Mámbá tsiguʼ, bi̱ nutaráʼaxo numuu Jeobá nuráwíi ga̱jma̱a̱ nonexo mawiʼtaraʼa mbaʼa wéñuʼ Biblia ga̱jma̱a̱ i̱ʼwáʼ i̱yi̱i̱ʼ, i̱yi̱i̱ʼ rígi̱ tségujuaxo; ga̱jma̱a̱ nonexo Guʼwá náa nagimbáanʼxo ma̱ngaa mbaʼa sucursal, ga̱jma̱a̱ nonexo náa ndayóoʼ maguma̱a̱; ma̱ngaa numbáñun ga̱jma̱a̱ mbújkha̱a̱ mbaʼin bi̱ kuwa náa Betel ga̱jma̱a̱ misioneros, ga̱jma̱a̱ numbáñunxu a̱ngia̱xoʼ bi̱ nigíʼniin gamiéjun. Náa egájnuu mbújkha̱a̱ mu miʼninumáá xúgíʼ rígi̱ rá.

Tsinda̱ʼa̱xo diezmo ni má tsextumin xa̱bu̱ muxna cooperación, ni tsenda̱ʼa̱xo mbújkha̱a̱. Maski ajndu najmaa wéñuʼ mbújkha̱a̱ rí miʼtáraʼa, mu na̱nguá endu̱ʼu̱nxo mbújkha̱a̱ xa̱bu̱. Niʼni itháan rí mbá ciento tsiguʼ, revista La Atalaya niʼthí náa ra̱gajma número dí ndu̱ya̱a̱xo májánʼ rí Jeobá embáyaxoʼ. Ma̱ngaa niʼthí: “Nimbá miʼtsú xángruigo̱o̱ randa̱ʼa̱ mbújkha̱a̱ [organización ndrígáxo] náa xa̱bu̱”. Ga̱jma̱a̱ xúʼko̱ má erígá (Mateo 10:8).

Mbújkha̱a̱ rí najmuxo ñajunʼ rí nuxna xa̱bu̱ rí nagájnuu asndu náa a̱jkiún. Mbaʼin xabu̱ nanigunʼ rí nusngáaxo ga̱jma̱a̱ numuu Biblia ikha jngó nuxna mbújkha̱a̱ rí nagájnuu náa a̱jkiún. Ikháanʼxo bi̱ nutaráʼa numuu Jeobá nuriyáʼxo mbiʼi, tsiakii ga̱jma̱a̱ mbújkha̱a̱ ndrígáxo mu munixo rí nandoo Dios náa xúgíʼ tsu̱du̱u̱ Ku̱ba̱ʼ (1 Crónicas 29:9). Guʼwá náa nagimbáanʼxo ga̱jma̱a̱ náa asamblea ndríguxo rígá caja náa ma̱ndoo murajkuáa mbújkha̱a̱ xúgínʼ bi̱ gaʼndún. Rígi̱ ma̱ngaa ma̱ndoo maguma asndu náa ináa Internet ndrígúxu̱ jw.org. Mbújkha̱a̱ rí nuxna xa̱bu̱ na̱ʼkha̱ itháan náa xa̱bu̱ bi̱ migíníin, bi̱ ni̱ndxu̱ún xóo aʼgú xuáʼa̱ bi̱ ndayóoʼ bi̱ niʼni mba̱a̱ Jesús numuu rí nixná a̱jma̱ mbújkha̱a̱ majkhaʼ náa arca ndrígóo templo (Lucas 21:1-4). Asndu tsáa ma̱ndoo mayéxi̱i̱ mbújkha̱a̱ mu maxná má xúʼko̱ “xuri caya aʼtiun maxna” (1 Corintios 16:2; 2 Corintios 9:7).

Ndu̱ya̱a̱xo májánʼ rí Jeobá gaxkaxi̱i̱n xa̱bu̱ bi̱ nandún muni mba̱a̱ ga̱jma̱a̱ rí guáʼdáá mu muñambáá má xúʼko̱ náa ñajunʼ ndrígóo Reino ga̱jma̱a̱ xúʼko̱ mambanúu rí eyoo maʼni Jeobá (Proverbios 3:9).

• Náa numuu rí mixtiʼkhu organización ndrígáxo ga̱jma̱a̱ náa i̱ʼwáʼ religión rá.

• Xú káʼnii ejmaa mbújkha̱a̱ rí nuxna ga̱jma̱a̱ xúgíʼ a̱jkiún rá.