Mba̱yu̱ʼ tsiguʼ, bi̱ nutaráʼaxo numuu Jeobá, nonexo imprimir, najmaxoʼ ga̱jma̱a̱ nuni mawiʼtaraʼa Biblia. Mú nda̱wa̱á ndi̱ya̱a̱xo rí ndayóoʼ magajnúu imba̱ nuxi̱ʼ Biblia rí xáʼñun mingíjyúu wéñuʼ majmañún xa̱bu̱ ku̱ma̱ rí phú gajkhun, rí nandoo Dios muni xúgínʼ xa̱bu̱ numbaaʼ (1 Timoteo 2:3, 4). Ikha jngó, nákha̱ tsiguʼ 1950 nigíʼdi̱i̱xo nirawíi tapha Biblia náa ajngáa inglés rí xú káʼnii kiʼthá xúgi̱, la Traducción del Nuevo Mundo, ga̱jma̱a̱ nigumariyaʼ xó má gíʼmaa maʼni náa itháan rí mbá 130 ajngáa.

Ndiyóoʼ mbá Biblia rí xáʼni mingíjyúu makruaʼalo. Mbaʼa ajngáa naxtiʼkhuu índo̱ na̱jkha̱ ranújngoo tsiguʼ ga̱jma̱a̱ náa mbaʼa Biblia na̱ʼkha̱ ajngáa rí nánguá ejmúún rí naʼni mingíjyúu makruaʼaʼ. Ma̱ngaa, nikujma̱a̱ i̱yi̱i̱ʼ rí nigumarámáʼ nákha̱ wajyúúʼ rí nambanii ga̱jma̱a̱ rí phú nigumarámáʼ ginii ga̱jma̱a̱ naʼthí kaʼwu, rígi̱ naʼni rí makruaʼalo itháan májánʼ ajngáa hebreo, arameo ga̱jma̱a̱ griego.

Ndiyóoʼ rí miʼtháwíi kaʼwu xó má niʼthí Dios. Xa̱bu̱ bi̱ nurawíi ajngáa xándoo muriʼkhu̱u̱ rí eʼthí náa ajngá rawunʼ Dios; gíʼmaa muni xó má eʼthí texto rí phú nigumarámáʼ ginii. Mú, mbaʼa Santas Escrituras rí nigájnuu na̱nguá ejmuu mbiʼyuu Dios, Jeobá.

Ndiyóoʼ mbá Biblia rí maʼni mba̱a̱ bi̱ niʼthí maguma (2 Samuel 23:2). Náa i̱yi̱i̱ʼ rí nigumarámáʼ nákha̱ wajyúúʼ nijmaa itháan maʼni 7,000 nuthu mbiʼyuu Jeobá, ikhaa rígi̱ nigumarámáʼ náa Traducción del Nuevo Mundo, xó má ekujmaa náa xkri̱da rí kama agoo (Salmo 83:18). Nda̱wa̱á rí mba̱yu̱ʼ wéñuʼ tsiguʼ ninigajmaa Biblia, asndu naniguaʼ índo̱ natraxnuu numuu rí naʼthí kaʼwu xó má endxa̱ʼóo edxu̱u̱ Dios. Á mu rí ikháánʼ xtaʼdáá la Traducción del Nuevo Mundo o na̱nguá xtaʼdáá náa ajngáaʼ, nutha̱nʼxoʼ rí matríyaʼ mbiʼi matraxnuu má xúʼko̱ Ajngá rawunʼ Jeobá mámbá mbiʼi rí nanújngoo (Josué 1:8; Salmo 1:2, 3).

• Náa numuu ndi̱ya̱a̱xo rí ndayóoʼ magajnúu imbo̱o̱ nuxi̱ʼ Biblia rá.

• Ndiéjunʼ gíʼmaa muni tsejtsí mbiʼi xúgínʼ bi̱ nandún majmañún rí eyoo Dios muni xa̱bu̱ rá.