Mu miʼtáraʼa itháan májánʼ “nuxi ri mejanʼ [...] naʼ numbaʼ, jma su ñajunʼ jndo xoguinʼ su cuhua naʼ mamba numbaʼ [o xuajen mba̱ʼu̱], jma su ñajunʼ naʼ mamba rijñu, jma naʼ su mamba ajŋgun, jma naʼ su mamba xuajñu”, nurawíixo i̱yi̱i̱ʼ náa mbá 750 ajngáa (Rí huasjŋgajma Juan 14:6). Xú káʼnii enixo ñajunʼ rígi̱ rí mingíjyúu wéñuʼ rá. Náa xúgínʼ bi̱ nutaraʼa numuu Jeobá nigájnuu mbá equipo bi̱ kuwa náa mbaʼa xuajen mba̱ʼu̱ bi̱ nuniraʼmáʼ i̱yi̱i̱ʼ rígi̱ ga̱jma̱a̱ kuwa mbá grupo bi̱ nurawíi ajngáa.

I̱yi̱i̱ʼ rí phú nagájnuu ginii nagumaraʼmáʼ náa ajngáa inglés. Mbá nguathi̱i̱n bi̱ Guáʼdáá mbá ñajunʼ nduyáá rí naguma náa Departamento rí Nuniraʼmáʼ i̱yi̱i̱ʼ, dí rígá náa guʼwá dí nuxna ikha náa xúgíʼ tsu̱du̱u̱ numbaaʼ. Náa departamento rígi̱ nuxnun ñajunʼ rí muni bi̱ nuniraʼmá i̱yi̱i̱ʼ bi̱ kuwa ruñajunʼ náa guʼwá dí nuxna ikha ga̱jma̱a̱ náa i̱ʼwáʼ sucursal. Náa equipo rígi̱ kuwa xa̱bu̱ bi̱ naguwaʼ náa i̱ʼwáʼ xuajen mba̱ʼu̱ mu muniraʼmáʼ rí gíʼdoo wéñuʼ numuu náa xúgínʼ xa̱bu̱.

Rí kiʼniraʼmáʼ nuxuʼma náa inún bi̱ nurawíi ajngáa. Índo̱ nigumaraʼmáʼ xúgíʼ i̱yi̱i̱ʼ ga̱jma̱a̱ ndiyáá á mu májánʼ magajnúu ma̱ngaa nda̱wa̱á nuxuʼma náa computadora náa equipo bi̱ nurawíi ajngáa bi̱ kuwa náa xúgíʼ tsu̱du̱u̱ numbaaʼ, ikhiin nurawíi ajngáa ga̱jma̱a̱ nduyáá á mu májánʼ niguanúu ma̱ngaa nuni̱i̱la májánʼ. Bi̱ nurawíi ajngáa, nugíiʼ nduyáaʼ “ajngáa rí naʼthí mbájmbu ga̱jma̱a̱ numuu rí gajkhun” mu muniraʼmáʼ náa ajngún xó má naʼthí náa ajngáa inglés (Eclesiastés 12:10).

Computadora nayambáá mu maguma itháan nacha̱ ñajunʼ rígi̱. Mbá computadora xándoo maʼni ñajunʼ rí eʼni mbáa bi̱ naʼniramá i̱yi̱i̱ʼ o mbáa bi̱ naguwíi ajngáa. Mu ma̱ndoo maguma nacha̱ ñajunʼ rígi̱, najmún computadora náa na̱ʼkha̱ diccionario o i̱ʼwáʼ dí ma̱ndoo mambañuun. Bi̱ nutaráʼaxo numuu Jeobá ninixu Sistema Electrónico de Edición Plurilingüe (MEPS, rí xú kiʼniramáʼ ajngáa inglés), ikhí nandoo natoʼo̱o̱ náa computadora rí kiʼnirámáʼ náa mbaʼa wéñuʼ ajngáa, ma̱ngaa natima xtiʼkhuu rí ndayóoʼ maʼga̱ ga̱jma̱a̱ naguma májánʼ mu xúʼko̱ magajnúu nda̱wa̱á.

Náa numuu rí nonexo xúgíʼ tsiakii rígi̱ maski ajndu rígá ajngáa rí tsethi mbaʼin wéñuʼ xa̱bu̱ rá. Numuu rí Jeobá nandoo ‹rí xúgínʼ xa̱bu̱ makáwíin ga̱jma̱a̱ maguaʼdáá ku̱ma̱ rí phú ñajunʼ gajkhun› (1 Timoteo 2:3, 4).

• Xú káʼnii eguma ñajunʼ índo̱ nagumarámáʼ i̱yi̱i̱ʼ ndrígáxo rá.

• Ndíjkha rí nagumarámáʼ náa mbaʼa wéñuʼ ajngáa rá.