ATAYÁÁ xa̱biya̱ bi̱ kuaʼa̱a̱n náa iyaʼ. Raʼkhí kayuʼ rí xtáa ragíʼnuu, lá ragájkhun ráʼ. ¡E̱gi̱ʼ mba̱a̱ maga̱rajngiún! Lá natayáá tsáa ni̱ndxu̱u̱ xa̱biya̱ buʼko̱ ráʼ. Ikhaa nagumbiʼyuu Jonás. Mbuʼyáá xú káʼnii nikudaminaʼ wéñuʼ xkujndu xa̱biya̱ buʼko̱.

Jonás ninindxu̱u̱ xa̱bu̱ gaʼyee ndrígóo Jeobá. Nguátha mbiʼi nda̱wa̱á rí nikháñu Eliseo, Jeobá naʼthúu̱n Jonás: ‹Ayuʼ náa xuajin mba̱a̱ rí nagumbiʼyuu Nínive. Ra̱májánʼ wéñuʼ rí kuwa runi xa̱bu̱ ikhí, ga̱jma̱a̱ nandoʼ marathu̱u̱n ga̱jma̱a̱ numuu rúʼko̱›.

Mú Jonás na̱nguá eyoo gáʼga̱. Ikha jngó najngúun náa mbá barco mu maʼga̱ i̱mba̱ ríʼkhá raʼkháa náa Nínive náa nijuiʼtháán maʼga̱. Jeobá tsínigu̱ʼ rí Jonás magayúu. Ikha jngó naʼni rí maxnúu wéñuʼ ruʼwa mbiiʼ. Ruʼwa xkawiʼ rígi̱ naʼni rí barco maʼga̱ rajngúun náa iyaʼ. Marineros namiñun wéñuʼ, ga̱jma̱a̱ nundxa̱ʼwa̱ náa dios ndrígu̱ún mu mambañuun.

Nda̱wa̱á kayuʼ Jonás naʼthúún: ‹Ikhúúnʼ ndayamajkhuu Jeobá, Dios bi̱ niʼni mekhu ga̱jma̱a̱ Ku̱ba̱ʼ. Xtáá ragayúʼ numuu rí tsíyóóʼ gani rí Jeobá niʼthúnʼ›. Ikhú xa̱bu̱ marineros nuni̱i̱ graxe̱: ‹Ndiéjunʼ gáʼyóoʼ muñanʼxu mu mawiji̱i̱ ruʼwa mbiiʼ rá’.›

Jonás naʼthí: ‹Gudamu̱ʼu̱u̱n náa iyaʼ lamáa, mu xúʼko̱ lamáa maʼni wíyuu›. Marineros na̱nguá eñún gúní rígi̱, mú índo̱ ruʼwa mbiiʼ na̱jkha̱ raʼni itháan mixkawiʼ, nudama̱ʼa̱a̱n Jonás náa iyaʼ lamáa. Nacha̱ má ewiji̱i̱ raʼni ruʼwa mbiiʼ, ga̱jma̱a̱ naʼni wíyuu lamáa mbu̱júu̱.

Índo̱ Jonás najngúun náa lamáa, mbáa e̱gi̱ʼ mba̱a̱ wéñuʼ naga̱rajngiúun. Mú ikhaa tsikhañuu. Ajtsú mbiʼi ga̱jma̱a̱ ajtsú mbruʼun xtáa náa awúu̱n e̱gi̱ʼ mba̱a̱ buʼko̱. Jonás natanga̱a̱ a̱jkiu̱u̱n rí táʼnimbo̱o̱ dí niʼthí Jeobá rí maʼga̱ náa xuajin Nínive. Ikha jngó, lá natayáá rí eʼni xáʼ.

Jonás naʼtájkháan náa Jeobá ga̱jma̱a̱ nando̱ʼo̱o̱ rí mambáyuu. Ikhú Jeobá naʼni rí e̱gi̱ʼ mba̱a̱ maxiriyaʼ Jonás náa ku̱ba̱ʼ mixooʼ. Nda̱wa̱á Jonás na̱jkha̱ náa xuajin Nínive. Rígi̱ naʼsngúlúʼ dí ra̱ʼkhá tháán gíʼdoo wéñuʼ numuu muʼni xúgíʼ rí Jeobá gáʼtulú.