Na̱nguá eʼñuu á mu na̱jkuá rajkuaxo náa tapho̱o̱ xaxi o na̱nguá eʼñuu á mu naxnúu ruʼwa, naʼni wéñuʼ mijkha, naʼni wéñuʼ miguwan, bi̱ nutaráʼaxo numuu Jeobá na̱nguá eniʼñáaʼxo ra̱jkuá náa nagimbáanʼxo. Náa numuu rí nuʼni mbá tsiakii rí magimbáanʼ gajmiáxo a̱ngia̱xo maski ajndu kuaʼdááxo xkujndu o maski ajndu naʼni néʼngaxo rí niñejunʼ rá.

Nambáyaxo muraʼní xkujndu. Pablo niʼthí rí xú káʼnii guʼni gajmiálo a̱ngia̱lo bi̱ nagimbáanʼ gajmiálo: “Giʼmaʼlu ri mbuʼya ri xujaʼni mago mumbañu su iŋguaniʼhuin xabu” (Hebreos 10:24). Rígi̱ nandoo gáʼthi rí “mundxaʼwáá májánʼ wéñuʼ edxu̱lúʼ”. Xóo muʼthá imbo̱o̱ ajngáa, apóstol naʼthúlúʼ rí muʼninumijná mámbáa rí ikháanʼ, rí maxmiéjuanlo kuʼñúún eʼwíínʼ. Índo̱ nuniʼnúnʼ eʼwíínʼ bi̱ nagún náa congregación, na̱jkuánu nduʼyáá rí ikhiin niraʼní xkujndu xó má ikháanʼ ga̱jma̱a̱ asndu mambáyaloʼ muraʼní xúʼko̱ mangáanʼ.

Naʼni rí mambáxaxo májánʼ má xúʼko̱ gajmiáxo a̱ngia̱xo. Náa nagimbáanʼxo kúwáanʼxo bi̱ phú gajkhun nambáxaxo májánʼ. Ma̱ngaa rígá imbo̱o̱ mbiʼi rí nagimbáanʼxo mu mutsíinxo o muni asndu ndiéjunʼ má rí eyaxoʼ. Xú káʼnii embáyaxoʼ rí makuwáanʼ gajmiáxo eʼwíínʼ rá. Nambáyaxo mbuyami̱jna̱ dí ra̱ʼkhá tháán gíʼdoo numuu mámbáa, ga̱jma̱a̱ rígi̱ naʼni rí mambáxaxoʼ itháan májánʼ. Índo̱ a̱ngia̱xoʼ nuraʼní xkujndu, ikháanʼxo numbáñuun nacha̱ numuu rí nigíʼdi̱i̱xo nimbáxaxo májánʼ (Proverbios 17:17). Índo̱ nambáxaxo gajmiáxo xúgínʼ bi̱ kuwa náa congregación, nusngajmá rí naxmiéjuanʼxo kuyamíjna̱ (Romanos 12:10).

Nutha̱nʼxo mataʼñíinʼ xa̱bu̱ bi̱ mambáxaʼ gajmiáanʼ, bi̱ nuni xó má eyoo Dios. Xa̱bu̱ buʼko̱ mataxkamiin náa xa̱bu̱ bi̱ nutaraʼa numuu Jeobá. Xátatsiʼñáanʼ rí nimbá marikhaʼ rí mi̱dxu̱ʼ náa nagimbáanʼxo.

• Náa numuu dí nambáyaxoʼ rí magimbáanʼ gajmiáxoʼ a̱ngia̱xoʼ bi̱ kuwa náa congregación rá.

• Nguáná gaʼndaʼ matatsiʼnuu congregación ndrígáxo rá.