LÁ RAGÁJKHUN rí mitsiʼyáa ada̱ lájuíin bugi̱ ráʼ. Nagumbiʼyuu Samuel. Xa̱biya̱ bi̱ natamaʼ ñawúunʼ náa edxu̱u̱ Samuel ni̱ndxu̱u̱ Elí, bi̱ kayá edxu̱u̱ náa ndxajkun. Ikhaa xtáa náa Israel. Elcana ga̱jma̱a̱ Ana naguwáʼ ku̱ya̱a̱ aʼdiún náa Elí.

Samuel gíʼdoo a̱jkhu̱ tsiguʼ o witsu tsiguʼ. Mú maxtáa gi̱i̱ ga̱jma̱a̱ Elí náa tabernáculo ndrígóo Jeobá gajmíi̱n xúgínʼ ndxajkun. Náa numuu rí Elcana ga̱jma̱a̱ Ana naguwáʼ ku̱ya̱a̱ mbáa ada̱ lájuíin xóo Samuel mu maʼni ñajunʼ Jeobá náa tabernáculo rá. Mbuʼyáá.

Nguátha tsiguʼ ginii, Ana ra̱ʼkhá tháán nixtáa gíná. Numuu rí ikhaa na̱nguá egiʼdiin e̱ji̱n, ikha jngó ra̱ʼkhá tháán niniguʼ magiʼdaa mbáa ada̱. Mbóo mbiʼi índo̱ rí ikhaa ni̱jkha̱ náa tabernáculo ndrígóo Jeobá, niʼtajkháan: ‹¡Ay, Jeobá, xámbumaʼ xtayoʼ! Á mu rí ikháánʼ naraxniúʼ mbáa ada̱, na̱xna̱ʼ ajngóʼ rí ma̱xna̱ʼ mu maʼni ñajuanʼ xúgíʼ mbiʼi má rí gáxtáa›.

Jeobá niriʼña rí ninda̱ʼa̱ Ana, ga̱jma̱a̱ nguátha igu̱nʼ nda̱wa̱á nigiʼdaa Samuel. Ana ra̱ʼkhá tháán nindoo kaʼyoo a̱ʼdióo, ma̱ngaa nigíʼdu̱u̱ niʼsngóo ga̱jma̱a̱ numuu Jeobá nákha xóo ikhaa ni̱ndxu̱u̱ lájuíin wéñuʼ. Niʼthúu̱n ajmbio̱o̱: ‹Nacha̱ má índo̱ gíki̱i̱ májánʼ Samuel ga̱jma̱a̱ índo̱ rí ní xaʼyóoʼ mañewu̱u̱n, maʼgá ka̱ya̱a̱ náa tabernáculo mu ikhí gáʼni ñajunʼ Jeobá›.

Ikhaa rúʼko̱ ni̱ndxu̱u̱ rí xtáa raʼni Ana ga̱jma̱a̱ Elcana náa kiʼniriyaʼ. Numuu rí anu̱u̱ ga̱jma̱a̱ ru̱dúu̱ nisngáá májánʼ wéñuʼ Samuel, ikhaa xtáa gagi numuu rí nandoo naʼni ñajunʼ gi̱i̱ náa guʼwá xtíin ndrígóo Jeobá. Mámbá tsiguʼ anu̱u̱ ga̱jma̱a̱ ru̱dúu̱ naguwáʼ gúyamajkuíí Jeobá náa guʼwá xtíin rí kiejunʼ rígi̱, ga̱jma̱a̱ naguwáʼ gúyaa aʼdiún. Ga̱jma̱a̱ mámbá tsiguʼ Ana nayéʼkha̱ mbá xtíin nuxi̱ʼ rí na̱nguá gíʼdoo ñawúunʼ rí niʼni magíiʼ Samuel.

Nanújngoo tsiguʼ, Samuel xóó xtáa raʼni ñajunʼ Jeobá náa tabernáculo, ma̱ngaa nanigu̱ʼ Jeobá rí eʼni ga̱jma̱a̱ xa̱bu̱ xuajin. Mú Ofni ga̱jma̱a̱ Finees, e̱ji̱i̱n Elí bi̱ kayá edxu̱u̱ náa dxajkun, raʼkhíin xa̱bu̱ míjínʼ. Ikhiin nuni̱ dí ra̱májánʼ wéñuʼ, ga̱jma̱a̱ nuni̱ dí eʼwíínʼ xúnimbu̱ún náa Dios. Elí gíʼmaa dí mariya kaʼñúnʼ rí ni xánindxu̱ún dxajkun, mú tséʼni xúʼko̱.

Dxámá Samuel tséniñuʼ rí nimbá dí ra̱májánʼ dí erígá náa tabernáculo maniñuʼ raʼni ñajunʼ Jeobá. Mú mba̱yu̱u̱ʼ má eʼni rí Jeobá tséʼthúu̱n nimbáa xa̱biya̱, numuu rí rambáʼin xa̱bu̱ bi̱ phú nandún kuyáá gajkhun. Índo̱ rí Samuel nda̱ja̱a̱ itháan, rígi̱ ni̱ndxu̱u̱ dí narígá:

Samuel xtáa raʼgu náa tabernáculo índo̱ rí niʼni mbajui̱i̱ mbá aʼwá. Ikhaa nariʼña: ‹Gi̱i̱ xtáá›. Ikhú natu̱xu̱u̱ ga̱jma̱a̱ nagáyúu ejkha̱ gáʼyoo Elí, ga̱jma̱a̱ naʼthí: ‹Nitatsaʼóoʼ, gi̱i̱ xtáá›.

Mú Elí nariʼña: ‹Na̱nguá nindxa̱ʼwa̱ʼ; ayuʼla náa xiyoo›. Ikha jngó Samuel natanga̱a̱ náa xiyoo.

Ikhú nandxa̱ʼóo rí maʼni a̱jma̱ aʼphu̱: ‹¡Samuel!›. Ikhú Samuel natuxu̱u̱ mu maʼga̱ mbu̱júu̱ náa xtáa Elí. Naʼthí: ‹Nitatsaʼóo, gi̱i̱ xtáá›. Mú Elí nariʼña: ‹Na̱nguá nindxa̱ʼwa̱ʼ, a̱ʼdióoʼ ni̱ndxa̱ʼ. Ayuʼ gátaba̱ʼ mbujuáaʼ›. Ikhú Samuel najkha̱a̱ gábo̱ʼ mbu̱júu̱ náa xiyoo.

Ikhú nandxa̱ʼóo aʼwá rí maʼni ajtsú aʼphu̱: ‹¡Samuel!›. Ikha jngó Samuel na̱jkha̱ ragáyúu mbu̱júu̱ náa Elí ga̱jma̱a̱ naʼthúu̱n: ‹Gi̱i̱ xtáá; mbáa aʼphu̱ rígi̱ nitatsaʼóʼ›. Rí xúgi̱ Elí ndaʼyoo rí Jeobá ni̱ndxu̱u̱ bi̱ nandxa̱ʼóo. Naʼthúu̱n Samuel: ‹Ayuʼ gátaba̱ʼ mbujuáaʼ, á mu rí ikhaa gándxaʼwáʼ, gíʼmaa dí marata̱: “Arathá Jeobá, numuu rí xa̱bia̱ʼ naʼdxun”.›

Ikhaa rúʼko̱ rí eʼthí Samuel índo̱ rí Jeobá endxa̱ʼóo mbu̱júu̱. Ikhú Jeobá naʼthúu̱n Samuel rí ma̱ʼkha̱ kayóo castigo náa Elí ga̱jma̱a̱ náa e̱ji̱i̱n. Nda̱wa̱á, Ofni ga̱jma̱a̱ Finees nakháñun náa exmijná gajmiún filisteos, índo̱ rí Elí naʼdxun dí nirígá, naxpátri̱ga̱a̱ ikhú nakháñuu índo̱ rí nijmigaʼ itsu̱ rexo̱o̱. Xúʼko̱ naʼnimbánuu ajngóo ndrígóo Jeobá.

Samuel nda̱ja̱a̱, ga̱jma̱a̱ nda̱wa̱á rí nixtáa ikhaa xóo juez nánguá nikúwi̱i̱n eʼwíínʼ jueces náa Israel. Índo̱ rí Samuel naʼni xa̱bu̱ nikhi̱i̱, xa̱bu̱ xuajin nutháán: ‹Atayááʼ mbáa rey bi̱ maʼtáñajuanxoʼ›. Samuel na̱nguá eyoo, numuu rí Jeobá ni̱ndxu̱u̱ bi̱ phú rey náa ikhiin. Mú Jeobá naʼthúu̱n Samuel rí maʼdxun rí ethi xa̱bu̱ xuajin.