Jeobá naʼthúlú manindxu̱lú xa̱bu̱ jmbii (Salmo 18:25). Ruʼko̱ gíʼdoo wéñuʼ numuu náa xa̱bu̱ bi̱ ninigu̱nʼ mu maʼndún kuyamijná itháan, ndayóoʼ rí xuni nduwamijná.

Mbiʼi xúgi̱, nuni nduwamijná wéñuʼ bi̱ ninigu̱nʼ. Mu rígá a̱jma̱ rí ma̱ndoo matani mu xátagíʼniin xúʼko̱ kaʼnii.

RÍ E̱ʼKHA̱ RAʼTHÍ NÁA BIBLIA: ‹Gu̱ya̱a̱ ndiéjunʼ dí itháan gíʼdoo numuu› (Filipenses 1:10). Rí nitanújunʼ o nitatsigúnʼ nindxu̱u̱ mbóo rí ra̱ʼkhá tháán gíʼdoo numuu náa ikháanʼ, ikha jngó gíʼmaa matani xúgíʼ rí eyóoʼ.

Jeobá nandoo rí maʼnda̱ʼ xtayáá i̱ndó xa̱bu̱ bi̱ ndiyáa ga̱jma̱a̱ rí nájmáanʼ gákuwáanʼ gagi (Eclesiastés 9:9). Ikhaa nasngájma májánʼ dí gíʼmaa matiewa̱a̱n ga̱jma̱a̱ mataʼgíiʼ ma̱ta̱ya̱a̱ ndiéjunʼ gándoo matani mu ikhaa maxtáa gagi (1 Corintios 10:24). Atasngájmáá bi̱ ndiyáa rí nangajua̱ʼ xtayáá ga̱jma̱a̱ rí ndayáaʼ maraxtaa ga̱jma̱ʼ.

RÍ MANDOO MATANI:

• Atríyaʼ awan mu maraxtaa ga̱jma̱ʼ bi̱ ndiyáa ga̱jma̱a̱ atayáá ndiéjunʼ eyóoʼ

• Atatsaʼwáminaʼ ga̱jma̱a̱ numala nájmáanʼ

RÍ E̱ʼKHA̱ RAʼTHÍ NÁA BIBLIA: “Indo Icun natanʼla xuguiʼ, miri mba xabu aminduʼ mba aʼgu muri naniguʼ-ye ri majma, mba-ma neʼni aʼcan naʼ aun aʼtiun jma” (Mateo 5:28). Á mu dí mbáa nandxa̱ʼwáminaʼ má xúʼko̱ rí mabóoʼ ga̱jma̱a̱ imba̱a̱, nandoo gáʼthi rí xtáa raʼni nduwaʼ xa̱bu̱ bi̱ ndiyáa.

Jeobá naʼthí dí ndayóoʼ muñewa̱a̱n a̱jkiu̱lúʼ (Proverbios 4:23; Jeremías 17:9). Mu ma̱ndoo matani rígi̱ ndayóoʼ matie̱wa̱a̱n rí tayáá (Mateo 5:29, 30). Atayaridáá rí niʼni Job, ikhaa niʼni mbánuminaʼ dí xaʼyoo imba̱a̱ a̱ʼgu̱ dí asndu ma̱ndoo mabóoʼ ga̱jma̱a̱ (Job 31:1). Xáta̱ya̱a̱ nditháan náa nakujmaa rí nubúnʼ xa̱bu̱ o rí maxkaxi̱i̱n mu maʼnda̱ʼ mataba̱ʼ ga̱jma̱ʼ mbáa xa̱bu̱. Ga̱jma̱a̱ nimbá miʼtsú xáku̱ma̱ʼ maʼndaʼ xtayáá mbáa xa̱bu̱ bi̱ raʼkháa ikhaa ndiyáa.

RÍ MANDOO MATANI:

• Atasngájma dí ra̱ʼkhá tháán eyaaʼ xtayáá bi̱ ndiyáa

• Atiamajkuíí xóo endxa̱ʼóo edxu̱u̱ bi̱ ndiyáa, á mu raʼkhí eʼniuu rí ikháánʼ nambáxaʼ ga̱jma̱ʼ imba̱a̱ ní xambáxaʼ itháan ga̱jma̱ʼ xa̱bu̱ buʼko̱