¡ATAYÁÁ! ¡Israelitas kuwa ranújngun náa mañu Jordán! Mú, náa lá ni̱jkha̱ iyaʼ rá. Numuu rí nákha ikhú mbiʼi ruʼwa ñajunʼ. Iyaʼ mañu na̱jkha̱ kúʼúun mba̱ji̱nʼ wéñuʼ nákha xóó ichíʼgíʼ tígo̱o̱ manújngun israelitas. ¡Mú rí xúgi̱ nditháan kayuʼ iyaʼ! ¡Isrelitas kuwa ranújngun náa ku̱ba̱ʼ mixooʼ xóo má ni̱ni̱ náa lamáa Maña̱ʼ! Náa ni̱jkha̱ xúgíʼ iyaʼ rá. Guʼyáá.

Índo̱ ni̱jkha̱nú mbiʼi rí israelitas manújngun náa mañu Jordán, rígi̱ ni̱ndxu̱u̱ rí Jeobá niʼthúu̱n Josué maʼthúún xa̱bu̱ xuajen: ‹Ndxajkun gíʼmaa rí muda̱ e̱jna̱ rí nimbánuu ga̱jma̱a̱ magun ginuun. Índo̱ rí ikhiin ndiʼkhún guxuma̱ʼ najkhún náa mañu Jordán, ikhú iyaʼ mawiji̱ ra̱jkha̱›.

Ikha jngó ndxajkun nuxuxi e̱jna̱ rí nimbánuu ga̱jma̱a̱ nagún ginii ku̱ñu̱u̱n nda̱wa̱á egún xa̱bu̱. Índo̱ naguanu náa Jordán, ndxajkun najngún náa iyaʼ. Iyaʼ mañu na̱jkha̱ nacha̱ wéñuʼ ma̱ngaa mi̱jnu̱ʼ. ¡Núkhu niniñuʼ ra̱jkha̱ iyaʼ índo̱ nixuma̱ʼ najkhún! ¡Mbá milagro ni̱ndxu̱u̱! Jeobá nirogoo mañu asndu tsudií. ¡Naʼni̱i̱ lá mixooʼ iyaʼ mañu!

Ndxajkun bi̱ kuda e̱jna̱ rí nimbánuu nanújngun náa tikuapo̱o̱ mañu mixooʼ. Lá nandoo natañún náa kiʼniriyaʼ xáʼ. ¡Índo̱ rí wájun ikhí, xúgínʼ israelitas nugi̱ʼdi̱i̱ nanújngun náa mañu Jordán náa ku̱ba̱ʼ mixooʼ!

Índo̱ ninújngun xúgínʼ, Jeobá naʼni rí Josué maʼthúún mbá 12 xa̱bekha migújkuínʼ: ‹Aʼgua̱ náa mañu náa kuwa ndxajkun bi̱ kuda e̱jna̱ rí nimbánuu. Ikhí guraxi̱i̱ mbá 12 itsí ga̱jma̱a̱ gundriga náa munuʼ xúgínʼ. Mu xúʼko̱, nda̱wa̱á, índo̱ e̱jñalaʼ guraxi ndiéjunʼ eyoo gáʼthi 12 itsí rígi̱, gíʼmaa rí muthu̱u̱n rí iyaʼ nitumuu ra̱jkha̱ índo̱ ninújngun ku̱ñu̱u̱n náa mañu Jordán e̱jna̱ ndrígóo Dios rí nimbánuu. ¡Itsí rúʼko̱ gáʼni rí marmáʼáan a̱jkia̱laʼ ga̱jma̱a̱ numuu milagro rígi̱!›. Ma̱ngaa Josué naguxi mbá 12 itsí náa mañu rí niguájun ndxajkun.

Nda̱wa̱á kayuʼ Josué naʼthúún ndxajkun bi̱ kuda e̱jna̱ rí nimbánuu: ‹Agajnalaʼ náa Jordán›. Índo̱ e̱ni̱ rígi̱, iyaʼ nagíʼdu̱u̱ na̱jkha̱ mbu̱júu̱.