Náa ventana ndrígóo palacio náa Jezreel, rey Acab ndiʼyoo mbaaʼ ndrígóo mbáa xa̱biya̱ bi̱ nigumbiʼyuu Nabot. Acab nindoo maʼtsi̱i̱ ku̱ba̱ʼ ndrígóo. Mú Nabot tándoo gágujua̱a̱ numuu rí Xtángoo ndrígóo Jeobá naʼthí rí xándoo magujua̱a̱ mbaaʼ rí nixnúu anu̱u̱. Nabot niʼni rí jmbu. Lá naku̱ma̱ʼ rí Acab ndiʼyamajkuu rí niraʼwíí maʼni Nabot ráʼ. Na̱nguá. Acab nikiʼnáa wéñuʼ. Nikiʼnáa wéñuʼ rí asndu nánguá nindoo gagájnuu náa goʼwóo mu makuiʼtsu.

A̱ʼgiu̱u̱ Acab ninindxu̱u̱ reina Jezabel bi̱ ra̱májánʼ wéñuʼ. Ikhaa niʼthúu̱n: Ikháánʼ ni̱ndxa̱ʼ rey ndrígóo Israel, ikha jngó ma̱ndoo maraʼdáá xúgíʼ rí nandaʼ. Ikhúúnʼ mbaʼyáaʼ ku̱ba̱ʼ rúʼko̱ ga̱jma̱a̱ maxna̱ʼ”. Ikhú niʼnirámáʼ carta náa bi̱ kuya̱ edxu̱u̱ náa xuajen. Náa carta rúʼko̱ nikuʼma rí muxruiga̱a̱ Nabot numuu rí niʼthá wéñuʼ Dios ga̱jma̱a̱ rí nda̱wa̱á muxiyáa ga̱jma̱a̱ itsí. Bi̱ kuya̱ edxu̱u̱ nini xúgíʼ rí niʼthí Jezabel. Nda̱wa̱á, ikhaa niʼthúu̱n Acab: “Rí xúgi̱ Nabot nikháñuu má. Ma̱ngoo maguanáʼ ga̱jma̱a̱ mbaaʼ ndrígóo”.

Raʼkháa i̱ndó Nabot bi̱ nda̱a̱ aʼkhúun nixíyáa Jezabel. Ikhaa nigudíin mbaʼin bi̱ nindúún kuyáá Jeobá. Ma̱ngaa ndiʼyamajkhún xándú ga̱jma̱a̱ niʼni i̱ʼwáʼ dí ra̱májánʼ. Mú Jeobá ni̱jkha̱nú ndiʼyoo xúgíʼ dí ra̱májánʼ. Ndiéjunʼ gáʼniuu Jeobá Jezabel rá.

Nda̱wa̱á rí nikháñuu Acab, ninújngoo mbiʼi, ga̱jma̱a̱ a̱ʼdióo Jehoram nigíʼdu̱u̱ niʼtáñajunʼ. Ikhú Jeobá nikunguanʼ mbáa xa̱bu̱ bi̱ mbiʼyuu Jehú mu maxnúu castigo Jezabel gajmíi̱n bi̱ kuwa náa goʼwóo.

Jehú nitsimuu náa carro ndrígóo ga̱jma̱a̱ ni̱jkha̱ náa Jezreel, náa nixtáa Jezabel. Jehoram ma̱ngaa ni̱jkha̱ ga̱jma̱a̱ carro ndrígóo mu maʼga̱ gáraʼnuu Jehú. Índo̱ ndiʼyoo Jehoram niraxu̱u̱: “Lá rígá tsímáá náa ikháanʼlu ráʼ.” Jehú niriʼña̱a̱: “Na̱nguá. Xárígá rí tsímáá á mu rudáaʼ  Jezabel tséniñuʼ raʼni dí ra̱májánʼ”. Ikhú Jehoram nitanga̱a̱ carro ndrígóo mu maʼga̱a̱, mú Jehú nidaʼ flecha, ikhú nixíyáa.

Nda̱wa̱á Jehú ni̱jkha̱ náa palacio ndrígóo Jezabel. Ikhaa niʼdxuun rí na̱ʼkha̱ ikha jngó nixníʼ inuu, ga̱jma̱a̱ nixtígúu edxu̱u̱ ga̱jma̱a̱ nigiʼthu̱u̱n náa ventana náa piso dí rígá rijma̱a̱. Índo̱ ni̱ʼkha̱nú, Jezabel táraxi̱i̱ ga̱jma̱a̱ gamajkhu. Jehú niʼthún xa̱bu̱ bi̱ nuñajunʼ ikhí bi̱ wájun mijngii náa ikhaa: “¡Gudatiguíi!”. Ikhiin nidatiguíi náa ventana, ga̱jma̱a̱ ikhaa nixpátriguíi ga̱jma̱a̱ nikháñuu.

Nda̱wa̱á rí nirígá rúʼko̱, Jehú nigudíin mbá 70 e̱ji̱i̱n Acab ga̱jma̱a̱ niʼni gámbóo náa nduyamajkuíí Baal. Nitayáá ráʼ. Jeobá ndaʼyoo xúgíʼ rí narígá ga̱jma̱a̱ ikhaa naxnún castigo náa mbiʼi rí kaʼyoo bi̱ nuni dí ra̱májánʼ.