Índo̱ a̱jmi̱i̱n xa̱bu̱ nudamijná, naguáʼdáá mbaʼa enii xkujndu numuu rí mixtiʼkhu endxa̱ʼwa̱a̱ edxu̱ún ga̱jma̱a̱ mixtiʼkhu rí eku̱mún o i̱mba̱ núthu xú ndi̱ji̱i̱n. Mbáa eʼwíínʼ xa̱bu̱ muniaʼ maraʼdáá xkujndu o ma̱ʼkha̱nú xkujndu dí tsiguáʼthi̱i̱n marigá.

Ra̱mingíjyúuʼ gáʼniaʼ dí matatsiʼñáʼ maʼni xúʼkhiín xkujndu, mú náa Biblia naʼthúlúʼ dí gíʼmaa muʼni mbánii (Mateo 5:23, 24). Á mu natani xóo eʼthí ikha dí tsixtiʼkhuu dí na̱ʼkha̱ náa Biblia itháan májánʼ gátani mbánii xkujndu.

RÍ E̱ʼKHA̱ RAʼTHÍ NÁA BIBLIA: “Rígá mbóo [...] mbiʼi dí marata̱” (Eclesiastés 3:1, 7). Atríyaʼ mbiʼi mu mutamíjná numuu xkujndu; aratháán mbájmbaʼ bi̱ ndiyáa xóo ku̱ma̱ʼ ga̱jma̱a̱ ndiéjunʼ tatsaʼwáá edxa̱ʼ numuu xkujndu rúʼko̱ (Efesios 4:25). Maski ajndu nakiʼnán, atani tsiakii dí xágiʼdaʼ ga̱jma̱ʼ. Á mu wabaʼ eriʼña̱a̱ mbáa xa̱bu̱ maʼngo̱o̱ maʼni dí xagiʼdu̱u̱n ga̱jma̱a̱ mbóo rí asndu nda̱a̱ numuu (Proverbios 15:4; 26:20).

Á mu na̱nguá embanii dí ratá ikháánʼ ga̱jma̱a̱ rí naʼthí bi̱ ndiyáa, ganindxaʼ mbáa xa̱bu̱ májánʼ; atasngájmáá má xúʼko̱ dí nandaʼ xtayáá ga̱jma̱a̱ dí natayamajkuíí (Colosenses 4:6). Atagíʼ matanimbánii nacha̱ xkujndu, ga̱jma̱a̱ xúniʼñáʼ rutamíjná (Efesios 4:26).

RÍ MA̱NDOO MATANI:

• Atayáá májánʼ nguáná gándoo mutamíjná numuu xkujndu

• Índo̱ xtáa raʼthí bi̱ ndiyáa, atatsíñaʼ maʼthí. Nda̱wa̱á marata̱ ikháánʼ

RÍ E̱ʼKHA̱ RAʼTHÍ NÁA BIBLIA: “Guiʼmaʼla maŋgajuaʼla cuyamijna xuri mba su ñajunʼ dxajuʼla mba yaʼdanʼla jmiʼle, uyamajcumijna hueñuʼla naʼ mamba su icanʼla” (Romanos 12:10). Gíʼdoo wéñuʼ numuu rí mataʼgíiʼ matadxun ga̱jma̱a̱ dí matagíiʼ makruaʼaʼ rí endxa̱ʼóo edxu̱u̱ xa̱bu̱ bi̱ ndiyáa, “cami aŋahuinʼ aʼcunʼla cuyamijna” ga̱jma̱a̱ “xuni mbaʼjumijna” (1 Pedro 3:8; Santiago 1:19). Xátani rí xóo xtaa ratadxawíín. Ma̱ngaa nguáná mbaʼyóoʼ rí matatsiʼñáaʼ rí xtaa ratani̱ mu matadxun rí gáʼtháanʼ bi̱ ndiyáa, o atraxi̱i̱ á mu ma̱ndoo mutamíjná nda̱wa̱á. Á mu natayáá bi̱ ndiyáa xóo mbáa bi̱ mambáyaʼ raʼkháa mbáa bi̱ magiʼdaʼ ga̱jma̱ʼ, rígi̱ maʼni dí xáʼniaʼ makiʼnán nacha̱ (Eclesiastés 7:9).

RÍ MA̱NDOO MATANI:

• Atadxun dí naʼtháanʼ bi̱ ndiyáa, maski ajndu ikháánʼ tsínigua̱ʼ

• Atani makruaʼa dí phú eyoo maʼtháanʼ. Atayáá xóo eʼni inuu ga̱jma̱a̱ xóo eʼthí índo̱ naʼtháanʼ

RÍ E̱ʼKHA̱ RAʼTHÍ NÁA BIBLIA: “Náa xúgíʼ ñajunʼ rí gakhi̱i̱ na̱jkha̱nú narígá rí májánʼ, mú á mu dí i̱ndó naratá nda̱a̱ rí gakhánaʼ” (Proverbios 14:23). Raʼkháa mbóó ndayóoʼ muxkamaa xú káʼnii gunimbánii xkujndu. Ndayóoʼ muni tsiakimijna mu munimbanilá. Mbáa mbaʼyóoʼ wéñuʼ tsiakii, mú mambáyala wéñuʼ rígi̱ (Proverbios 10:4). Á mu numbayumijna nájmáanʼ ‹mba̱a̱ rí gakhánala› (Eclesiastés 4:9).

RÍ MA̱NDOO MATANI:

• Atatsaʼwáminaʼ ndiéjunʼ gándoo gáʼni mbámbáa mu munimbánii xkujndu

• Nguáthá mbiʼi nda̱wa̱á ma̱ndoo ma̱ta̱ya̱a̱ á mu najkua rakuwáanʼ itháan májánʼ