Nda̱wa̱á rí David nixíyáa Goliat, rey Saúl nigíiʼ mu mayéʼga edxu̱u̱ náa soldados. David niʼngo̱o̱ nidaʼ mbaʼa náa nixmínaʼ ga̱jma̱a̱ nijmaʼniiʼ wéñuʼ. Mámbá rí natanga̱a̱ goʼwóo nda̱wa̱á rí ni̱jkha̱ gaxmínaʼ, gu̱ʼu̱ nagájnún guraʼníí ga̱jma̱a̱ nusian ma̱ngaa nuni ajmúú: “Saúl niʼngo̱o̱ nigudíin mbaʼin xa̱bu̱ mu David niʼngo̱o̱ nigudíin itháan mbaʼin wéñuʼ”. Ikha jngó, Saúl nigíʼdu̱u̱ nixígúu kaʼyoo ga̱jma̱a̱ nindoo maxíyáa.

David naʼdu̱u̱ májánʼ wéñuʼ arpa. Mbóo mbiʼi, índo̱ ikhaa naʼdu̱u̱ mu maʼdxun Saúl, ikhú rey nidaʼ lanza ndrígóo náa ikhaa. Mú David niginduti̱ga̱ ga̱jma̱a̱ xúʼko̱ tajuaʼan lanza náa ikhaa, ga̱jma̱a̱ lanza nijuaʼan náa pared. Nda̱wa̱á dí nirígá rúʼko̱, Saúl nigíʼ maxíyáa mbaʼa nuthu. Nda̱wa̱á David nigáyúu ga̱jma̱a̱ nirkaʼwuminaʼ náa ku̱ba̱ʼ mixooʼ.

Ikhú Saúl ni̱jkha̱ kidxuʼ David gajmíi̱n mbá 3,000 soldados. Saúl nito̱ʼo̱o̱ náa ikhaa má  tsíñu náa nirkaʼwuminaʼ David gajmíi̱n xa̱bi̱i̱. Mañúú nitháán xa̱bi̱i̱: “Xúgi̱ ma̱ndoo mataxíyáa Saúl”. David nikuʼmaminaʼ náa Saúl ga̱jma̱a̱ nirujtu mbá chíʼgíʼ xtíñuu jma̱a̱ Saúl takumu̱u̱ mbá kayuʼ. Mú nda̱wa̱á rí niʼni rúʼko̱ David nigawúunʼ wéñuʼ numuu rí táʼyamajkuu rey bi̱ Jeobá niraʼwíi. Ikha jngó na̱nguá niniñuʼ rí xa̱bi̱i̱ muxiyáa. Índo̱ Saúl nigájna̱a̱ náa tsíñu, David niʼthúu̱n gakhi̱i̱: “Nixtáá mijngii maxíña̱a̱n mú táni”. Lá naku̱ma̱ʼ rí Saúl nigíʼdu̱u̱ ndiʼyamajkuu David ráʼ.

Na̱nguá. Saúl ni̱jkha̱ raxkoo má xúʼko̱ David. Ikhú mbá mbruʼun David ga̱jma̱a̱ aʼdá rixio̱o̱ bi̱ mbiʼyuu Abisái nitu̱ʼu̱u̱n nguʼwáá náa campamento ndrígóo Saúl. Asndu Abner, bi̱ nañewu̱u̱n Saúl, naʼgu. Abisái niʼthúu̱n David: “¡Ni̱jkha̱nú mbiʼi! Atatsíñunʼ maxíyáa Saúl”. Mú David niriʼña: “Jeobá má gáʼyoo rí gáʼniuu. Itháan májánʼ mbi̱ya̱ lanza ndrígóo ga̱jma̱a̱ rayaʼ náa kajnu̱ʼ iyoʼ, ga̱jma̱a̱ guʼgua̱”.

Nda̱wa̱á David nitsimuu náa kúbá dí rígá mijngii ikhí. Asndu rijma̱a̱ nandoo ndaʼyoo campamento ndrígóo Saúl. David nindxaʼwárígú: “¡Abner! Náa numuu rí tátiewa̱a̱n rey ndrígáʼ rá. Náa ni̱jkha̱ rayaʼ ga̱jma̱a̱ lanza ndrígóo xá.” Saúl ndiʼyoo rí aʼwóo David ga̱jma̱a̱ niʼthí: “Nindoo mataxíñu̱u̱n, mú tátani. Nda̱yo̱o̱ rí manindxa̱ʼ imba̱a̱ rey náa Israel”. Ikhú Saúl nitanga̱a̱ náa palacio. Mú raʼkháa xúgínʼ a̱ngui̱i̱n rey Saúl niguiñunʼ kuyáá David.