NANÚJNGOO tsiguʼ... ¡10 tsiguʼ, 20 tsiguʼ, 30 tsiguʼ, 39 tsiguʼ! Bi̱ israelitas xóó kuwa náa ku̱ba̱ʼ gíná. Mú xúgíʼ tsiguʼ rígi̱ Jeobá nañewu̱u̱n xuajñu. Naxniʼtsun ga̱jma̱a̱ maná. Naxnún ikha rí mbiʼi ga̱jma̱a̱ mbá du̱u̱n, rí mbruʼun naxnún ikha ga̱jma̱a̱ aguʼ. Ga̱jma̱a̱ na̱nguá eguuʼ xtíñún asndu na̱nguá má egawúnʼ najkhún.

Rígi̱ ni̱ndxu̱u̱ timbá igu̱nʼ ndrígóo tsiguʼ 40 rí asndu nákha nigájnun náa Egipto. Bi̱ israelitas kuwa mbu̱júu̱ náa Cades. Gi̱i̱ má kuwa índo̱ rí nixuʼmin mbá 12 xa̱bu̱ bi̱ nuñama náa ku̱ba̱ʼ ndrígóo Canaán mbá 40 tsiguʼ ginii. Míriam ndxájuu Moisés nakháñuu náa Cades. Ga̱jma̱a̱ xú káʼnii nákha ginii narígá xkujndu gi̱i̱.

Xa̱bu̱ na̱nguá exkamaa iyaʼ. Nuxieʼkhá náa Moisés: ‹Itháan májánʼ niʼni á mu nikháñuxuʼ. Náa numuu rí nitrawáanʼxu náa Egipto mu mi̱dxa̱ʼ xtáanʼxu gi̱i̱ náa rí mixkawiʼ wéñuʼ, náa na̱nguá egaja̱a̱ nditháan kayuʼ rá. Gi̱i̱ nda̱a̱ trigo, higo, uva, ga̱jma̱a̱ granada. Asndu nditháan kayuʼ iyaʼ mú muʼwa̱a̱nʼlú›.

Índo̱ Moisés ga̱jma̱a̱ Aarón nagún náa tabernáculo mú mutajkáan, Jeobá naʼthúu̱n Moisés: ‹Atagímbíin xa̱bu̱ bi̱ kuwa náa xuajin. Ikhú, náa ginún xúgínʼ xa̱bu̱ arathan itsí dí gíiʼ ikhí. Ikhí gagajnúu mba̱ji̱nʼ wéñuʼ iyaʼ mú muwa̱a̱n xa̱bu̱ ga̱jma̱a̱ xúgínʼ xujkiún›.

Ikha jngó Moisés nagímbíin xa̱bu̱, ga̱jma̱a̱ naʼthí: ‹¡Gudxawíín, xa̱bu̱ bi̱ tsíkumala ku̱ya̱a̱ Dios! Lá gíʼmaa muriyaʼxu iyaʼ náa itsí rígi̱ ikhúúnʼ ga̱jmu̱ʼ Aarón ráʼ.› Ikhú, Moisés naxnúu náa itsí ga̱jma̱a̱ ixu̱u̱ a̱jma̱ aʼphu̱, ga̱jma̱a̱ nagi̱ʼdu̱u̱ nagájnuu mba̱ji̱nʼ wéñuʼ iyaʼ náa itsí. Rígá iyaʼ muwa̱a̱n xúgínʼ xa̱bu̱ ga̱jma̱a̱ xúgínʼ xujkhúʼ bi̱ kuwa ikhí.

Mú Jeobá nakiʼnáa kaʼyoo Moisés ga̱jma̱a̱ Aarón. Lá natayáá náa numuu ráʼ. Numuu rí Moisés ga̱jma̱a̱ Aarón nithi rí ikhiin gúriyaʼ iyaʼ náa itsí. Mú Jeobá ni̱ndxu̱u̱ bi̱ phú naríyaʼ iyaʼ. Numuu rí Moisés ga̱jma̱a̱ Aarón na̱nguá nithi gajkhun ga̱jma̱a̱ numuu rígi̱, Jeobá naʼthí rí maxnún castigo. Jeobá Dios naʼthí: ‹Ikháanʼ xáʼngala gúní rí xuajñunʼ mato̱ʼo̱o̱ náa Canaán›.

Israelitas nigájnun nacha̱ náa Cades. Nguátha mbiʼi nda̱wa̱á naguanu náa kúbá Hor. Ikhí, náa inuu kúbá nakháñuu Aarón. Índo̱ ikhaa nakháñuu gíʼdoo 123 tsiguʼ. Israelitas kuwa gíná wéñuʼ, ikha jngó numbiyaʼ 30 mbiʼi ga̱jma̱a̱ numuu Aarón. Ikhú Eleazar a̱ʼdióo Aarón na̱jkha̱nú nanindxu̱u̱ dxajkun náa xuajin Israel.