Náa numuu rí kuwa gagi wéñuʼ xa̱bu̱ tsíge rá. Ikhiin nagún náa asamblea ndrígáxoʼ. Xó má xa̱bi̱i̱ Dios bi̱ nikuwa nákha wajyúúʼ mbiʼi, náa niwaʼthúún magimbúun ajtsú ikhoo rí mbá tsiguʼ, xúʼko̱ má mangáanʼxo nadxaxoʼ wéñuʼ rí magimbáanʼ mbáʼáanʼxo wéñuʼ (Deuteronomio 16:16). Mámbá tsiguʼ naguáʼdááxo ajtsú enii asamblea: Xó má a̱jma̱ asamblea dí circuito rí narígá mbá mbiʼi ga̱jma̱a̱ asamblea rí ajtsú mbiʼi. Xú káʼnii embayaxoʼ rígi̱ rá.

Naʼni rí mambáxaxoʼ májánʼ wéñuʼ. Israelitas niʼñún makuwa gagi índo̱ ninimba̱a̱ Jeobá “náa asamblea”, ga̱jma̱a̱ xúʼko̱ má mangáanʼxo naʼni rí makuwáanʼxo gagi rí nduyamajkuíí Jeobá xó má mbiʼi kiejunʼ rígi̱ náa nawáanʼ gajmiáxo a̱ngia̱xoʼ (Salmo 26:12, nota; 111:1). Náa asamblea rígi̱ naʼni rí mambáxaxo gajmiáxo eʼwíínʼ a̱ngia̱xoʼ bi̱ naguwáʼ náa i̱ʼwáʼ congregación ga̱jma̱a̱ asndu bi̱ naguwaʼ náa i̱ʼwáʼ xuajin mba̱ʼu̱. Índo̱ naʼni tikhu mbiʼi nupheʼtsoxo mbá kambáxaxo náa asamblea, ma̱ngaa nandoo nambáxaxo májánʼ gajmiáxo a̱ngia̱xo (Hechos 2:42). Ikhí ndu̱ya̱a̱xo xú káʼnii rí nandaxoʼ kuyamijna̱ naʼni rí mambáxaxoʼ májánʼ gajmiáxo a̱ngia̱xo bi̱ kuwa náa xúgíʼ tsu̱du̱u̱ numbaaʼ (1 Pedro 2:17).

Naʼni majmañaxoʼ itháan Ajngá rawunʼ Dios. Xa̱bu̱ israelitas nimbáñun índo̱ nikruʼu̱u̱n rí niwaʼsngúún dí na̱ʼkha̱ raʼthí náa Escrituras (Nehemías 8:8, 12). Ikháanʼxo ndu̱ya̱a̱ dí raʼkhá tháán gíʼdoo numuu rí ejmañaxoʼ náa asamblea. Mámbá rí nanújngoo nagájnuu náa Biblia. Nanújngoo discurso rí gíʼdoo wéñuʼ numuu ga̱jma̱a̱ demostración náa nawaʼsngáxo xú káʼnii gíʼmaa muʼni rí nandoo Dios. Ma̱ngaa, naxnáxoʼ tsiakii rí mudxáwiinxo xú káʼnii tikuin a̱ngia̱xoʼ niʼngu̱u̱n niraʼní xkujndu rí xú káʼnii kuwa cristianos rí mbiʼi xúgi̱ rí ñajunʼ mingíjyúu. Náa asamblea dí ajtsú mbiʼi nanújngoo kixnaxe̱ ndaʼya náa naguwunʼ xtíin rí nijmún nákha wajyúúʼ náa naʼni mbuʼyáá rí asndu xóo gajkhun rí xtáa rarígá rí nagájnuu náa Biblia ga̱jma̱a̱ naʼni rí mambáyaxoʼ rí ndi̱ya̱a̱. Ga̱jma̱a̱ náa asamblea rí narígá kúwi̱i̱n bi̱ najngún iyááʼ bi̱ nandún musngajma rí nixnaximijna̱ náa inuu Dios.

• Náa numuu rí nakuwáanʼxo gagi wéñuʼ índo̱ nagimbáanʼxo náa asamblea rá.

• Xú káʼnii gambayaaʼ á mu na̱dxu̱ʼ náa asamblea ndrígáxo rá.