Nákha nikuwa timbíin cristianos, náa nagimbíin nini ajmúú, nitajkáan ga̱jma̱a̱ niraxnuu ma̱ngaa ninigajmaa májánʼ wéñuʼ Escrituras (1 Corintios 14:26). Índo̱ ikháánʼ gídxúʼ náa nagimbáanʼxo ma̱ta̱ya̱a̱ rí xúʼko̱ káʼnii enixo mangáanʼ.

Nawaʼsngáa xó má eʼkha̱ raʼthí náa Biblia. Mámbá sábado o domingo, xúgíʼ congregación nagimbúun mu mudxawíín mbá discurso rí nagájnuu náa Biblia, rígi̱ ndajyúuʼ 30 minutos náa nasngájma xú káʼnii nambanii rí eʼthí Escrituras ga̱jma̱a̱ numalóʼ ikháanʼ ma̱ngaa mbiʼi rí kuwáanʼ. Najuiʼthún bi̱ trigi̱i̱n ikhí rí magun ruraxnuu Biblia ndrígu̱ún. Nda̱wa̱á Nunigajmaa̱ revista La Atalaya, mbá hora, nawaʼthún bi̱ kuwa náa awúun congregación rí muriʼña̱a̱ graxe̱ rí na̱ʼkha̱ náa revista La Atalaya rí moʼnegajmaa xmáná rúʼko̱. Rígi̱ nasngájma mbaʼa enii rí xú káʼnii muʼgíiʼ makuwáanʼ ga̱jma̱a̱ consejo ndrígóo Biblia. Ikhaa má revista rígi̱ nunigajmaa̱ itháan rí mbá 110,000 congregación dí rígá náa xúgíʼ tsu̱du̱u̱ Ku̱ba̱ʼ.

Nambáyaxoʼ mu musngáaxo itháan májánʼ. Ma̱ngaa nagimbáanʼxo imbo̱o̱ mbiʼi rí mbá xmáná náa nanújngoo ajtsú enii rí najuiʼsngáa, rí nagumbiʼyuu Xóo kúwi̱i̱n ga̱jma̱a̱ xóo Etaraʼa Cristianos, rí kaʼyoo náa I̱yi̱i̱ dí najmulú náa reunión Xóo kúwi̱i̱n ga̱jma̱a̱ xóo Etaraʼa Cristianos rí nagájnuu mámbá gu̱nʼ. Timbá rí nanújngoo, mbiʼyuu “Giʼdoo numuu rí na̱ʼkha̱ náa Biblia”, nambáyulúʼ makru̱ʼu̱lú lájuíin Santas Escrituras rí congregación niguxnuu má. Nda̱wa̱á náa “Ganindxu̱lú mbáa bi̱ naʼsngáa májánʼ”, ikhí narígá demostración rí nasngájma xú muʼthúún xa̱bu̱ numuu Biblia. Mbá consejero maʼthúlú ndiéjunʼ gúʼni mu muraxnuu itháan májánʼ ga̱jma̱a̱ muʼsngáa itháan májánʼ (1 Timoteo 4:13). Nda̱wa̱á kayuʼ, náa “Xóo kuwáanʼ bi̱ ni̱ndxu̱lú cristianos”, nduʼyáá xú káʼnii guʼnimbánii xtágabu ndrígóo Biblia náa vida ndrígúlú. Náa níʼkhóo rígi̱, makru̱ʼu̱lú itháan májánʼ Biblia índo̱ maguma graxe̱.

Índo̱ gídxúʼ náa nagimbáanʼxo ma̱ta̱ya̱a̱ dí ra̱ʼkhá tháán májánʼ esngáxoʼ ga̱jma̱a̱ numuu Biblia (Isaías 54:13).

• Ndiéjunʼ gátadxuun índo̱ gídxúʼ náa nagimbíin bi̱ nutaraʼa numuu Jeobá rá.

• Nguáná gánigua̱ʼ matagíʼdi̱i̱ mi̱dxu̱ʼ náa nagimbáanʼxo rá.