Lá nandaʼ majmañaaʼ itháan ga̱jma̱a̱ numuu Biblia ráʼ. Lá nandaʼ ma̱ta̱ya̱a̱ itháan ga̱jma̱a̱ numuu mbá tsinaʼ chíʼgíʼ, o numuu mbáa xa̱bu̱, o mbá xuajin o dí nirígá nákha wajyúúʼ dí eʼkha̱ raʼthí náa Escrituras ráʼ. Lá natraximínáʼ á mu ma̱ndoo mambáyaʼ Ajngá rawunʼ Dios matanimbaníí xkujndu ndrígáʼ ráʼ. Á mu xúʼko̱, ma̱ndoo majmaaʼ biblioteca dí rígá náa Guʼwá nagimbáanʼ.

Náa biblioteca rígá mbaʼa enii i̱yi̱i̱ʼ rí ma̱ndoo matanigajmaa xóó itháan. Mbáa ikháánʼ na̱nguá xtaʼdáá xúgíʼ i̱yi̱i̱ʼ rí na̱ʼkha̱ raʼthí ga̱jma̱a̱ numuu Biblia dí rígá náa ajngáaʼ rí nini bi̱ nutaraʼa numuu Jeobá; mú náa Biblioteca dí rígá náa Guʼwá nagimbáanʼ rígá mbaʼa i̱yi̱i̱ʼ rí ndiʼkhún nigájnuu. Mbáa rígá mbaʼa enii Biblia ga̱jma̱a̱ mbá diccionario dí na̱ʼkha̱ raʼthí májánʼ wéñuʼ, ga̱jma̱a̱ i̱ʼwáʼ i̱yi̱i̱ʼ náa ma̱ndoo matanigajmaa. Ikháánʼ ma̱ndoo majmaaʼ biblioteca nákha xóó tsígi̱ʼdu̱u̱ reunión o nda̱wa̱á índo̱ niguámbá. Á mu rígá mbá computadora, mbáa gíʼdoo mbá programa rí mbiʼyuu Watchtower Library, náa na̱ʼkha̱ mbaʼa wéñuʼ i̱yi̱i̱ʼ ndrígáxo ga̱jma̱a̱ ragákhée rí majmaaʼ náa ma̱ndoo ma̱ta̱ya̱a̱ mbaʼa tema, ajngáa o tsinaʼ chajkhaʼ ndrígóo Biblia.

Mambáñún bi̱ kuwa rajmañún náa reunión Xóo kúwi̱i̱n ga̱jma̱a̱ xóo Etaraʼa Cristianos. Ikháánʼ ma̱ndoo majmaaʼ biblioteca rígi̱ mu matanirataminaʼ ga̱jma̱a̱ rí kaʼyaʼ. Bi̱ kayá edxu̱u̱ náa nawaʼsngáa gajkuáa ñawúunʼ mañewu̱u̱n biblioteca rígi̱, ga̱jma̱a̱ ikhaa ndaʼyoo á mu rígá i̱yi̱i̱ʼ rí ndiʼkhún nigájnuu ga̱jma̱a̱ dí marigá májánʼ xúgíʼ. Ikhaa o xa̱bu̱ bi̱ naʼsngáa ma̱ndoo muthanʼ xú káʼnii gátaxkamaa i̱yi̱i̱ʼ rí nda̱yáaʼ. I̱ndó gagiwanʼ a̱jkia̱nʼ dí ragíʼmaa matrawíi i̱yi̱i̱ʼ dí rígá náa Guʼwá nagimbáanʼ; ga̱jma̱a̱ gíʼmaa matiewa̱a̱n májánʼ ma̱ngaa rí xátaʼnííʼ.

Náa Biblia naʼthí rí mandoo “mataxkamaa ku̱ma̱ kiejunʼ ndrígóo Dios”, gíʼmaa mbuʼyáá asndu xóo mbá rí “gíʼdoo wéñuʼ numuu dí karkaʼwu” (Proverbios 2:1-5). Májánʼ nindxu̱u̱ biblioteca dí rígá náa Guʼwá nagimbáanʼ mu ma̱ndoo mataʼyáaʼ rí eyaaʼ.

• Ndiéjunʼ i̱yi̱i̱ʼ rí ma̱ndoo mataxkamaa náa Biblioteca dí rígá náa Guʼwá nagimbáanʼ rí ma̱ndoo majmaaʼ mu matanigajmaa̱ itháan rá.

• Tsáa gándoo mambáyaʼ mu majmaaʼ itháan májánʼ biblioteca rá.