LÁ NATAYÁÁ náa numuu rí xa̱biya̱ bugi̱ xtáa raʼtájkháan náa Jeobá ráʼ. Náa numuu rí naniñuʼ mbaʼa carta rígi̱ náa inuu altar ndrígóo Jeobá rá. Xa̱biya̱ bugi̱ ñajunʼ Ezequías. Ikhaa ñajunʼ rey náa a̱jma̱ xuajin ma̱jkha̱ʼ ndrígóo Israel rí naguanúu xígií náa sur. Ga̱jma̱a̱ ra̱ʼkhá tháán gíʼdoo wéñuʼ xkujndu. Náa numuu rá.

Numuu rí soldados asirios nini gámbáa mbá 10 xuajin ma̱jkha̱ʼ dí rígá xígií náa norte. Jeobá niniñuʼ dí xúʼko̱ marigá numuu rí ikhiin ninindxu̱ún xa̱bu̱ bi̱ ra̱míjínʼ. Rí xúgi̱ soldados asirios naguwáʼ muxnamijná gajmiún náa reino ndrígóo a̱jma̱ xuajin ma̱jkha̱ʼ.

Rey bi̱ xtáa náa Asiria ndiʼkhún nikuʼma mbaʼa carta náa rey Ezequías. Rígi̱ ñajunʼ mbaʼa carta dí rey Ezequías niniñuʼ náa inuu Dios. Náa mbaʼa carta naʼthí ajngáa dí tséjmaa ga̱jma̱a̱ numuu Jeobá, ga̱jma̱a̱ nutháán Ezequías rí ganiñaminaʼ. Ikha jngó Ezequías naʼtájkháan: ‹Oh Jeobá, atani káwáanʼxu náa rey ndrígóo Asiria. Ikhú xúgíʼ xuajin gúyaa rí mbáwiin ikháánʼ ñajuanʼ Dios›. Lá maʼdxun Jeobá ráʼ.

Ezequías ñajunʼ mbáa rey bi̱ májánʼ a̱jkiu̱u̱n. Na̱nguá ñajunʼ xóo rey bi̱ ra̱míjínʼ bi̱ kuwa rutañajunʼ náa 10 xuajin ma̱jkha̱ʼ ndrígóo Israel, asndu na̱nguá má ni̱ndxu̱u̱ xóo anu̱u̱ Acaz rey bi̱ ra̱májánʼ. Ikhaa niʼnimbo̱o̱ májánʼ wéñuʼ xúgíʼ xtángoo ndrígóo Jeobá. Ikha jngó, nda̱wa̱á rí ikhaa guámbóo raʼtájkháan, xa̱bu̱ gaʼyee Isaías nakuʼma ajngáa ndrígóo Jeobá: ‹Rey bi̱ xtáa náa Asiria xáto̱ʼo̱o̱ náa Jerusalén. Asndu nimbáa soldado ndrígóo xáʼkha̱nú mijngii. Xúdáʼ nimbá xkamídá náa xuajin›.

Atayáá náa ináa rí kiʼniriyaʼ gi̱i̱. Lá natayáá tsíin ñajúnʼ xúgínʼ soldados bi̱ nikháñun ráʼ. Ikhiin ñajúnʼ asirios. Jeobá nikuʼmaa ángel ndrígóo, ga̱jma̱a̱ ángel bugi̱ nigudíin mbó mbruʼun mbá 185,000 soldados asirios. Ikha jngó, rey bi̱ xtáa náa Asiria na̱jkha̱a̱.

Reino ndrígóo a̱jma̱ xuajin ma̱jkha̱ʼ nakríyaʼ, ga̱jma̱a̱ xa̱bu̱ xuajin nakuwa tsímáá nguátha mbiʼi. Mú nda̱wa̱á rí nikháñu Ezequías, a̱ʼdióo bi̱ nagumbiʼyuu Manasés na̱jkha̱nú nanindxu̱u̱ rey. Xa̱biya̱ bugi̱ Manasés ga̱jma̱a̱ nda̱wa̱á a̱ʼdióo bi̱ nagumbiʼyuu Amón nanindxu̱ún ra̱míjínʼ. Ikha jngó narígá wéñuʼ delito ga̱jma̱a̱ nuxnamijná wéñuʼ xa̱bu̱ náa tsu̱du̱u̱ ku̱ba̱ʼ. Índo̱ xa̱bu̱ bi̱ nuñajunʼ náa rey Amón nuxiyáa, Josías a̱ʼdióo má Amón nanindxu̱u̱ rey náa reino dí naʼtañajunʼ a̱jma̱ xuajin ma̱jkha̱ʼ.