Josías nigíʼdu̱u̱ niʼtáñajunʼ náa Judá índo̱ ikhaa gíʼdoo migiñuʼ tsiguʼ. Nákha ikhú, xa̱bu̱ najmún magia ga̱jma̱a̱ nduyamajkhún xándú. Índo̱ Josías nigiʼdoo 16 tsiguuʼ, nindoo majmañuu mbaʼyamajkuu Jeobá xó má kaʼyoo. Nda̱wa̱á, índo̱ nigiʼdoo 20 tsiguʼ, nigíʼdu̱u̱ niʼni gámbíin xándú ga̱jma̱a̱ altar náa xúgíʼ xuajen. Ga̱jma̱a̱ índo̱ nigiʼdoo 26 tsiguuʼ, niʼniratoo xúgíʼ mu maʼni májáánʼ templo ndrígóo Jeobá.

Hilquías bi̱ kayá edxu̱u̱ náa ndxajkun, nixkamaa náa templo mbá rollo náa na̱ʼkha̱ Xtángoo ndrígóo Dios. Mbáa rollo rúʼko̱ rí niʼnirámáʼ Moisés. Safán, secretario ndrígóo rey, ni̱jkha̱ kayóo rollo náa Josías ga̱jma̱a̱ nigíʼdu̱u̱ niguxnuu gakhi̱i̱. Josías niʼdxuun ga̱jma̱a̱ ni̱jkha̱nú ndiʼyoo rí xa̱bu̱ xuajen nánguá enimbu̱ún kuyáá Jeobá asndu nákha niʼníí tsiguʼ. Ikhú rey Josías niʼthúu̱n Hilquías: “Jeobá nakiʼnáa wéñuʼ ga̱jma̱á ni̱ndxu̱lú. Aratamíjná ga̱jma̱ʼ mu maʼthúlú rí gíʼmaa muʼni”. Jeobá nixnúu ajngáa rígi̱ a̱ʼgu̱ bi̱ naʼthí dí marigá bi̱ nigumbiʼyuu Huldá: “Xuajñuʼ Judá niniñuʼ. Maxnu̱u̱n castigo, mú raʼkháa xúgi̱ rí Josías xtáa xóo rey, numuu rí ikhaa nindxu̱u̱ xa̱bu̱ guabaaʼ”.

Índo̱ rey Josías niʼdxuun ajngáa rígi̱, ni̱jkha̱ náa templo ga̱jma̱a̱ nigímbíin xa̱bu̱ xuajen bi̱ kuwa náa Judá. Nda̱wa̱á, niguxnuu Xtángoo ndrígóo Jeobá ga̱jma̱a̱ aʼwá gakhi̱i̱ náa xuajen. Josías ga̱jma̱a̱ xa̱bu̱ xuajen nixudami̱jna̱ rí munimbu̱ún kuyáá Dios ga̱jma̱a̱ xúgíʼ a̱jkiu̱ún.

Niʼni mbá mba̱yu̱ʼ tsiguʼ rí xuajen Judá na̱nguá eniriyaʼ Pascua. Mú Josías niguxnuu Xtángoo rí naʼthí rí Pascua ndayóoʼ muniriyaaʼ  xúgíʼ tsiguʼ, ikha jngó niʼthún xa̱bu̱ xuajen: “Muguaʼdáá mbá ndxa̱a̱ ndrígóo Pascua náa Jeobá”. Nda̱wa̱á, Josías niʼtáñajunʼ mu muni májánʼ tsigijñaʼ ga̱jma̱a̱ mu makuwá bi̱ muni ajmúú náa templo. Ikhú niniriyaʼ Pascua ga̱jma̱a̱ nda̱wa̱á niniriyaʼ Ndxa̱a̱ ndrígóo Pan dí Ragíʼdoo Levadura rí ndijyúuʼ mbá juwan mbiʼi. Na̱nguá nirígá Pascua xúʼko̱ kaʼnii asndu nákha nixtáa Samuel. Josías phú nandoo kaʼyoo Xtángoo ndrígóo Dios. Ikháánʼ rá. Lá mangáán nanigua̱ʼ majmañaaʼ ga̱jma̱a̱ numuu Jeobá ráʼ.