ATAYÁÁ Josué. Ikhaa eʼthí: ‹¡A̱jkha̱ʼ, ní xádxúʼ kanuu itháan!›. Ikhú A̱jkha̱ʼ nawanúu̱ má náa gíiʼ. Nawanúu̱ má ikhí náa tikuapa mekhu kañiʼ mbiʼi. ¡Jeobá naʼni dí marigá rígi̱! Mú guʼyáá náa numuu rí Josué nandoo rí A̱jkha̱ʼ mambiʼitiga má xúʼko̱.

Índo̱ rí witsun reyes bi̱ ra̱míjínʼ bi̱ kuwa náa xuajin Canaán nugi̱ʼdi̱i̱ nuxmijná gajmiún xa̱bu̱ bi̱ kuwa náa Gabaón, xa̱bu̱ gabaonitas nuxuʼmaa mbáa xa̱bu̱ mú manda̱ʼa̱ rí mambañuun Josué. Ikhú ikhaa eʼthí: ‹¡Ayi̱ nacha̱ ga̱jma̱á ni̱ndxu̱xu̱ʼ! ¡Atani káwáanʼxu! Xúgínʼ reyes bi̱ kuwa náa kúbá nuxmijná gajmiún xa̱bu̱ bi̱ nuñajunʼ ga̱jma̱á ni̱ndxa̱ʼ›.

Núkhu ejkha̱ Josué gajmíi̱n xúgínʼ xa̱bi̱i̱ bi̱ nuxmijná. Kañiʼ mbruʼun egún. Índo̱ naguanu náa Gabaón, soldados ndrígiu̱ún bi̱ witsun reyes namiñun ga̱jma̱a̱ nugi̱ʼdi̱i̱ nagáñun. Ikhú Jeobá naʼni rí majngutígú eʼtsí mba̱ʼu̱ asndu náa mekhu, ga̱jma̱a̱ xa̱bi̱i̱ Josué na̱nguá niradíin mbaʼin wéñuʼ soldados itháan mbaʼin nikháñun ga̱jma̱a̱ eʼtsí.

Josué ndaʼyoo rí itháan má tigo̱o̱ marámaaʼ A̱jkha̱ʼ. Maʼni krína, ga̱jma̱a̱ mbaʼin tsú soldados ndrígiu̱ún bi̱ witsun reyes bi̱ ra̱míjínʼ magañún. Ikha jngó Josué naʼtakháñuu Jeobá ga̱jma̱a̱ naʼthí: ‹¡A̱jkha̱ʼ, ní xádxúʼ kanuu itháan!›. Índo̱ rí A̱jkha̱ʼ nambiʼitiga má xúʼko̱, ikhú israelitas nandoo naʼngu̱u̱n nudaʼ náa nuxmijná.

Náa Canaán kuwa mbaʼin reyes bi̱ ra̱míjínʼ bi̱ nawiñunʼ kuñún xuajen ndrígóo Dios. Josué gajmíi̱n xa̱bi̱i̱ ndajñúnʼ mbá majun tsiguʼ rí nuni̱ gámbíin mbá 31 reyes bi̱ kuwa náa xuajin Canaán. Guámbóo eʼni rígi̱, Josué naʼni rí ku̱ba̱ʼ ndrígóo Canaán mawiʼtáa̱ náa xuajin ma̱jkha̱ʼ náa rí nda̱ñúnʼ ku̱ba̱ʼ.

Nanújngoo mba̱yu̱u̱ʼ tsiguʼ, ikhú Josué nakháñuu índo̱ nagiʼdoo 110 tsiguʼ. Mú nákha xóó xtáa ikhaa gajmíi̱n bi̱ nambáxu̱u̱, xa̱bu̱ nunimbu̱ún kuyáá Jeobá. Mú índo̱ rí ikhiin nakháñun, xa̱bu̱ nuni̱ dí ra̱májánʼ ga̱jma̱a̱ nuxuda̱mi̱jna̱ náa xkujndu. Rí xúgi̱ nda̱ñúnʼ rí Dios mambáñún.