Náa mbá xuajen ndrígóo Asiria dí nigumbiʼyuu Nínive, xa̱bu̱ bi̱ kuwa ikhí ninindxu̱ún ra̱míjínʼ wéñuʼ. Jeobá nikuʼmaa gaʼyee ndrígóo bi̱ mbiʼyuu Jonás mu maʼga̱ náa Nínive ga̱jma̱a̱ maʼthúún xa̱bu̱ rí muriʼkhumijná. Mú Jonás táʼga̱ náa Nínive, ikhaa ni̱jkha̱ i̱mba̱ níʼkhá ga̱jma̱a̱ nitsimuu mbá barco rí na̱jkha̱ náa mbá xuajen rí mbiʼyuu Tarsis.

Índo̱ barco xtáa ra̱jkha̱ náa lamáa, ikhú niʼni mbá giñán mbiiʼ, ga̱jma̱a̱ marineros nimiñun wéñuʼ. Nitajkháan náa dioses ndrígu̱ún ga̱jma̱a̱ niraximíjna̱: “Náa numuu naguáʼnilú rígi̱ rá.” Nda̱wa̱á, Jonás niʼthúún: “Aʼkhúnʼ ikhúúnʼ. Numuu rí na̱jkhá i̱mba̱ níʼkhá numuu rí tsíyóóʼ gánimbánuu mbá rí Jeobá niʼthúunʼ mani. Gudamu̱ʼu̱u̱n náa iyaʼ mu xúʼko̱ mawi̱ji̱i̱ giñánʼ rígi̱”. Marineros na̱nguá eñún gudama̱ʼa̱a̱n Jonás náa iyaʼ, mú ikhaa niʼthá kháñuun rí muni. Ikha jngó nidama̱ʼa̱a̱n náa lamáa, ga̱jma̱a̱ ikhú giñánʼ niwi̱ji̱i̱.

Jonás nikumu̱u̱ rí makhañúu. Índo̱ na̱jkha̱ rajngúun itháan mi̱jnu̱ʼ náa lamáa, ikhú niʼthá kháñuu Jeobá. Ikhú Jeobá nikuʼmaa mbáa e̱gi̱ʼ mba̱a̱ wéñuʼ mu mikhu jngiúnʼ Jonás, mú taxiyáa. Náa awúu̱n e̱gi̱ʼ, Jonás niʼthá kháñuu Jeobá: “Natha̱nʼ gajkhun rí manimbo̱ʼ kayaʼ má xúʼko̱”. Jeobá niʼni rí Jonás xákhañuu náa awúu̱n e̱gi̱ʼ mbá ajtsú mbiʼi ga̱jma̱a̱ nda̱wa̱á niʼni rí e̱gi̱ʼ maxiriyaa náa ku̱ba̱ʼ mixooʼ.

Jeobá niʼni kríyaa Jonás, mú, lá rúʼko̱ nindoo gáʼthúu̱n rí ni xáʼyóoʼ  maʼga̱ náa Nínive xáʼ. Na̱nguá. Jeobá nikuʼmaa mbu̱júu̱, ga̱jma̱a̱ xúgi̱ rí Jonás niʼnimbo̱o̱. Ni̱jkha̱ ga̱jma̱a̱ niʼthúún xa̱bu̱ ra̱míjínʼ bi̱ kuwa ikhí “Jeobá maʼni gámbóo xuajen rígi̱ índo̱ gaʼni 40 mbiʼi”. Mú nirígá mbá rí tágiʼtu̱u̱n. Bi̱ ninivitas ninimbu̱ún rí niʼthí ga̱jma̱a̱ niriʼkumijnáa. Rey ndrígóo Nínive niʼthúún xa̱bu̱ xuajñu: “Guta kháñii Dios ga̱jma̱a̱ gatanga̱a̱ a̱jkia̱la, mbáa xúʼko̱ gáʼni rí xáʼni gámbáanʼlu”. Índo̱ Jeobá ndiʼyoo rí xa̱bu̱ nitanga̱a̱ a̱jkiu̱ún, nánguá niʼni gámbíin.

Jonás nikiʼnáa numuu rí Jeobá na̱nguá niʼni gámbóo xuajen. Atatsaʼwáminaʼ mbá chíʼgíʼ: Jeobá niʼngo̱o̱ a̱jkiu̱u̱n kaʼyoo Jonás ga̱jma̱a̱ nigáwiinʼ a̱jkiu̱u̱n kaʼyoo. Mú Jonás na̱nguá nigáwiinʼ a̱jkiu̱u̱n kaʼñúún xa̱bu̱ Nínive. Rí niʼni, asndu misia̱nʼ inuu ni̱jkha̱ gági̱ʼi̱ náa rawuunʼ xuajen náa agoo xkamixoo mbá yúwáʼ ra̱ʼkha̱. Mú nda̱wa̱á yúwáʼ nijndoʼ, ikhú Jonás nikiʼnáa wéñuʼ. Ikha jngó Jeobá niʼthúu̱n: “Naxmiéjuanʼ itháan eʼni yúwáʼ ki xóo ninivitas. Ikhúúnʼ nigáwiinʼ a̱jkiu̱nʼ ka̱ñu̱u̱n ga̱jma̱a̱ numuu rúʼko̱ nikáwíin”. Ndiéjunʼ rí Dios nindoo majmañuu Jonás rá. Dí xa̱bu̱ Nínive guáʼdáá itháan numún ki xóo asndu xú káʼnii má planta.