ITHÁAN maʼni 50,000 xa̱bu̱ bi̱ nagájnun náa Babilonia mu magun mitsinguánʼ wéñuʼ asndu náa Jerusalén. Mú índo̱ naguanu náa Jerusalén nduyáá rí niguámbáa xúgíʼ. Nimbáa nánguá xtáa ikhí. Israelitas gíʼmaa rí muni̱i̱ xúgíʼ mbu̱júu̱.

Timbá rí nuni̱ ginii ñajunʼ mbá altar. Gi̱i̱ ñajunʼ náa ma̱ndoo muxnaxi̱i̱n xujkhúʼ xóo tsigijñaʼ o regalo náa Jeobá. Nguátha igu̱nʼ nda̱wa̱á xa̱bu̱ israelitas nugi̱ʼdi̱i̱ nuni̱ templo. Mú xa̱bu̱ bi̱ guáʼdáá gajmiún sia̱nʼ kuwa náa xuajin mba̱ʼu̱ dí rígá mijngii, nugíiʼ munimiñún mu muniñaʼ ruñajunʼ. Nda̱wa̱á kayuʼ, xa̱bu̱ bi̱ guáʼdáá sia̱nʼ naʼngu̱u̱n nuni̱ rí rey nuxi̱ʼ bi̱ xtáa náa Persia maʼni mbá xtángoo náa maʼthí rí muniñaʼ ruñajunʼ.

Nanújngoo tsiguʼ. Ninújngoo má 17 tsiguʼ asndu nákha̱ xa̱bu̱ israelitas nitangi̱i̱n náa Babilonia. Dios nakunguinʼ gaʼyee ndrígóo Ageo ga̱jma̱a̱ Zacarías mu mutún xa̱bu̱ rí mugi̱ʼdi̱i̱ muñajunʼ mbu̱júu̱. Xa̱bu̱ nunimbu̱ún rí nuthi gaʼyee ga̱jma̱a̱ nakumu̱ún kuyáá Dios rí ikhaa ma gambáñun. Nugi̱ʼdi̱i̱ nuñajunʼ maski ajndu rígá mbá xtángoo náa naʼthí rí na̱nguá.

Ikha jngó mbáa xa̱bu̱ bi̱ kayá edxu̱u̱ náa xuajin Persa bi̱ nagumbiʼyuu Tattenay na̱ʼkha̱ ga̱jma̱a̱ naraxi̱ tsáa niniñúúnʼ muñajunʼ náa templo. Xa̱bu̱ israelitas nutháán rí rey Ciro niʼthún náa Babilonia: ‹Guʼguaaʼ náa Jerusalén ga̱jma̱a̱ guni̱i̱ templo ndrígóo Jeobá Dios ndrígalaʼ›.

Tattenay nakuʼma mbá carta náa Babilonia ga̱jma̱a̱ naraxi̱ á mu gajkhun rí Ciro, bi̱ nikháñu má xúgi̱, niʼthí xúʼko̱ kaʼnii. Nacha̱ ejkha̱nú mbá carta rí niʼni rey nuxi̱ʼ bi̱ xtáa náa Persia. Naʼthí rí xúʼko̱ má niʼthí. Ikha jngó rey naʼnirámáʼ: ‹Guniʼñáanʼ rí israelitas muni̱i̱ templo ndrígóo Dios. Ga̱jma̱a̱ nakuʼmá rí mumbañún›. Índo̱ naʼni a̱jkhu̱ tsiguʼ, wáxe̱ templo, ga̱jma̱a̱ israelitas nadxún wéñuʼ.

Nanújngoo mbaʼa wéñuʼ tsiguʼ. Rí xúgi̱ itháán maʼni 48 tsiguʼ rí templo niguámbá niguma̱a̱. Xa̱bu̱ bi̱ kuwa náa Jerusalén nindxu̱ún xa̱bu̱ gíníín, ga̱jma̱a̱ xuajin ma̱ngaa templo ndrígóo Dios nánguá kujmaa mitsaan wéñuʼ. Índo̱ Esdras xtáa náa Babilonia na̱jkha̱nú ndaʼyoo rí templo ndrígóo Dios ndayóoʼ maguma̱a̱. Ikha jngó, lá natayáá ndiéjunʼ eʼni xáʼ.

Esdras na̱jkha̱ gáʼyoo Artajerjes, rey ndrígóo Persia, ga̱jma̱a̱ rey bugi̱ ra̱ʼkhá tháán májánʼ a̱jkiu̱u̱n rí asndu naxnúu Esdras mbaʼa regalo mu mangueʼga náa Jerusalén. Esdras nanduʼu̱u̱n israelitas bi̱ kuwa náa Babilonia mu mumbayíí mudegun regalo náa Jerusalén, ga̱jma̱a̱ mbá 6,000 nuthi rí magun. Nagún kuduun plata ga̱jma̱a̱ oro ma̱ngaa i̱ʼwáʼ rí mitsaan.

Esdras naxmiéjunʼ, numuu rí kúwi̱i̱n mbaʼin xa̱bekha bi̱ ra̱míjínʼ náa kamba̱a̱. Xa̱bekha bige̱ maʼndún munikuʼwáʼ plata ga̱jma̱a̱ oro ndrígu̱ún ikhiin, ga̱jma̱a̱ rí muradíin. Ikha jngó Esdras nagímbíi̱n xa̱bu̱, xóo má tayáá náa kiʼniriyaʼ. Ikhú nutajkháan náa Jeobá mu mañawu̱u̱n náa matangi̱i̱n mitsinguánʼ wéñuʼ asndu náa Jerusalén.

Jeobá nañawu̱u̱n. Ga̱jma̱a̱ a̱jkhu̱ igu̱nʼ rí nagún kamba̱a̱, naguanu májánʼ asndu náa Jerusalén. Lá tsesngájma rígi̱ rí Jeobá ma̱ndoo mañawu̱u̱n xa̱bu̱ bi̱ nakumu̱ún kuyáá ikhaa ráʼ.