Lá nitayáá xtiʼkhu rí tima náa folleto rígi̱ dí ra̱ʼkhá tháán májánʼ xtíñún bi̱ nutaraʼa numuu Jeobá índo̱ nagún náa nagimbíin ráʼ. Náa numuu rí nuñewa̱a̱nxo wéñuʼ xú káʼnii xtíin rí nugíiʼxo ga̱jma̱a̱ xú káʼnii eniratamijnaxo rá.

Mu musngajmá gamajku náa Dios. Dios na̱nguá eʼyoo rí xú káʼnii ñajuanʼlo rí mbajnii (1 Samuel 16:7). Índo̱ nagimbáanʼxo mu mbuyajmajkuííxo Dios, rí phú nandaxoʼ rí musngajmá gamajku náa ikhaa ga̱jma̱a̱ náa a̱ngia̱xo. Á mu nandaloʼ mu̱ʼgua̱ náa inuu mbáa juez, mbáa asndu maʼndaloʼ muʼgíiʼ xtíñalo rí itháan májánʼ o ga̱jma̱a̱ rí muʼni kaʼumijnalo mu musngajmá gamajku náa ñajunʼ rí gíʼdoo. Xúʼko̱ kaʼnii má gíʼmaa makujmáanʼlo índo̱ najkua náa nagimbáanʼxo numuu rí xúʼko̱ nusngajmá rí gíʼdoo wéñuʼ numuu Juez bi̱ xtáa náa xúgíʼ tsu̱du̱u̱ ku̱ba̱ʼ, Jeobá Dios, xó má náa nduʼyamajkuííxo (Génesis 18:25).

Mu musngajma rí nakuwáanʼxo ga̱jma̱a̱ rí najmañaxoʼ. Náa Biblia naʼthúún cristianos: ‹Atayáá májánʼ xú káʼnii mataʼgíiʼ xtíñaaʼ ga̱jma̱a̱ atatsaʼwáá edxa̱ʼ xú káʼnii ñajunʼ xtíin rí gátraʼwí mataguʼwánʼ› (1 Timoteo 2:9, 10). Atayáá májánʼ xú káʼnii mataʼgíiʼ xtíñaaʼ nandoo gáʼthi dí ragíʼmaa muʼgíiʼ nimbá xtíin rí ní xáʼni makujmaa xóo xa̱bi̱i̱ Dios xó má xtíin rí xaʼ wéñuʼ, xtíin rí nitho, xtíin rí ma̱ja̱nʼ wéñuʼ, mbá xtíin rí chíjua̱ wéñuʼ asndu má ragíʼmaa muʼgíiʼ xtíin rí nakutaʼa. Ma̱ngaa, atatsaʼwáá edxa̱ʼ xú káʼnii ñajunʼ xtíin ri gátraʼwí mataguʼwánʼ nandoo gáʼthi rí gíʼmaa mbuʼyáaʼ mbá xtíin mitsaan muʼgíiʼ, ragíʼmaa maʼni mbá xtíin xkawiʼ. Ma̱ndoo muraʼwíi mbaʼa enii xtíin rí maguʼwanlo xóo eʼthé náa Biblia. Rí nakujmáanʼ májánʼ ga̱jma̱a̱ xtíñálo ‹nasngájma rí májánʼ nindxu̱u̱ rí naʼsngáa Dios bi̱ naʼni Káwáánʼ› ga̱jma̱a̱ rí nuʼni mba̱a̱ (Tito 2:10; 1 Pedro 2:12). Á mu ikháanʼ najkua kijmaratáanʼ náa nagimbáanʼ maʼni rí xa̱bu̱ mundxaʼwamíjna rí májánʼ ma̱ngaa rí xú káʼnii eyamajkuíí Jeobá.

Mu maʼni mikaʼwáanʼ ga̱jma̱a̱ makujmáanʼ májánʼ tseyóóʼ má mbá xtíin minumuu wéñuʼ. Ikha jngó, maski ajndu na̱nguá xtaʼdáá mbá xtíin dí májánʼ wéñuʼ ma̱ndoo mi̱dxu̱ʼ náa Guʼwá nagimbáanʼxo.

• Ndíjkha̱ rí gíʼdoo numuu rí xú káʼnii muʼgíiʼ xtíñálo índo̱ najkua náa mbuʼyamajkuíí Dios rá.

• Xú káʼnii ñajunʼ consejo rí naxnálo ikha índo̱ gúraʼwí xú káʼnii muʼniratamijná rá.