Xó má nijmañaʼ náa folleto rígi̱, náa Biblia na̱ʼkha̱ mbaʼa ikha rí tsixtiʼkhuu rí mambáyaʼ ikháánʼ gajmiáanʼ bi̱ kúwi̱i̱n náa guʼwáaʼ. Jeobá nandoo dí makuwáanʼ tsímáá. Ma̱ngaa naʼthí rí á mu nduyamajkuíí ginii, ‹xúgíʼ rí i̱ʼwáʼ makhánala› (Mateo 6:33). Dios nandoo rí mambaxáʼ májánʼ ga̱jma̱ʼ. Ikha jngó atani xúgíʼ rí eyoo mu mambaxáʼ itháan ga̱jma̱ʼ ikhaa, numuu dí rígi̱ itháan gíʼdoo numuu (Mateo 22:37, 38).

RÍ E̱ʼKHA̱ RAʼTHÍ NÁA BIBLIA: “Ga manindxuʼ mbaun-u Icun Anaʼla, ga icanʼla [manindxala i̱ji̱nʼ jiáma kami i̱ji̱nʼ] huaʼxaʼ”, eʼthí Jeobá (2 Corintios 6:18). Dios nandoo rí matambaxáʼ májánʼ ga̱jma̱ʼ, mbóo rí ma̱ndoo matani mu mi̱dxu̱ʼ kanuu náa ikhaa nindxu̱u̱ rí maratakáñii. Jeobá má naʼthúlúʼ: “Camba nutun uni sacun” (1 Tesalonicenses 5:17). Ikhaa naniguʼ maratha̱a̱n rí naʼni maxmiéjuanʼ ga̱jma̱a̱ xúgíʼ rí gíwanʼ asndu náa a̱jkia̱nʼ (Filipenses 4:6). Á mu naratájkháan gajmiáanʼ bi̱ kúwi̱i̱n náa guʼwáaʼ, ikhiin mbuyáá rí ikháánʼ natayáá rí gajkhun xtáa Dios.

Mú raʼkháa i̱ndó ndayóoʼ maratha̱a̱n Dios ma̱ngaa ndayóoʼ rí ikháánʼ matadxawíín rí gáʼtháanʼ. Xú káʼnii gándoo gátani rá. Rí matanigajmaa̱ Ajngá rawunʼ ga̱jma̱a̱ i̱ʼwáʼ i̱yi̱i̱ʼ rí nagájnuu náa Biblia (Salmo 1:1, 2). Atatsaʼwáá edxa̱ʼ rí xtaa rajmañaʼ (Salmo 77:11, 12). Mu matadxawíín Dios ma̱ngaa ndayóoʼ rí mi̱dxu̱ʼ náa nagimbáanʼlu (Salmo 122:1-4).

Imbo̱o̱ rí mambáyaʼ mambaxáʼ májánʼ ga̱jma̱ʼ Jeobá nindxu̱u̱ rí marathu̱u̱n eʼwíínʼ xa̱bu̱ ga̱jma̱a̱ numuu ikhaa. Á mu narathúún má xúʼko̱ xa̱bu̱, maku̱ma̱ʼ rí itháan mijngii xtaa ga̱jma̱ʼ Jeobá (Mateo 28:19, 20).

RÍ MA̱NDOO MATANI:

• Atríyaʼ mbiʼi maratajkháan ga̱jma̱a̱ matraxnuu Biblia xúgíʼ mbiʼi

• Atambáñun bi̱ kúwi̱i̱n náa guʼwáaʼ mbuyáá rí itháan gíʼdoo numuu muni dí nandoo Dios ki xóo muni rí nandún ikhiin

RÍ E̱ʼKHA̱ RAʼTHÍ NÁA BIBLIA: “Ahuaʼcani naʼ inu Dios [...] ga Ica maxta mijŋgui naʼ icanʼla” (Santiago 4:8). Atríyaʼ mbóo mbiʼi ga̱jma̱a̱ náa hora gúnigajmaa mbá guʼwáanʼ (Génesis 18:19). Mú raʼkháa i̱ndó ikhaa: Tsejtsí gaku̱ma̱ʼ xtayáá Dios ga̱jma̱a̱ atani rí bi̱ kuwa náa guʼwáaʼ mambaxúún itháan májánʼ gajmiún ikhaa, arathún índo̱ “gáraʼwún náa guʼwáaʼ ga̱jma̱a̱ índo̱ gajngruigaʼ náa kamba̱a̱ ga̱jma̱a̱ índo̱ gátaba̱ʼ ga̱jma̱a̱ índo̱ gáraxunʼ” (Deuteronomio 6:6, 7). Atagíʼ matani xóo niʼni Josué, bi̱ niʼthí: “Ikhúúnʼ gajmíi̱nʼ bi̱ kúwi̱i̱n náa goʼwóoʼ, munixu ñajunʼ Jeobá” (Josué 24:15).

RÍ MA̱NDOO MATANI:

• Atríyaʼ mbá awan májánʼ náa miʼsngáa rí ndayóoʼ mámbáa bi̱ xtáa náa guʼwáaʼ