Náa guʼwá rí nduyamajkuííxo Jeobá nuxnambiʼíxo Guʼwá náa nagimbáanʼxo. Nutaxo xúgi̱ kaʼnii numuu rí ikhí ndu̱ya̱a̱xo i̱yi̱i̱ʼ rí nagájnuu náa Biblia rí naʼthí ga̱jma̱a̱ numuu Reino ndrígóo Dios, ikhaa rúʼko̱ rí phú niʼtaraʼa Jesús (Lucas 8:1).

Nindxu̱u̱ náa nduyamajkuíí gajkhun Dios náa xuajen. Asndu ikhí egájnuu awan mu miʼtáraʼa ajngáa rí májánʼ (Mateo 24:14). Mixtiʼkhu ñajunʼ náa guʼwá nagimbáanʼxo, tikhuu majkhaʼ o tikhuu mba̱ʼu̱ ga̱jma̱a̱ mixtiʼkhu rí xú káʼnii niguma, mu xúgíʼ guʼwá rígi̱ na̱nguá kijmaratáá wéñuʼ; náa mbaʼa guʼwá rígi̱ nawi̱i̱n itháan rí mbá congregación. Tikhuu tsiguʼ rí ninújngoo ninixo mbaʼa wéñuʼ guʼwá náa nagimbáanʼxo (nigájnuu awan rí naguma xóo mbá witsu rí mbá mbiʼi) xó má ejkha̱ raʼni mbaʼa congregación. Xú káʼnii enixo rígi̱ rá. (Mateo 19:26.)

Nandoo naguma rígi̱ numuu dí rígá mbá fondo rí nayéxi̱i̱ mbújkha̱a̱ rí nuxna xa̱bu̱. Mbújkha̱a̱ rí niwa̱a̱ nuxuʼmáxo náa sucursal rí kaʼyoo magruigú mu maxnatiʼña náa congregación bi̱ ndayóoʼ maʼni mbá nuxi̱ʼ guʼwá náa magimbíin o ndayóoʼ maʼni̱i̱ májánʼ guʼwá.

Xa̱bu̱ bi̱ nuni guʼwá rígi̱ tsíruma mbújkha̱a̱. Náa mbaʼa xuajin mba̱ʼu̱ niguma mbaʼa Grupo bi̱ Nuni Guʼwá náa nagimbáanʼxo. Xa̱bu̱ bi̱ kuwa náa equipo rígi̱ ga̱jma̱a̱ bi̱ na̱nguá endrigú mbújkha̱a̱ ga̱jma̱a̱ numuu ñajunʼ rí eni, nagún i̱ʼwáʼ congregación dí rígá náa xuajin mba̱ʼu̱, ma̱ngaa nagún náa i̱ʼwáʼ xuajin dí mitsinguánʼ wéñuʼ, mu muxna ikha náa ñajunʼ rí naguma ga̱jma̱a̱ musngúún xóo muñajunʼ bi̱ nutaraʼa numuu Jeobá bi̱ kuwa náa xuajin rúʼko̱. Náa i̱ʼwáʼ xuajin mba̱ʼu̱ kuwa a̱ngia̱xo bi̱ najmañún, ikhiin nuxna ikha náa kaʼñúún maguma o muni májánʼ guʼwá náa nagimbáanʼ. Maski ajndu kuwa mbaʼin a̱ngiu̱lú bi̱ najmañún xú káʼnii muni guʼwá ga̱jma̱a̱ nuruguambáá xa̱bu̱ bi̱ najmañún wéñuʼ muni i̱ʼwáʼ ñajunʼ, ikhiin tsíruma índo̱ nuni ñajunʼ rígi̱. Mbaʼin bi̱ nuñajunʼ náa guʼwá magimbáanʼxo ni̱ndxu̱ún bi̱ nagimbúun ikhí. Espíritu ndrígóo Jeobá ga̱jma̱a̱ tsiakii rí eʼni xuajñu nandoo naʼni rí marigá rígi̱ (Salmo 127:1; Colosenses 3:23).

• Náa numuu rí nuxna mbiʼíxo Guʼwá náa nagimbáanʼ náa eyamajkuííxo Jeobá rá.

• Xú káʼnii eʼngaxo eni Guʼwá náa nagimbáanʼxo náa xúgíʼ tsu̱du̱u̱ numbaaʼ rá.