Asndu nákha wajyúúʼ, Jeobá nandoo rí xa̱bu̱ bi̱ kuwa náa mbá guʼwá magimbíin mu muni itháan gujkhuʼ fe ndrígu̱ún ga̱jma̱a̱ mu mambaxúún itháan májánʼ mámbíin rí ikhiin (Deuteronomio 6:6, 7). Ikha jngó, bi̱ nutaraʼa numuu Jeobá nuríyaʼxo mbó mbiʼi rí mbá xmáná mu mbuyamajkuííxo Jeobá mbá guʼwáanʼ, náa ma̱ndoo makuwáanʼxo májánʼ índo̱ munigajmaa dí na̱ʼkha̱ náa Ajngá rawunʼ Dios rí mambáyaxoʼ mámbáa rí ikháanʼxo. Asndu á mu xtáa mbáwíi mbáa xa̱bu̱ ma̱ndoo majmuu májánʼ awan rí niríyaʼ mu mbayáaʼ mbaʼyoo itháan ga̱jma̱a̱ numuu Dios.

Nindxu̱u̱ mbóo mbiʼi rí ma̱ndoo muʼguanú itháan mijngii náa Jeobá. “Ahuaʼ cani naʼ inu Dios [...], ga Ica maxta mijŋgui naʼ icanʼla.” (Santiago 4:8.) Nuniʼnííʼ itháan Jeobá índo̱ najmañulúʼ rí xú káʼnii xa̱bu̱ nindxu̱u̱ ga̱jma̱a̱ mbuʼyáá rí niʼni á mu ikháanʼ nuraxnuu Ajngá rawunʼ. Rígá mbá rí matani mu xáʼniaʼ mingíjyúu matanigajmaa gajmiáanʼ bi̱ kuwa náa guʼwáaʼ, rígi̱ nindxu̱u̱ rí matraxnuu gakhi̱i̱ Biblia, ma̱ndoo matani xó má awan rí nitríyaʼ índo̱ natatsigajmaa náa reunión Xóo kúwi̱i̱n ga̱jma̱a̱ xóo Etaraʼa Cristianos. Bi̱ kúwi̱i̱n náa mbá guʼwíín ma̱ndoo muraxnuu mámbíin rí ikhiin; nda̱wa̱á ma̱ndoo muthi ndiéjunʼ ñajunʼ rí nijmañún náa Escrituras.

Naʼni rí mambaxúún itháan májánʼ bi̱ kúwi̱i̱n náa mbá guʼwíín. Xa̱biya̱ bi̱ gíʼdaa a̱ʼgiu̱u̱ ga̱jma̱a̱ a̱ʼgu̱ bi̱ gíʼdaa ajmbio̱o̱, xúʼko̱ má xa̱bu̱ bi̱ guaʼdiin e̱ji̱n ga̱jma̱a̱ e̱ji̱n, naʼni rí mambaxúún májánʼ mámbíin rí ikhiin índo̱ nunigajmaa̱ Biblia mbá xúgínʼ bi̱ kuwa náa mbá guʼwá. Rígi̱ gíʼmaa manindxu̱u̱ náa makuwa gagi ga̱jma̱a̱ tsímáá, mbóo mbiʼi rí guáʼthi̱i̱n munigajmaa xúgínʼ bi̱ kuwa náa mbá guʼwá. Asndu náa ma tsiguʼ ejñala, ikháanʼ ma̱ndoo mbuyáaʼ rí eʼkha̱ raʼthí náa i̱yi̱i̱ʼ La Atalaya ga̱jma̱a̱ ¡Despertad! o ata̱ʼa̱ʼ náa ináa ndríguxuʼ rí rígá náa Internet, jw.org/jw-tln. Mbáa ikháanʼla nandalaʼ mutha xkujndu rí guáʼdáá ejñalaʼ náa guʼwá nisngáa ga̱jma̱a̱ xú káʼnii gándoo gúraʼní. Lá ma̱ndoo ma̱ta̱ya̱a̱ programa ndrígóo JW Broadcasting (tv.pr418.com) ga̱jma̱a̱ mutamíjná rí ndíyala ráʼ. Ma̱ndoo muni ajmúú cántico rí muni ajmúú náa nagimbáanʼxo ga̱jma̱a̱ nda̱wa̱á rí niguambála ma̱ndoo muphu asndu ndiéjunʼ má rí gáʼndalá o muwa̱a̱n asndu ndiéjunʼ má rí gáʼndalá.

Rígi̱ ni̱ndxu̱u̱ mbóo mbiʼi kiejunʼ rí nuríyaʼxo mámbá xmáná mu mbuyamajkuííxo Jeobá mbá xúgiáanʼxo, rígi̱ naʼni rí maniguxo munigajmaa Ajngá rawunʼ, ga̱jma̱a̱ ikhaa maʼni tsajkurámááʼ tsiakii rí nuʼni (Salmo 1:1-3).

• Náa numuu rí nuriyaʼxo mbiʼi mu mbuyamajkuííxo Dios mbá guʼwáanʼ rá.

• Ndiéjunʼ gándoo muni xa̱bu̱ bi̱ guaʼdiin e̱ji̱n mu índo̱ gúnigajmaa makuwa tsímáá xúgínʼ rá.