba̱a̱ Orpá. Mú gíná niʼni rí nda̱wa̱á e̱ji̱i̱n Noemí ma̱ngaa nikháñun.

Índo̱ Noemí niʼdxuun dí nándáa ewiʼ náa Israel, ikhú nitanga̱a̱ náa xuajñu. Rut ga̱jma̱a̱ Orpá nigún gajmiún, mu náa kamba̱a̱ Noemí niʼthún: “Ikháanʼ nindxa̱la gu̱ʼu̱ bi̱ májánʼ a̱jkiu̱ún. Manigu̱ʼ dí munujúnʼ mbu̱júu̱. Gatangáanʼ náa guʼwála dí rígá náa Moab”. Gu̱ʼu̱ bugi̱ niriʼña̱a̱: “Nanduxu ku̱ya̱ʼ wéñuʼ, na̱nguá eyuxuʼ muniʼñáaʼ mbáwíín”. Noemí naʼthúún mbaʼa nuthu dí matangi̱ín. Nda̱wa̱á Orpá ni̱jkha̱a̱ mú Rut niguanúu. Noemí niʼthúu̱n Rut: “Orpá nitanga̱a̱ náa xuajñu ga̱jma̱a̱ nitanga̱a̱ gáʼñun dioses ndrígóo. Ayuuʼ ga̱jma̱ʼ ikhaa mu ma̱ta̱ya̱a̱ rudáaʼ”. Ikhú Rut niʼthúu̱n: “Xániʼñáʼ. Xuajñanʼ mani̱ndxu̱u̱ xuajñuʼ ga̱jma̱a̱ Dios ndrígáʼ mani̱ndxu̱u̱ Dios ndrígóʼ”. Xú káʼnii nikumu̱u̱ Noemí ku̱ma̱ʼ ikháánʼ índo̱ Rut niʼthúu̱n xúʼko̱ kaʼnii xá.

Rut ga̱jma̱a̱ Noemí niguáʼnu náa Israel índo̱ nagi̱ʼdu̱u̱ nuraxi̱i̱ cebada. Mbóo mbiʼi Rut ni̱jkha̱ gáguxi̱i̱ cebada dí niguanúu náa mbayuuʼ Boaz, bi̱ nindxu̱u̱ a̱ʼdióo Rahab. Boaz niʼdxuun dí Rut ninindxu̱u̱ jmbii má xúʼko̱ náa Noemí ma̱ngaa rí niguanúu ga̱jma̱a̱ ikhaa. Ikhú Boaz niʼthún xa̱bi̱i̱ dí muniñaaʼ itháan cebada náa mbayuuʼ mu maguxi̱i̱ Rut.

Mbruʼun má rúʼko̱, Noemí niraxu̱u̱ Rut: “Náa minaʼ nitiajunʼ mbiʼi xúgi̱  rá.” Rut niriʼña̱a̱: “Náa mbayuuʼ Boaz”. Noemí niʼthúu̱n: “Boaz kaʼyoo a̱jmbio̱ʼ. Atiejunʼ má xúʼko̱ náa mbayuuʼ gajmiáanʼ eʼwíínʼ wa̱ʼxa̱ʼ. Ikhí maraxtaa itháan májánʼ”.

Rut niñajunʼ náa mbayuuʼ Boaz asndu índo̱ niguámbá nigixi̱i̱ cebada. Boaz ni̱jkha̱nú ndiʼyoo dí Rut nindxu̱u̱ mbáa a̱ʼgu̱ májáánʼ a̱jkiu̱u̱n ga̱jma̱a̱ mbáa a̱ʼgu̱ bi̱ nañajunʼ. Nákha mbiʼi rúʼko̱, xí mbáa xa̱biya̱ nakháñuu ga̱jma̱a̱ na̱nguá gíʼdiin e̱ji̱n, mbáa bi̱ kaʼyoo ma̱ndoo mbayáa a̱ʼgiu̱u̱. Ikha jngó Boaz ndiyáa Rut. Niguáʼdaa mbá ada̱ bi̱ nixna mbiʼí Obed. Tsiguʼ nda̱wa̱á Obed ninindxu̱u̱ xiʼñúuʼ rey David. Bi̱ nambáxu̱u̱n gajmíi̱n Noemí nidxún wéñuʼ. Nitháán: “Ginii Jeobá nixniáʼ Rut, bi̱ niʼniaʼ mbaʼa dí májáánʼ. Ga̱jma̱a̱ dí xúgi̱ xtaʼdaa aʼdá xíñaaʼ. Guʼni mba̱a̱ Jeobá ga̱jma̱a̱ numuu rúʼko̱”.