LÁ TSEGÁWIINʼ a̱jkia̱nʼ xtayáá xa̱bu̱ bi̱ nakháñuu bugi̱ ráʼ. Ikhaa mbiʼyuu Job, a̱ʼgu̱ bugi̱ ni̱ndxu̱u̱ a̱ʼgiu̱u̱. Lá natayáá ndiéjunʼ eʼthúu̱n Job xáʼ. ‹Aratá wéñiʼ Dios jamí gakhañaʼ.› Guʼyáá náa numuu rí niʼthí rígi̱ ikhaa, ga̱jma̱a̱ náa numuu rí Job ndiyáminuʼ wéñuʼ.

Job ninindxu̱u̱ mbáa xa̱bu̱ jmbi bi̱ niʼnimbo̱o̱ náa Jeobá. Ikhaa nixtáa náa ku̱ba̱ʼ ndrígóo Uz, na̱nguá má mitsinguánʼ guanúu ga̱jma̱a̱ Canaán. Jeobá nindoo kaʼyoo wéñuʼ Job, mú nixtáa mbáa bi̱ niguiyuʼ kaʼyoo. Lá natayáá ikháánʼ tsáa ninindxu̱u̱ bi̱ niguiyuʼ kaʼyoo xáʼ.

Ikhaa ninindxu̱u̱ Satanás bi̱ nagumbiʼyuu Gixa̱a̱ ma̱ngaa. Garmáʼáan a̱jkia̱nʼ, Satanás ni̱ndxu̱u̱ ángel bi̱ mixkawiʼ bi̱ naguiyuʼ kaʼyoo Jeobá. Ikhaa niʼni rí Adán ga̱jma̱a̱ Eva xúnimbu̱ún kuyáá Jeobá, ma̱ngaa nikumu̱u̱ rí ma̱ndoo maʼni rí asndu tsáa xa̱bu̱ xáʼnimbo̱o̱ kaʼyoo Jeobá. Mú, lá nindoo niʼni xúʼko̱ kaʼnii xáʼ. Na̱nguá. Atatsaʼwáminaʼ ga̱jma̱a̱ numún mbaʼin xa̱bekha ga̱jma̱a̱ gu̱ʼu̱ bi̱ nikuwa jmbu xóo má nijmañulúʼ. Nguáthi̱i̱n gándoo matríyaʼ mbiʼñún xá.

Nda̱wa̱á rí Jacob ga̱jma̱a̱ José nikháñun náa Egipto, Job ninindxu̱u̱ bi̱ nixtáa itháan jmbu náa Jeobá náa xúgíʼ tsu̱du̱u̱ Ku̱ba̱ʼ. Jeobá nindoo rí Satanás mbaʼyoo rí xándoo maʼni rí xúgínʼ xa̱bu̱ manindxu̱ún ra̱míjínʼ, ma̱ngaa niʼthúu̱n: ‹Atayáá Job. Xtáa jmbu náa ikhúúnʼ›.

‹Ikhaa ni̱ndxu̱u̱ xa̱bu̱ jmbi›, niʼthí Satanás, ‹numuu rí ikháánʼ natani̱ tsajkurámááʼ ga̱jma̱a̱ gíʼdoo mbaʼa wéñuʼ rí májánʼ. Mú á mu natrígú kaʼyííʼ, maʼtá wéñaʼ›.

Ikha jngó Jeobá niʼthí: ‹Ayuʼ. Atrígú kaʼyííʼ. Atani̱i̱ Job xúgíʼ dí ra̱májánʼ rí gaʼndaʼ. Mbuʼyáá á mu maʼtá wéñuʼ. Mú atie̱wa̱a̱n dí xátaxíyáa›.

Timbá, Satanás niʼni rí tikhun xa̱bu̱ munikuʼwíin xede̱ ga̱jma̱a̱ mbaʼin camello ndrígóo Job, ma̱ngaa mugiu̱u̱ niradíin. Ga̱jma̱a̱ nigudíin 10 e̱ji̱i̱n jiama ga̱jma̱a̱ waʼxaʼ náa mbá ruʼwambiiʼ. Nda̱wa̱á, Job nixnúu mbá nandii dí ra̱májánʼ wéñuʼ. Job nimínuuʼ wéñuʼ. Ikha jngó a̱ʼgiu̱u̱ niʼthúu̱n: ‹Aratá wéñiʼ Dios jamí gakhañaʼ›. Mú Job táʼndoo. Ma̱ngaa, niguwáʼ gúyaa Job ajtsíin xa̱bu̱ bi̱ xóo nambáxu̱u̱ wéñuʼ gajmíi̱n kaʼnii, ga̱jma̱a̱ nitháán rí ikhaa nixtáa ra̱májánʼ wéñuʼ. Mú Job nixtáa má xúʼko̱ jmbu.

Rígi̱ niʼni rí Jeobá maxtáa gagi wéñuʼ, ga̱jma̱a̱ nda̱wa̱á ikhaa niʼni tsajkurámááʼ Job, xóo má tayáá náa kiʼniriyaʼ. Niʼni thanuu nandii ndrígóo. Job nigiʼdiin imbá 10 e̱ji̱i̱n mitsiʼñíin, ga̱jma̱a̱ nigiʼdiin gijma̱ aʼphu̱ xóó itháan xede̱, mugu̱ ga̱jma̱a̱ camello rí xóo nigiʼdiin nákha ginii.

Lá ma̱ndoo ikháánʼ maraxtaa má xúʼko̱ jmbu náa Jeobá xóo má Job ráʼ. Á mu xúʼko̱ ni̱ndxa̱ʼ, Dios maʼni tsajkurámáánʼ mangáán. Ma̱ndoo maraxtaa kámuu mbiʼi índo̱ gáʼni̱i̱ xúgíʼ Ku̱ba̱ʼ mitsaan xóo má náa awúu̱n ixi̱ ri̱ʼi̱ Edén.