NGUÁTHÁ mbiʼi nda̱wa̱á rí niʼni thanún a̱jmi̱i̱n xa̱bu̱ bi̱ tsikruigu̱u̱n bi̱ kuwa runda̱ʼa̱ mbújkha̱a̱, Jesús na̱ʼkha̱ náa mbá xuajin lájuíin dí rígá mijngii náa xuajin Jerusalén. Naʼthúún nájmi̱i̱n discípulo ndrígóo: ‹Ataʼala náa xuajin lájuíin ga̱jma̱a̱ ikhí guxkamaa mbáa a̱ʼdá burru. Gúrajkuíí ga̱jma̱a̱ aguwaʼ ku̱ya̱a̱ náa ikhúúnʼ›.

Índo̱ naguwaʼ ku̱ya̱a̱ aʼdá burru, ikhú Jesús nagrigu ikhí. Ikhú na̱jkha̱ ga̱jma̱a̱ náa xuajin Jerusalén, dí rígá má mijngii ikhí. Índo̱ na̱jkha̱nú mijngii náa xuajin, naguwaʼ gúriguíi mbaʼin wéñuʼ xa̱bu̱. Mbaʼin xa̱bu̱ nitriga̱ xtíñún náa kamba̱a̱. Eʼwíínʼ nutriga̱ ñawúunʼ ida, ga̱jma̱a̱ nundxaʼwa: ‹¡Dios gáʼni tsajkurámááʼ rey bi̱ na̱ʼkha̱ ga̱jma̱a̱ nambiʼyuu Jeobá!›.

Nákha wajyúúʼ náa xuajin Israel, i̱ndó reyes bi̱ natrigi̱i̱n nuxunʼ natu̱ʼu̱u̱n náa xuajin Jerusalén gajmiún mbáa burru mu musngajmamijná náa xuajin. Rígi̱ nindxu̱u̱ rí naʼni Jesús. Ga̱jma̱a̱ xa̱bu̱ bugi̱ kuwa rusngajma rí nandún rí Jesús manindxu̱u̱ rey ndrígu̱ún. Mú na̱nguá eñún kuyáá xúgínʼ xa̱bu̱. Rígi̱ nandoo nduʼyáá rí xúʼko̱ kaʼnii nirígá índo̱ Jesús na̱jkha̱ náa templo.

Jesús naʼni thanún náa templo xa̱bu̱ bi̱ tsikruigu̱u̱n ga̱jma̱a̱ bi̱ tséʼya xuñúnʼ. Índo̱ e̱ji̱n nduyáá rígi̱, nundxaʼwa mu mbuyamajkuíí Jesús. Mú rígi̱ naʼni rí makiʼníin ndxajkun ga̱jma̱a̱ nuthan Jesús: ‹Lá natadxun rí kuwa ruthi e̱ji̱n ráʼ.›

Jesús naʼthí: ‹Xúʼko̱. Lá na̱nguá niraxnuu kayuʼ náa Biblia náa naʼthí: Dios mariyaʼ náa rawúnʼ e̱ji̱n rí muni mba̱a̱ ráʼ.› Ikha jngó e̱ji̱n nduyamajkuíí má xúʼko̱ rey bi̱ nixnáa Dios.

Lá ragájkhun rí ikháanʼ nandulúʼ manindxu̱lúʼ xóo e̱ji̱n buʼko̱ ráʼ. Mbáa asndu tikhun xa̱bu̱ maʼndún rí muniʼñáaʼ ruʼthá ga̱jma̱a̱ numuu reino ndrígóo Dios. Mú ikháanʼ muʼthún má xúʼko̱ eʼwíínʼ rí wíji̱ maʼni Jesús ga̱jma̱a̱ numún xa̱bu̱ numbaaʼ.

Nákha Jesús xtáa náa tsu̱du̱u̱ Ku̱ba̱ʼ xóó na̱nguá ni̱jkha̱nú mbiʼi rí ikhaa maʼtáñajunʼ. Nguáná gaʼganú mbiʼi rúʼko̱ rá. Discípulos nindúún mbuyáá. Rí xúgi̱ guraxnuu rígi̱.