LÁ RAGÁJKHUN rí nakujmaa dí ra̱ʼkhá tháán kiʼnáa Jesús gi̱i̱ ráʼ. Lá natayáá náa numuu ráʼ. Numuu rí xa̱bekha bi̱ kúwi̱i̱n náa templo ndrígóo Dios náa Jerusalen nanigunʼ rí muguaʼdáá wéñuʼ. Ikhiin kuwa runi rí makhánun wéñuʼ mbújkha̱a̱ náa xa̱bu̱ bi̱ naguwáʼ gi̱i̱ gúyamajkuíí Dios.

Lá natañún xúgínʼ i̱jín xédé buʼko̱, mugu̱ ga̱jma̱a̱ rigu ráʼ. Xa̱bekha kuwa rugujui̱i̱n gi̱i̱ náa phú templo. Lá natayáá ikháánʼ náa numuu ráʼ. Numuu rí israelitas ndañúnʼ xujkhúʼ ga̱jma̱a̱ ñu̱ʼu̱ mu muxnaxi̱i̱n tsigijñaʼ náa Dios.

Xtángoo ndrígóo Dios niʼthí rí índo̱ mbáa israelita naʼni mbá dí ra̱májánʼ, gíʼmaa rí maxnáxi mbá tsigijñaʼ náa Dios. Xúʼko̱ má ma̱ngaa, xa̱bu̱ israelitas gíʼmaa rí muxnaxi̱ tsigijñaʼ. Mu náa gándoo guxkamiin ñu̱ʼu̱ ga̱jma̱a̱ xujkhúʼ mu muxnaxi̱i̱n rá.

Tikhun guaʼdiin ñu̱ʼu̱ ga̱jma̱a̱ xujkhúʼ bi̱ ma̱ndoo muxnaxi̱i̱n. Mú mbaʼin israelitas na̱nguá guaʼdiin xujkhúʼ asndu ñu̱ʼu̱. Ga̱jma̱a̱ eʼwíínʼ kúwi̱i̱n mitsinguánʼ wéñuʼ náa Jerusalén rí asndu na̱nguá xóo maguwáʼ kuya̱a̱ mbáa xujkhúʼ náa templo. Ikha jngó xa̱bu̱ naguwáʼ gi̱i̱ gútsi̱i̱n xujkhúʼ o ñu̱ʼu̱. Mú xa̱bekha bugi̱ nugujui̱i̱n minumún wéñuʼ. Nunikuʼwún xa̱bu̱. Ga̱jma̱a̱, ragíʼmaa mugujua̱ gi̱i̱ náa phú templo ndrígóo Dios.

Rígi̱ niʼni makiʼnáa Jesús. Ikha jngó nartaxi mesa náa jngutamaʼ mbújkha̱a̱ ga̱jma̱a̱ nasngujtíí mbújkha̱a̱ ajua̱nʼ. Naʼni mbá ñuu dí naxpajtu ga̱jma̱a̱ naxkawíin xujkhúʼ náa templo. Naʼthúún rí gíʼmaa muni xa̱bu̱ bi̱ nugujui̱i̱n rigu: ‹¡Guxkawíin! Ní xuni náa goʼwóo Anu̱ʼ náa ma̱ndoo makánaláʼ wéñuʼ mbújkha̱a̱›.

Tikhun discípulos ndrígóo Jesús kuwa gajmíi̱n gi̱i̱ náa templo ndrígóo Jerusalén. Naguanún tsiánguá índo̱ nduyáá rí naʼni Jesús. Ikhú narmáʼáan a̱jkiún rí eʼthí náa Biblia ga̱jma̱a̱ numuu A̱ʼdióo Dios: ‹Mu rí nangajo̱o̱ kaʼyoo goʼwóo Dios ikha jngó nañawu̱u̱n wéñuʼ›.

Nákha xóó xtáa Jesús gi̱i̱ náa Jerusalén náa Pascua, naʼni mbaʼa milagro. Nda̱wa̱á Jesús nagájna̱a̱ náa Judea ga̱jma̱a̱ nagíʼdu̱u̱ natanga̱a̱ náa Galilea. Mú nanújngoo náa mbayuuʼ ndrígóo Samaria. Guʼyáá ndiéjunʼ erígá ikhí.