Maski ajndu natagíiʼ matani xó má eʼngo̱o̱ mu maraxtaa gagi ga̱jma̱ʼ bi̱ ndiyáa ga̱jma̱a̱ xúgínʼ bi̱ kuwa náa guʼwáaʼ, nguáná marigá mbá rí tsiraʼthi̱i̱n rí maʼni maraxtaa gíná (Eclesiastés 9:11). Mu Dios naxnúlú rí mambáyulu índo̱ nuraʼníí dí mingíjyúuʼ. Á mu natanimbánii ikha dí tsixtiʼkhuu dí na̱ʼkha̱ náa Biblia, ikháánʼ gajmiáanʼ bi̱ kuwa náa guʼwáaʼ maʼngala muraʼníí rí naʼni maxmiéjuanlaʼ wéñuʼ.

RÍ E̱ʼKHA̱ RAʼTHÍ NÁA BIBLIA: “Utan Dios mambayuʼla, muri Ica ndayahuanʼle icanla” (1 Pedro 5:7). Garmáʼáan a̱jkia̱nʼ má xúʼko̱ dí Dios na̱nguá gíʼdoo aʼkhúun ga̱jma̱a̱ numuu xkujndu dí xtaʼdáá (Santiago 1:13). Á mu nataxúʼmaminaʼ náa ikhaa, ra̱ʼkhá tháán májánʼ gambáyaʼ (Isaías 41:10). “Náa inuu ikhaa guxnaxí a̱jkia̱la.” (Salmo 62:8.)

Imbo̱o̱ dí ma̱ndoo maxnáʼ tsiakii nindxu̱u̱ dí matraxnuu ga̱jma̱a̱ matanigajmaa xúgíʼ mbiʼi Biblia. Á mu xúʼko̱ tani ma̱ta̱ya̱a̱ rí gajkhun Jeobá “naʼnile aʼcunʼlu riʼdo cuhua icanʼlu naguinaʼlu” (2 Corintios 1:3, 4; Romanos 15:4). Ikhaa nakudaminaʼ maxnáʼ “hui [o tsímáá] ri naʼca naʼ” ikhaa (Filipenses 4:6, 7, 13).

RÍ MA̱NDOO MATANI:

• Atanda̱ʼa̱a̱ Jeobá rí mambáyaʼ mu xaxmiéjuanʼ wéñuʼ ga̱jma̱a̱ rí matatsa̱ʼwa̱a̱ májánʼ edxa̱ʼ

• Atayáá ga̱jma̱a̱ atraʼwíí dí phú itháan májánʼ matani

RÍ E̱ʼKHA̱ RAʼTHÍ NÁA BIBLIA: “Xa̱bu̱ bi̱ nakro̱ʼo̱o̱ gíʼdoo ku̱ma̱ ga̱jma̱a̱ nakro̱ʼo̱o̱ a̱jkiu̱u̱n, mangiin bi̱ nudxawíín májánʼ nduyáaʼ majmañún” (Proverbios 18:15). Ndiéjunʼ eyóoʼ mámbáa bi̱ xtáa náa guʼwáaʼ rá. Atayáá xúgíʼ dí rígá. Aratámíjná gajmiáanʼ ga̱jma̱a̱ atadxun rí gútha̱nʼ (Proverbios 20:5).

Ndiéjunʼ gátani á mu nakháñuu mbáa bi̱ nandaʼ xtayáá rá. Xáti̱ya̱ʼ marata̱ káʼnii ku̱ma̱ʼ. Garmáʼáan a̱jkia̱nʼ rí asndu Jesús “nimbiya” (Juan 11:35; Eclesiastés 3:4). Rí mbi̱ya̱a̱ xa̱ʼ ga̱jma̱a̱ rí minuʼ májánʼ gíʼdoo wéñuʼ numuu ma̱ngaa (Eclesiastés 4:6). Xúʼko̱ xáʼniaʼ mingíjyúuʼ wéñuʼ matraʼníí gamiéjunʼ rígi̱.

RÍ MA̱NDOO MATANI:

• Ataniguʼwanminaʼ maratamíjná gajmiáanʼ bi̱ kuwa náa guʼwáaʼ nákha xóó tséʼkha̱ nimbá gamiéjunʼ. Mu xúʼko̱ índo̱ garigá gamiéjunʼ maʼndún mutamijná ga̱jma̱á ni̱ndxa̱ʼ

• Aratamíjná gajmiáanʼ xa̱bu̱ bi̱ niguáʼdáá má ga̱jmá rígi̱

RÍ E̱ʼKHA̱ RAʼTHÍ NÁA BIBLIA: “Mbáa bi̱ gajkhun nambáxa̱ʼ ga̱jma̱ʼ ma̱ndoo kaʼyaʼ xúgíʼ mbiʼi, ga̱jma̱a̱ nindxu̱u̱ xóo mbáa ndxájuaʼ bi̱ nigumaa mu mambáyaʼ índo̱ narígá gamiéjunʼ” (Proverbios 17:17). Bi̱ natambáxa̱ʼ gajmiáanʼ nandún mumbayáaʼ, mú mbáa tséyáá xú káʼnii gúni̱. Arathún ndiéjunʼ gándoo gúni̱ mu mumbayáaʼ (Proverbios 12:25). Ma̱ngaa atayáaʼ mumbayáaʼ bi̱ nuniʼnuʼ Biblia. Ga̱jma̱a̱ ikha rí gúxnaʼ ikhiin ma̱ndoo mambáyáaʼ (Santiago 5:14).

Á mu nataniguʼwanminaʼ mambaxáʼ gajmiáanʼ xa̱bu̱ bi̱ gajkhun guáʼdáá fe náa Dios ga̱jma̱a̱ nduyáá rí gajkhun Dios maʼnimbánuu rí nikudaminaʼ maʼni, ikhiin ma̱ndoo mumbayáʼ. Ma̱ngaa mambáyaʼ wéñuʼ á mu natambáñún bi̱ kuwa gamiéjunʼ. Arathún ga̱jma̱a̱ numuu fe rí xtaʼdáá náa Jeobá ga̱jma̱a̱ rí naʼthí maʼni nda̱wa̱á. Atambáñun má xúʼko̱ eʼwíínʼ ga̱jma̱a̱ araxtaa mijngii náa xa̱bu̱ bi̱ nandún kuyaʼ ga̱jma̱a̱ naxmiéjunʼ kuyaʼ (Proverbios 18:1; 1 Corintios 15:58).

RÍ MA̱NDOO MATANI:

• Aratámíjna ga̱jma̱ʼ mbáa bi̱ nambáxa̱ʼ májánʼ ga̱jma̱ʼ ma̱ngaa atatsíñáminaʼ rí ikhaa mambáyaʼ

• Arathá mbájmbáʼ káʼnii eyáaʼ ga̱jma̱a̱ ndiéjunʼ phú eyáaʼ