LOT gajmíi̱n bi̱ kuwa náa goʼwóo nikuwa mbóó gajmiún Abrahán náa ku̱ba̱ʼ ndrígóo Canaán. Mbóo mbiʼi Abrahán niʼthúu̱n Lot: ‹Gi̱i̱ nda̱a̱ wéñuʼ ku̱ba̱ʼ mu makuwíin xúgínʼ xujkiúluʼ. Mbá péñu, muʼniñámi̱jna̱. Á mu rí ikháánʼ na̱dxu̱ʼ mbá níʼkhá, ikhúúnʼ maʼgá i̱mba̱ níʼkhá›.

Lot ndiʼyoo ku̱ba̱ʼ. Ndiʼyoo mbá níʼkhóo ku̱ba̱ʼ rí májánʼ wéñuʼ, dí rígá iyaʼ ga̱jma̱a̱ dí rígá wéñuʼ iná mu̱phu̱ xujkiúu. Náa mbayuuʼ ndrígóo Jordán. Ikhaa jngó, Lot ni̱jkha̱ kagu̱u̱n bi̱ kuwa náa goʼwóo ga̱jma̱a̱ xujkiúu ikhí. Nda̱wa̱á ni̱ni̱ guʼwún náa xuajin Sodoma.

Xa̱bu̱ Sodoma ninindxu̱ún mixkawiinʼ wéñuʼ. Rígi̱ niʼni rí makiʼnáa Lot, numuu rí ikhaa ninindxu̱u̱ xa̱bu̱ májánʼ. Dios nikiʼnáa ma̱ngaa. Nda̱wa̱á kayuʼ, Dios nikunguinʼ a̱jmi̱i̱n ángeles mu muthán Lot rí maʼnigámbáa Sodoma ga̱jma̱a̱ xuajin Gomorra dí gíiʼ mijngii ikhí, numuu rí xa̱bu̱ ninindxu̱ún mixkawiinʼ wéñuʼ.

Ángeles nitháán Lot: ‹¡Nacha̱! ¡Agajnáaʼ gajma̱ʼ a̱ʼgia̱ʼ gajmiáanʼ nájmii̱n ejñaʼ waʼxaʼ!›. Lot gajmíi̱n bi̱ kuwa goʼwóo ndijñúnʼ wéñuʼ, ikha jngó ángeles nirajtun ñawúúnʼ ma̱ngoo nirawíín náa xuajin. Ikhú mbáa ángel niʼthí: ‹¡Gagayálaʼ ga̱jma̱a̱ numalaʼ! Xúyexi kidíiʼ. Gagayálaʼ náa xaná, mu xakháñalaʼ›.

Lot gajmíi̱n waʼxiooʼ ninimbu̱ún nigájnun ragañun náa Sodoma. Na̱nguá niguájun nimbá chíʼgíʼ, ga̱jma̱a̱ túyexi kidíiʼ. Mú a̱ʼgiu̱u̱ Lot táʼnimbo̱o̱. Índo̱ nitsíngunʼ má chímba̱a̱ náa Sodoma, niwi̱ji̱ niyexi kidíiʼ. Ikhú a̱ʼgiu̱u̱ Lot nirtaximínáʼ idú. Lá nandoo natayáá náa kiʼniriyaʼ ráʼ.

Rígi̱ ma̱ndoo majmañulúʼ mbá ikhoo májánʼ: Rí Dios naʼnikáwíin bi̱ nunimbu̱ún, mú bi̱ tsénimbu̱ún nakháñun.