Á MU xúgi̱ gáʼkha̱ mbáa xa̱bu̱ bi̱ itháan mba̱yi̱ʼ wéñuʼ rí edxu̱u̱ gártumuu asndu náa xpóo guʼwáaʼ, ndiéjunʼ gátatsaʼwaminaʼ rá. ¡Rí ikhaa ni̱ndxu̱u̱ mbáa xa̱bu̱ mba̱a̱ wéñuʼ! Nákha wajyúúʼ nikuwa xa̱bu̱ xúʼko̱ kaʼnii náa tsu̱du̱u̱ Ku̱ba̱ʼ. Náa Biblia nasngájma rí anu̱ún ninindxu̱ún ángeles bi̱ nikuwa mekhuíí. Mú, xú káʼnii nindoo nirígá rúʼko̱ rá.

Garmáʼáan a̱jkia̱nʼ, Satanás ángel xkawiʼ niʼni marigá wéñuʼ xkujndu. Asndu nigíiʼ maʼni rí ángeles ndrígóo Dios manindxu̱ún ra̱míjínʼ. Nda̱wa̱á, tikhun ángeles nigi̱ʼdi̱i̱ nidxawíín rí niʼthí Satanás. Niniñanʼ ñajunʼ rí Dios nixnúún muni̱ mekhuíí. Niguwáʼ náa tsu̱du̱u̱ Ku̱ba̱ʼ ma̱ngoo nirtaximi̱jna̱ xóo xa̱bu̱ numbaaʼ. Natayáá náa numuu ráʼ.

Náa Biblia naʼthí numuu rí ikhiin ndiñún gu̱ʼu̱ mitsiʼñíin náa tsu̱du̱u̱ Ku̱ba̱ʼ ma̱ngoo nindúún makuwíin gajmiún. Ikha jngó niwájtaa nidiin gu̱ʼu̱. Náa Biblia naʼthí dí rígi̱ ninindxu̱u̱ ra̱májánʼ, numuu rí Dios niʼnii ángeles mu makuwá mekhuíí.

Índo̱ rí ángeles gajmiún guʼñún niguáʼdiin e̱jñún, mbá mixtiʼkuiin kayuʼ ninindxu̱ún. Mbáa nákha nigumiin na̱nguá kujmiin rí mixtiʼkun. Mú índo̱ ikhiin nigún raganuu wéñuʼ, ma̱ngoo ni̱jkha̱ raʼni mixkujinʼ asndu índo̱ ninindxu̱ún xa̱bu̱ mba̱ʼu̱u̱n.

Xa̱bu̱ mba̱ʼu̱u̱n buʼko̱ ninindxu̱ún ra̱míjínʼ. Ma̱ngoo numuu rí ninindxu̱ún mba̱ʼu̱u̱n ga̱jma̱a̱ rí mixkujinʼ wéñuʼ, nuniu̱u̱n dí xkawiʼ xa̱bu̱. Nitsudíín xa̱bu̱ manindxu̱ún ra̱míjínʼ xóo má ikhiin.

Nikháñu má Enoc, mú nixtáa mbáa xa̱bu̱ májánʼ a̱jkiu̱u̱n náa tsu̱du̱u̱ Ku̱ba̱ʼ. Xa̱bu̱ bugi̱ nigu mbiʼyuu Noé. Ikhaa niʼni má xúʼko̱ rí Dios nindoo.

Mbá mbiʼi Dios niʼthúu̱n Noé rí ni̱jkha̱nú má mbiʼi rí Ikhaa gáʼni gámbíin xúgínʼ xa̱bu̱ xkawiinʼ. Mú Dios gáʼni kríyaa Noé ga̱jma̱a̱ bi̱ kuwa náa goʼwóo mangiin mbaʼin wéñuʼ xujkhúʼ. Guʼyáá xú káʼnii niʼni.