Jesucristo niʼthún discípulos ndrígóo: “Xkuaʼni gambiʼi aguaʼla naʼ inu xabo, numu ri mbuya ri majan inila, ikajngo muni mba Tatiaʼla tsi xta mikui” (Mateo 5:16). Ikha jngó najmuxoʼ programa rí ndiʼkhún nigájnuu, xóó Internet. Náa ináa jw.org/jw-tln náa phú na̱ʼkha̱ rí nunimbu̱ún ga̱jma̱a̱ dí eni bi̱ nutaraʼa numuu Jeobá. Ndiéjunʼ gátaxkamaa ikhí rá.

Biblia nariʼña̱a̱ graxe̱ rí itháan naguma. Gi̱jyooʼ gariʼña̱a̱ tikhuu graxe̱ rí gíʼdoo wéñuʼ numuu rí nunimijna xa̱bu̱ numbaaʼ. Mbá xkri̱da, tratado Lá maʼga̱nú mbóo mbiʼi rí ní xakuwáanʼ tsingíná rá. Ga̱jma̱a̱ Lá ma̱ndoo matangi̱i̱ makuwá mbu̱júu̱ xa̱bu̱ bi̱ nikháñun ráʼ. I̱yi̱i̱ʼ rígi̱ rígá itháan rí mbá 600 ajngáa. Ma̱ngaa mataxkamaa Traducción del Nuevo Mundo itháan rí mbá 130 ajngáa; ma̱ngaa mbaʼa i̱yi̱i̱ʼ rí ma̱ndoo miʼsngúún ga̱jma̱a̱ xa̱bu̱ xóo libro Ndiéjunʼ phú eʼsngáa náa Biblia rá. Ga̱jma̱a̱ revista rí ndiʼkhún nigájnuu La Atalaya ga̱jma̱a̱ ¡Despertad! Mbaʼa i̱yi̱i̱ʼ rígi̱ ma̱ndoo matraxnuu o matadxun náa Internet, o ma̱ndoo matrígú náa formato xóo MP3, PDF o EPUB. Á mu nandaʼ, ma̱ndoo matani imprimir tikhuu náa ajngáaʼ mu matasngajmáá mbáa bi̱ nandoo maʼdxun ga̱jma̱a̱ numuu Reino. Rígá i̱yi̱i̱ʼ rí niguma video náa mbaʼa lenguas de señas, ga̱jma̱a̱ ma̱ndoo matrígú aʼwá rí nigixi̱i̱ rí nigixnuu náa Biblia, kixnáxe̱ ndaʼya rí na̱ʼkha̱ raʼthí náa Biblia ga̱jma̱a̱ cántico rí mitsaan mu matadxun índo̱ naguapán.

Rí eni bi̱ nutaraʼa numuu Jeobá. Náa ináa ndrígóo Internet rígi̱ na̱ʼkha̱ mbaʼa video rí naʼthí ga̱jma̱a̱ numuu ñajunʼ rí enixo náa xúgíʼ numbaaʼ, ga̱jma̱a̱ xkujndu rí nugíʼniin bi̱ nutaraʼa numuu Jeobá ga̱jma̱a̱ rí numbáñun a̱ngia̱xo bi̱ nugíʼniin gamiéjunʼ. Ma̱ngaa gi̱jyooʼ na̱kha̱ náa mbi̱ʼi̱i̱ gáguaʼdááxo asamblea ndrígáxo ga̱jma̱a̱ naʼthí xú káʼnii gándoo gátani mu ma̱ndoo marataráʼa náa sucursal ndrígáxo.

Ináa rígi̱ nambáyaxo mu munixo mambiʼi aguʼ ga̱jma̱a̱ numuu rí gajkhun asndu náa xuajin rí mitsinguánʼ wéñuʼ mu mambáñún xa̱bu̱ bi̱ kuwa mbajndi numbaaʼ, asndu náa Antártida. Nuʼtajkháan mu “ajŋgo [Jeobá]” majuadraʼa nacha xúgíʼ tsu̱du̱u̱ Ku̱ba̱ʼ mu mbiʼyamajkuíí ikhaa (2 Tesalonicenses 3:1).

• Xú káʼnii eyambáá jw.org/jw-tln rí mbaʼin xa̱bu̱ muniʼnúnʼ rí gajkhun rí na̱ʼkha̱ raʼthí náa Biblia rá.

• Ndiéjunʼ gánigua̱ʼ ma̱ta̱ya̱a̱ náa ináa ndrígáxo dí rígá náa Internet rá.