XÓÓ dxámá ni̱ndxu̱u̱ Salomón índo̱ na̱jkha̱nú nanindxu̱u̱ rey. Nandoo kaʼyoo wéñuʼ Jeobá, ga̱jma̱a̱ Salomón naʼni xóo má niʼthúu̱n anu̱u̱ David. Jeobá nanigu̱ʼ xú káʼnii eʼni Salomón, ikha jngó mbóo mbruʼun Jeobá niʼthúu̱n náa mbá xnuʼndaa: ‹Salomón, ndiéjunʼ rí eyaʼ maxna̱ʼ rá.›

Ikhú Salomón nariʼña: ‹Jeobá Dios ndrígóʼ, ikhúúnʼ ni̱ndxu̱ʼ xóó dxámaa ga̱jma̱a̱ tséyóo xú káʼnii matañájunʼ. Ikha jngó, atani dí magúʼdoo wéñuʼ edxu̱ʼ mu ma̱ndoo matañájunʼ májánʼ xuajñaʼ›.

Jeobá nanigu̱ʼ rí Salomón e̱nda̱ʼa̱. Ikha jngó naʼthí: ‹Numuu rí nitanda̱ʼa̱ rí maraʼdáá wéñuʼ edxa̱ʼ raʼkháa rí maraxtaa mba̱yu̱u̱ʼ mbiʼi asndu má tátanda̱ʼa̱ dí maraʼdáá wéñaʼ, ma̱ni̱ rí maraʼdáá itháan edxa̱ʼ xóo nimbáa xa̱bu̱ tágiʼdoo nákha ginii. Mú, raʼkháa i̱ndó rúʼko̱ gáxna̱ʼ, maxna̱ʼ asndu rí tátanda̱ʼa̱, xúʼko̱, ma̱ni̱ dí maraʼdáá wéñuʼ ga̱jma̱a̱ maxna̱ʼ gloria›.

Nguátha mbiʼi nda̱wa̱á naguwáʼ a̱jmi̱i̱n gu̱ʼu̱ náa Salomón ga̱jma̱a̱ mbá xkujndu dí mingíjyúu. Naʼthí mbáa: ‹Mbóó kúwaanʼxu náa mbá guʼwá›. ‹Ikhúúnʼ nigúʼdaa mbáa ada̱, ga̱jma̱a̱ a̱jma̱ mbiʼi nda̱wa̱á ikhaa ma̱ngaa nigiʼdaa mbáa ada̱. Mbóo mbruʼun, a̱ʼdióo ikhaa nikháñu. Mú nákha ikhúúnʼ xtáá ragú, a̱ʼgu̱ bugi̱ ni̱jkha̱ kayáa a̱ʼdióoʼ bi̱ ndaʼya ga̱jma̱a̱ a̱ʼdióo ikhaa bi̱ nikháñu niniñuʼ náa nijniuʼ. Índo̱ ndijuiʼla ndi̱yo̱o̱ dí raʼkháa a̱ʼdióoʼ.›

Índo̱ naʼdxun rígi̱ a̱ʼgu̱ bi̱ mbáa, ikhú naʼthí: ‹¡Na̱nguá! ¡Ada̱ bi̱ ndaʼya ndrígoʼ bi̱ nikháñu ndrígóo ikhaa!›. Timbáa a̱ʼgu̱ eriʼña: ‹¡Na̱nguá! ¡Ada̱ bi̱ nikháñu ndrígaʼ ikháánʼ bi̱ ndaʼya ndrígoʼ ikhúúnʼ!›. Xúʼko̱ nagiʼdu̱u̱n gu̱ʼu̱. Ndiéjunʼ gáʼni Salomón rá.

Salomón na̱nda̱ʼa̱ mbá chídí, índo̱ naguwáʼ ku̱ñu̱u̱n, naʼthí: ‹Guxpiʼta̱a̱ ada̱ bi̱ ndaʼya, ga̱jma̱a̱ gu̱xna̱a̱ mámbáa a̱ʼgu̱›.

‹¡Na̱nguá!› eʼthí bi̱ phú ru̱dúu̱. ‹Mbá péñu, xúxiyáa ada̱. ¡Guxna̱a̱ a̱ʼgu̱ buʼko̱!›. Mú a̱ʼgu̱ bugi̱ eʼthí: ‹Nimbáa dí ikháanʼxu xúxna̱a̱ ada̱; guxpiʼta̱a̱ maʼni a̱jma̱›.

Ikhú Salomón naʼthí: ‹¡Xúxiyáa ada̱! Guxna̱a̱ timbáa a̱ʼgu̱. Ikhaa ni̱ndxu̱u̱ phú ru̱dúu̱›. Salomón naʼthí rígi̱ numuu rí bi̱ phú ru̱dúu̱ nandoo kaʼyoo wéñuʼ a̱ʼdióo rí asndu naʼthí maxnúu imba̱a̱ a̱ʼgu̱ mu xúxiyáa ada̱. Índo̱ xa̱bu̱ nudxawíín rí Salomón niʼnimbánuu xkujndu, nakuwa gagi numuu rí guáʼdáá mbáa rey bi̱ gíʼdoo wéñuʼ edxu̱u̱.

Índo̱ Salomón xtáa raʼtáñajunʼ, Dios naʼni tsajkuramiinʼ xa̱bu̱ xuajin índo̱ naʼni rí ku̱ba̱ʼ maxná wéñuʼ trigo, cebada, uva, higo ga̱jma̱a̱ i̱ʼwáʼ ganitsu. Xa̱bu̱ nugíiʼ xtíin rí májánʼ ga̱jma̱a̱ kuwa náa guʼwá májánʼ. Xúgínʼ xa̱bu̱ guáʼdáá rí májánʼ wéñuʼ.