NIKRÚJNGOO itháan rí mbá 10 tsiguʼ rí asndu nákha rey Nabucodonosor ni̱jkha̱ kagu̱u̱n náa Babilonia israelitas bi̱ niwaʼsngúún májánʼ wéñuʼ. ¡Ga̱jma̱a̱ rí xúgi̱, atayáá! Xtáa rakha xuajin Jerusalén, ga̱jma̱a̱ israelitas bi̱ tsikhañun nagún kudiin xóo esclavos náa Babilonia.

Garmáʼáan a̱jkia̱nʼ, rígi̱ nithi marigá xa̱bu̱ gaʼyee á mu rí ikhiin tsíniñaʼ runi dí ra̱májánʼ wéñuʼ. Mú xa̱bu̱ israelitas túdxawiin rí nithi xa̱bu̱ gaʼyee. Ndiyamajkún má xúʼko̱ dios bi̱ ragájkhun na̱nguá ndiyamajkuíí Jeobá. Ikha jngó kaʼñúún mudrigú rí mbuyamíniiʼ. Nduʼyáá numuu rí Ezequiel xa̱bu̱ gaʼyee ndrígóo Dios naʼthulú dí ra̱májánʼ nini xa̱bu̱ israelitas.

Lá natayáá tsáa ñajunʼ Ezequiel ráʼ. Ikhaa ni̱ndxu̱u̱ mbáa dxámá bi̱ Nabucodonosor ni̱jkha̱ kayáa náa Babilonia itháan rí 10 tsiguʼ nákha xóó tsiguma gámbáa Jerusalén. Daniel gajmíi̱n ajtsúun bi̱ nambáxu̱u̱ gajmíi̱n, Sadrac, Mesac ga̱jma̱a̱ Abednego, ikhaa má mbi̱ʼi̱i̱ ni̱jkha̱ kiʼdiin mangiin náa Babilonia.

Nákha Ezequiel xtáa xóó náa Babilonia, Jeobá nasngájmuu dí ra̱májánʼ rí xtáa rarígá náa templo dí rígá náa Jerusalén. Jeobá naʼni rígi̱ ga̱jma̱a̱ mbá milagro. Ezequiel xóó xtáa náa Babilonia, mú Jeobá naniñuʼ mbaʼyoo xúgíʼ dí xtáa rarígá náa templo. ¡Ra̱ʼkhá tháán mixkawiʼ wéñuʼ rí xtáa raʼyoo!

Jeobá naʼthúu̱n Ezequiel: ‹Atayáá, phú mixkawiʼ wéñuʼ rí kuwa runi xa̱bu̱ náa templo. Atayáá xúgíʼ pared náa kiʼniwíin abu̱nʼ ga̱jma̱a̱ eʼwíínʼ xujkhúʼ. ¡Ga̱jma̱a̱ atañún xa̱bu̱ israelitas kuwa ruyamajkún!›. Ezequiel nandoo ndaʼyoo rígi̱, ga̱jma̱a̱ naʼnirámáʼ rí xtáa rarígá.

Jeobá naraxu̱u̱ Ezequiel: ‹Lá nandoo natañún xa̱bu̱ ede̱ israelitas rí kuwa runi nguʼwáá ráʼ.› Xúʼko̱, ikhaa nandoo ndaʼyoo rígi̱ ma̱ngaa. Kuwa 70 xa̱bekha̱, ga̱jma̱a̱ xúgínʼ kuwa ruyamajkhún dios bi̱ ragájkhun. Ikhiin nuthi: ‹Jeobá tseʼyulúʼ. Nánguá xtáa náa xuajin›.

Ikhú Jeobá nasngájmuu Ezequiel tikhun gu̱ʼu̱ bi̱ kuwa náa riejun dí naguanúu xígií náa norte ndrígóo templo. Ikhiin trigi̱i̱n ruyamajkuíí dios bi̱ ragájkhun bi̱ nagumbiʼyuu Tamuz. ¡Ga̱jma̱a̱ atañún xa̱bu̱ bi̱ kuwa xóo ejkhua̱ matuʼuluʼ náa templo ndrígóo Jeobá! Kuwa mbá 25. Ezequiel ndaʼñún. ¡Kuwa rusmbatigu̱u̱n xígií náa nagájnuu a̱jkha̱ʼ ga̱jma̱a̱ nduyamajkuíí!

Jeobá eʼthí: ‹Xa̱bu̱ bugi̱ na̱nguá eyamajkhuʼ. ¡Raʼkháa i̱ndó nuni̱ dí ra̱májánʼ rí asndu naguwáʼ náa templo ndrígóʼ ga̱jma̱a̱ ikhí nuni̱!›. Ikha jngó Jeobá nakudaminaʼ: ‹Mbuyáá nguáthá tsiakii gúʼdoo índo̱ nakiʼnún wéñuʼ. Ga̱jma̱a̱ xágawiinʼ a̱jkiu̱nʼ ka̱ñu̱u̱n índo̱ rí ikhiin gámbi̱i̱n›.

I̱ndó ajtsú tsiguʼ nda̱wa̱á rí Jeobá nasngájmuu Ezequiel rígi̱, israelitas tsénimbu̱ún náa rey Nabucodonosor. Ikha jngó nagájnuu gaxnamíjna gajmíi̱n. Nda̱wa̱á rí naʼni mbá tsiguʼ tikhu, xa̱bu̱ babilonios nurkuna xtátsí ndrígóo Jerusalén ga̱jma̱a̱ nutsikha xúgíʼ xuajin. Mbaʼin wéñuʼ xa̱bu̱ nakháñun o nagún náa Babilonia xóo esclavos.

Náa numuu rí Jeobá niniñuʼ ma̱ʼkha̱ rí maguma gámbáa mixkawiʼ wéñuʼ náa xa̱bu̱ israelitas ráʼ. Numuu rí túdxawiin rí niʼthí Jeobá ga̱jma̱a̱ túnimbu̱ún xtángoo ndrígóo. Rígi̱ nasngájma dí ra̱ʼkhá tháán gíʼdoo wéñuʼ numuu muʼni má xúʼko̱ rí naʼthúlúʼ Dios.

Ginii nuniñunʼ rí mbá chímbaʼin xa̱bu̱ maguánu náa ku̱ba̱ʼ ndrígóo xuajin Israel. Rey Nabucodonosor nagíiʼ mbáa judío bi̱ nagumbiʼyuu Gedalías mu mañewu̱u̱n xúgínʼ xa̱bu̱ bugi̱. Mu tikhun israelitas nuxiyáa Gedalías. Rí xúgi̱ xa̱bu̱ namiñun maguwáʼ xa̱bu̱ babilonios ga̱jma̱a̱ rí muradíin xúgínʼ ga̱jma̱a̱ numuu rí nini̱, ga̱jma̱a̱ nini tsiakii rí Jeremías magun gajmiún ma̱ngaa nagáñun nagún náa Egipto.

Rígi̱ naʼni rí ní xaxtáa nimbáa xa̱bu̱ náa ku̱ba̱ ndrígóo Israel. Naʼni mbá 70 tsiguʼ rí nimbáa xa̱bu̱ nánguá xtáa náa xuajin. Nímba̱a̱ xa̱bu̱ nánguá niguanúu náa xuajen. Mu Jeobá nakudaminaʼ rí maʼni rí xa̱bi̱i̱ matangi̱i̱n náa xuajñún rí nikuwa ginii nda̱wa̱á rí ganújngoo mbá 70 tsiguʼ. Mu ndiéjunʼ rí egíʼnuu xuajñu Dios náa ku̱ba̱ʼ ndrígóo Babilonia rá. Guʼyáá.