LÁ NIRÍGÁ mbá miʼtsú rí nitaxudaminaʼ matani̱ mbá rí niʼniaʼ mingíjyúu matatsimbaníí nda̱wa̱á ráʼ. Ikhaa rúʼko̱ rí nigíʼnuu xa̱biya̱ bi̱ kamaa náa kiʼniriyaʼ, ikha jngó xtáa gíná. Ikha ni̱ndxu̱u̱ Jefté, mbáa juez bi̱ xtáa náa Israel bi̱ tsimiñuu.

Jefté nixtáa nákha israelitas nánguá eyamajkuíí Jeobá. Kuwa runi dí ra̱májánʼ mbu̱júu̱. Ikha jngó Jeobá naniñúnʼ rí xa̱bi̱i̱ Amón muniu̱u̱n dí ra̱májánʼ. Israelitas nutháán Jeobá rí mambáñún: ‹Nikieʼkuxuʼ náa inaʼ. ¡Atani káwáanʼxu!›.

Xa̱bu̱ kuwa gíná ga̱jma̱a̱ numuu dí raʼkhí nini. Xúgi̱ esngajma rí nandún mbuyamajkuíí Jeobá mbu̱júu̱. Ikha jngó, Jeobá nambáñun mbu̱júu̱.

Xa̱bu̱ xuajin nugíiʼ Jefté mu maxmínaʼ gajmíi̱n xa̱bu̱ bi̱ ra̱míjínʼ bi̱ ni̱ndxu̱ún amonitas. Jefté nandoo rí Jeobá mambáyuu wéñuʼ náa maxmínaʼ. Ikha jngó rígá rí nakudaminaʼ maʼni náa Jeobá: ‹Á mu rí ikháánʼ gátani maʼngoʼ, maxna̱ʼ timbáa xa̱bu̱ bi̱ gagájnuu gátsijnuʼ náa goʼwóoʼ índo̱ rí ikhúúnʼ xtáá raʼkhááʼ náa niʼngo̱ʼ nixmínaʼ›.

Jeobá naʼdxaun rí ekudaminaʼ maʼni Jefté, ga̱jma̱a̱ nambáyuu mú maʼngo̱o̱ maxmínaʼ. Índo̱ Jefté natanga̱a̱ náa goʼwóo, lá natayáá tsáa ni̱ndxu̱u̱ timbáa bi̱ nagájnuu gátsijnuu xáʼ. Ikhaa ni̱ndxu̱u̱ a̱ʼdióo dxáʼgú giʼnii bi̱ mbáwíi. Jefté nambiyaʼ ga̱jma̱a̱ naʼthí: ‹¡Ay, a̱ʼdióoʼ ni̱ndxa̱ʼ! ¡Ra̱ʼkhá tháán xtáá gíná tani! Mú rígá rí nikuʼdáminaʼ ma̱ni̱ náa Dios, rí xúgi̱ nánguá xú maniʼñúunʼ ranimbánuu rí nikuʼdáminaʼ ma̱ni̱ náa Jeobá›.

Índo̱ rí wáxioo Jefté niʼdxaun rí nikudaminaʼ maʼni ikhaa, ginii naxtáa gíná, numuu rí maniñuʼ anu̱u̱ ga̱jma̱a̱ bi̱ nambáxu̱u̱ gajmíi̱n. Mú ikhaa maʼni ñajunʼ Jeobá náa tabernáculo rí nagumbiʼyuu Silo xúgíʼ mbiʼi má rí gáxtáa. Ikha jngó naʼthúu̱n Jefté: ‹Á mu rígá dí nitaxudaminaʼ matani̱ náa Jeobá, gíʼmaa rí matanimbaníí›.

Ikha jngó wáxioo Jefté na̱jkha̱ náa Silo, ga̱jma̱a̱ naʼni ñajunʼ Jeobá náa tabernáculo ndrígóo xúgíʼ mbiʼi má rí naxtáa. Gu̱ʼu̱ bi̱ kuwa náa Israel nagún gúyaa a̱jkhu̱ mbiʼi rí mámbá tsiguʼ ga̱jma̱a̱ nakuwa gagi mbá xúgínʼ. Xa̱bu̱ nandún kuyáá wéñuʼ wáxioo Jefté numuu rí dxáʼgú bugi̱ naʼni májánʼ ñajunʼ ndrígóo Dios, Jeobá.