JOSÉ nánguá e̱ʼngo̱o̱ dí maʼthí tsáa ni̱ndxu̱u̱. Naʼthúún xúgínʼ xa̱bi̱i̱ rí magajníinla náa cuarto. Índo̱ rí ikhaa xtáa mbáwíi gajmíi̱n a̱ngui̱i̱n, José nagíʼdu̱u̱ nambiyaʼ. Nandoo nundxa̱ʼwáá edxu̱lúʼ rí asndu tsiánguá niʼniún a̱ngui̱i̱n José, numuu rí tséyaa náa numuu mbiyaʼ. Nda̱wa̱á ikhaa niʼthí: ‹Ikhúúnʼ ni̱ndxu̱ʼ José. Lá xóó xtáa anu̱ʼ ráʼ.›

Asndu tsiánguá niguanún a̱ngui̱i̱n rí asndu nándáa rí muthi. Namiñun. Mú José naʼthúún: ‹Gu̱ni̱ péñu, aguwaʼ kanuu›. Índo̱ egún kanuu, naʼthúún: ‹Ikhúúnʼ ni̱ndxu̱ʼ ndxájuala José, bi̱ nigujua̱a̱ náa Egipto›.

José naʼthúún má xúʼko̱ ga̱jma̱a̱ májánʼ: ‹Xuxna aʼkhámíjná numuu rí niguju̱u̱n gi̱i̱. Gajkhun rí Dios ni̱ndxu̱u̱ bi̱ nikuʼmún ma̱ʼkhá náa Egipto mu manikáwíin xa̱bu̱. Faraón niʼgiúnʼ rí mani̱ndxu̱ʼ Xa̱bu̱ Ñajunʼ náa xúgíʼ xuajin rígi̱. Ikha jngó aʼguaaʼla nacha̱ náa anu̱ʼ ma̱ngoo gutha̱a̱n dí nirígá. Ga̱jma̱a̱ gutha̱a̱n rí ma̱ʼkha̱ maxtáa gi̱i̱›.

Ikhú José nigíʼdu̱u̱ niguriʼin a̱ngui̱i̱n, ga̱jma̱a̱ niʼkhu chituʼ xúgínʼ. Índo̱ rí Faraón niʼdxuun rí a̱ngui̱i̱n José niguwáʼ, niʼthúu̱n José: ‹Gagún ku̱ñu̱u̱n carreta mu maguwáʼ ku̱ya̱a̱ ana̱la gajmíi̱n bi̱ kuwa náa goʼwóo. Maxnu̱u̱n ku̱ba̱ʼ rí itháan májánʼ dí rígá xúgíʼ Egipto›.

Ikhaa rúʼko̱ rí ni̱ni̱. Gi̱i̱ ma̱ndoo ma̱ta̱ya̱a̱ José rí xtáa raraxi̱i̱ anu̱u̱ índo̱ rí ikhaa ni̱ʼkha̱nú náa Egipto gajmíi̱n xúgínʼ bi̱ kuwa náa goʼwóo.

Jacob gajmíi̱n bi̱ kuwa náa goʼwóo niʼni mbaʼin wéñuʼ. Rí mbá xúgínʼ naʼni 70 índo̱ niguwáʼ gakuwa náa Egipto, rí asndu Jacob gajmíi̱n e̱ji̱i̱n ga̱jma̱a̱ e̱jín xíñiiʼ. Mú mangiin guʼñún nikuwa ikhí, mbáa asndu mbaʼin xa̱bi̱i̱ bi̱ numbayíí. Xúgínʼ bugi̱ nigi̱ʼdi̱i̱ nikuwa náa Egipto. Nigumbiʼñún israelitas, numuu rí Dios niriʼkhu̱u̱ nambiʼyuu Jacob ikhaa nixná mbiʼyuu Israel. Niguánu ninindxu̱ún xuajin kiejunʼ náa inuu Dios, xóo rí mbuʼyáá nda̱wa̱á.