¡ATAYÁÁ xtáa gíná, nándáa rí gíʼthu̱u̱n imbo̱o̱ dxámá bugi̱! Ikhaa ni̱ndxu̱u̱ José. A̱ngui̱i̱n ndiʼkhún nigujua̱a̱ náa xa̱bu̱ bi̱ nagún náa Egipto. Ikhí José muni̱i̱ xóo mbáa esclavo. Náa numuu dí nini̱i̱ raʼkhí kayuʼ tikhu a̱ngui̱i̱n José rá. Numuu rí nixígu̱u̱n kuyáá.

Anu̱ún ikhiin, Jacob, nindoo kaʼyoo wéñuʼ José. Nimajkuu itháan rí asndu niʼni mbá xtíin mbi̱jua̱ rí mitsaan. Índo̱ rí 10 a̱ngui̱i̱n bi̱ guanii ndiyáá rí Jacob nandoo kaʼyoo wéñuʼ José, nigi̱ʼdi̱i̱ nixígu̱u̱n kuyáá ga̱jma̱a̱ niguiñunʼ kuyáá. Mú nirígá imbo̱o̱ numuu rí niguiñunʼ kuyáá.

José nixnúu a̱jma̱ xnuʼndaa. Nájma̱ xnuʼndoo José ndiʼyoo rí a̱ngui̱i̱n nusmbati̱gu̱u̱n náa ikhaa. A̱ngui̱i̱n José niguiñunʼ kuyáá itháan índo̱ niʼthún rí nigundaa.

Mbóo mbiʼi, índo̱ rí a̱ngui̱i̱n José bi̱ guanii kuwa ruñún mugiu̱u̱ anu̱ún, Jacob na̱ndo̱ʼo̱o̱ José rí maʼga̱ gáʼñun xú káʼnii kúwi̱i̱n. Índo̱ a̱ngui̱i̱n nduyáá rí José xtáa ra̱ʼkha̱, tikhun dí ikhiin nithi: ‹¡Guxíyáalu!›. Mú Rubén bi̱ giʼnii, naʼthí: ‹¡Na̱nguá, xúni̱ rúʼko̱!›. Rí ni̱ni̱, nidama̱ʼa̱a̱n José náa mbá pusu rí mixooʼ. Ikhú natri̱gi̱i̱n mu munimbaníí káʼnii gúní gajmiún ndxájun José.

Índo̱ rí kuwa runi rígi̱ naguwáʼ tikhun ismaelitas. Judá naʼthúún bi̱ tikhu a̱ngui̱i̱n: ‹Mugujua̱a̱lú náa xa̱bu̱ ismaelitas›. Ikhaa rúʼko̱ rí ni̱ni̱. ¡Nigujua̱a̱ José ga̱jma̱a̱ 20 mbújkha̱a̱ plata! ¡Raʼkhí kayuʼ ni̱ni̱ ga̱jma̱a̱ tagáwinʼ a̱jkiu̱ún kuyáá!

Ndiéjunʼ gútháán anu̱ún a̱ngui̱i̱n José rá. Nuxi̱ya̱a̱ mbáa tsu̱jtuunʼ ga̱jma̱a̱ nuxuma̱ʼ mbaʼa nuthu xtíñuu José dí mitsaan náa eʼdxuu tsu̱jtuunʼ. Ikhú nuyegun xtíñuu náa anu̱ún Jacob ma̱ngoo nuthi: ‹Ndiya̱a̱xu rígi̱. Atayáá, á mu rí ikhaa xtíñuu José›.

Jacob ndaʼyoo rí ikhaa xtíñuu, ikhú eʼthí. ‹Mbáa xujkhú xáná nixíyáa José.› Ikhaa rúʼko̱ rí nindúún a̱ngui̱i̱n José rí mandxaʼwáminaʼ anu̱ún. Ra̱ʼkhá tháán xtáa gíná Jacob. Ikhaa nambiyaʼ mba̱yu̱u̱ʼ mbiʼi. Mú José na̱nguá nikháñu. Guʼyáá káʼnii nigíʼnu náa nigún ku̱ya̱a̱.