A̱ngui̱nʼ bi̱ nanduxu kuyala wéñuuʼ:

Ga̱jma̱a̱ numuu dí nandulúʼ kuʼyáá Dios ma̱ngaa numuu dí nandulúʼ kuʼñúún xa̱bu̱ naxkajxáánʼ munimbulú kiʼtáñajunʼ rígi̱: “Gaʼguala ga̱jma̱a̱ gusngún xa̱bu̱ bi̱ kúwá náa xúgíʼ xuajen mu mani̱ndxu̱ún xa̱bi̱ʼ. Guxuʼmíinʼ iyááʼ” (Mat. 28:​19, 20; Mar. 12:​28-31). Índo̱ gajkhun nandulúʼ kuʼñúún xa̱bu̱ gíʼdoo wéñuuʼ tsiakii. Ma̱ndoo muʼgua̱nú asndu náa a̱jkiu̱ún “xúgíinʼ bi̱ nusngajma rí nandún makuwá kámuu mbiʼi” (Hech. 13:48).

Nákha ginii nuʼni mbá tsiakii magida̱ʼ edxu̱lúʼ xúgíʼ presentación ga̱jma̱a̱ muxnún i̱yi̱ʼ xa̱bu̱. Mú rí xúgi̱ ndayóoʼ majmañulúʼ xóo muʼtámíjná gajmiúlú xa̱bu̱. Nusngajmá ngajua índo̱ nuʼtámíjná gajmiúlú dí nanigu̱u̱nʼ ikhiin. Mámbáa xa̱bu̱ mixtiʼkhuii, ikha jngóo gíʼmaa mbuʼyáá xóo guʼtámíjná gajmiúlú xúgíinʼ, gíʼmaa mbuʼyáá ndiéjunʼ nanigu̱u̱ʼ ga̱jma̱a̱ dí naʼni maxmiéjuunʼ xa̱bu̱ bi̱ kuwáánʼ ruʼtámíjná gajmiúlú. ¡Ikha jngóo i̱yi̱ʼ rígi̱ nigumaratháá mu mambáyulúʼ!

Folleto rígi̱ gíʼdoo mbá 12 kíxnuu náa nagájnuriyoʼ mbá 12 cualidad dí xúgiáánʼ ndaʼyulúʼ mu musngajma ngajua ga̱jma̱a̱ mumbaʼñúún xa̱bu̱ muriʼkhumijná. Náa mámbá kíxnuu na̱ʼkha̱ mbá dí nigájnuu náa Biblia náa na̱ʼkha̱ ga̱jma̱a̱ numuu Jesús o imba̱a̱ cristiano bi̱ nixtáa nákha siglo timbá bi̱ nigiʼdoo mbá cualidad kiejunʼ náa niʼtáráʼa. Rí xúgi̱ na̱nguá eyúlúʼ dí magida̱ʼ edxu̱lúʼ presentación dí muʼthá, dí itháan nandulúʼ nindxu̱u̱ dí mbuʼyáá xóo gúʼni mu musngajmún xa̱bu̱ dí gajkhun nandulúʼ kuʼñúún. Gajkhun má dí xúgíʼ cualidad dí ma̱ʼkha̱ raʼthí náa folleto ndayúlú maguaʼdáá índo̱ na̱jkua̱ guʼtáraʼa, mú ma̱ta̱ya̱a̱ dí tikhu dí ikhaa gíʼdoo wéñuuʼ numuu maguaʼdáá índo̱ nugíʼdi̱i̱ nuʼtámíjná gajmiúlú xa̱bu̱, índo̱ natanga̱án guʼñún ga̱jma̱a̱ índo̱ nuxná estudio.

Índo̱ gatanigájmaa mámbá kíxnuu, atatsaʼwáminaʼ xú káʼnii gándoo gataʼgíʼ maraʼdáá mámbá cualidad mu marataruʼúún xa̱bu̱ náa xtaa. Dí nandulúʼ kuʼyáá Jeobá ga̱jma̱a̱ dí nandulúʼ kuʼñúún xa̱bu̱, gíʼdoo itháan numuu ki xóo dí índo̱ najuiʼthúlú mbájmbu xóo gíʼmaa muʼtáraʼa. Ikha jngóo ataniminaʼ xóo eʼngo̱o̱ dí maʼndaaʼ xtayáá itháan Jeobá ga̱jma̱a̱ dí maʼndaaʼ xtañún itháan xa̱bu̱. Rúʼko̱ gambáyáaʼ matambáñún xa̱bu̱ munimi̱jna̱.

Ra̱ʼkhá tháán nadxuu a̱jkiu̱xu̱ dí kuwáánʼ mbá kambáxulúʼ ruñajunʼ ga̱jma̱á nindxa̱laʼ (Sof. 3:9). ¡Jeobá gáʼni tsajkurámuuʼ tsiakii dí nuni̱ náa nusngajma ngajua mu mumbáñuun xa̱bu̱ munimi̱jna̱!