ATAYÁÁ Moisés; xtáa ragájnuu ragáyúu náa Egipto. Lá nandoo natañún bi̱ kuwa ruxkáá xáʼ. Lá natayáá náa numuu eñún gúxiyáa Moisés ráʼ. Mbuʼyáá káʼnii erígá.

Moisés nigaja̱a̱ náa guʼwóo Faraón, Xa̱bu̱ Ñajunʼ ndrígóo Egipto. Ni̱jkha̱nú nigiʼdoo wéñuʼ edxu̱u̱ ga̱jma̱a̱ nigiʼdoo wéñuʼ numuu. Moisés ndaʼyoo dí raʼkháa xa̱bu̱ egipcio ni̱ndxu̱u̱, ma̱ngaa ndaʼyoo rí anu̱u̱ ga̱jma̱a̱ ru̱dúu̱ ni̱ndxu̱ún esclavo israelitas.

Mbóo mbiʼi, índo̱ rí Moisés nigiʼdoo 40 tsiguʼ, ni̱jkha̱ gáʼñun xú káʼnii kuwa xuajin ndrígóo. Ra̱ʼkhá tháán raʼkhí rí kuwa runiu̱u̱n. Ikhaa ndiʼyoo mbáa egipcio bi̱ xtáa raxnúu mbáa esclavo israelita. Moisés niyexi mbajndi mu mbaʼyoo tsáa xtáa rayajngoo, índo̱ na̱nguá ndiʼyoo nimbáa, ikhú nixnúu xa̱bu̱ egipcio, ikhú xa̱bu̱ bugi̱ nikháñu. Moisés nirkaʼwii xa̱bu̱ bi̱ nikháñu náa jui̱ʼi̱.

I̱mba̱ néjtsuu Moisés ni̱jkha̱ gáʼyoo mbu̱júu̱ xuajñu. Nikumu̱u̱ rí ma̱ndoo mambáñún mu ni xánindxu̱ún esclavo. Mú ndiʼñún a̱jmi̱i̱n israelitas bi̱ kuwa ruxmijná, ma̱ngoo Moisés niʼthúu̱n bi̱ xtáa raʼni dí raʼkhí: ‹Náa numuu dí eraxnáá ndxájuaʼ rá.›

Ikhú xa̱bu̱ niʼthí: ‹Tsáa nigíinʼ ikháánʼ rí manindxa̱ʼ Xa̱bu̱ Ñajunʼ ga̱jma̱a̱ juez náa ikháanʼxu rá. Lá mataxíñu̱u̱n xóo nitaxíyáa xa̱bu̱ egipcio ráʼ.›

Rí xúgi̱ Moisés nimiñuu. Ndiʼyoo rí xa̱bu̱ niguánu nidxawíín rí ikhaa nixíyáa egipcio. Índo̱ Faraón niʼdxuun ikhú nikuʼmiin xa̱bi̱i̱ mu muxiyáa Moisés. Ikha jngó Moisés nigájnuu ragáyúu náa Egipto.

Índo̱ Moisés nigájnuu náa Egipto, ni̱jkha̱ mitsinguánʼ, náa ku̱ba̱ʼ ndrígóo Madián. Ikhí nininunʼ bi̱ kuwa náa guʼwóo Jetro, ma̱ngoo ninigúnʼ ga̱jma̱a̱ mbáa wáxioo bi̱ mbiʼyuu, Zípora. Moisés ninindxu̱u̱ báxtúu ma̱ngaa niña̱wu̱u̱n mugiu̱u̱ Jetro. Nixtáa 40 tsiguʼ náa ku̱ba̱ʼ ndrígóo Madián. Rí xúgi̱ ikhaa gíʼdoo 80 tsiguʼ. Ikhú mbóo mbiʼi, índo̱ Moisés xtáa raʼñún mugiu̱u̱ ndrígóo Jetro, nirígá mbá rí na̱nguá nigiʼtu̱u̱n dí niriʼkhuu xú nixtáa Moisés. Anújngaʼ imbo̱o̱ ináa i̱yi̱i̱ʼ, mu mbuʼyáá ndiéjunʼ ni̱ndxu̱u̱ rígi̱.