Ikháanʼla ‹gíʼmaa mani̱ndxa̱la bi̱ naʼsngáa› (Heb. 5:12). ¡Atatsaʼwáminaʼ! Jeobá nindxu̱u̱ bi̱ naʼsngáa itháan májánʼ bi̱ xtáa xúgíʼ numbaaʼ. Naʼthúlúʼ muʼsngúún eʼwíínʼ rí najmañulúʼ ga̱jma̱á numuu ikhaa. Muʼsngáa rí gajkhun numuu Jeobá —náa mbá guʼwíin, náa nagimbáanʼ o náa nutaráʼa— phú májánʼ nindxu̱u̱ ñajunʼ rí gajkuáa ñawúnlú. Mú xú káʼnii gándoo manindxu̱lúʼ mbáa bi̱ naʼsngáa májánʼ rá.

Rí naxtiʼña̱a̱ nuxkamaa náa ajngáa rí niʼthí apóstol Pablo rí niʼnirámáʼ maʼga̱ náa inuu Timoteo: “Atraxnuu má xúʼko̱ náa kuwa mbaʼin xa̱bu̱, araxnún tsiakii, arasngúún”. Ga̱jma̱a̱ nda̱wa̱á niʼthí xóó: “Á mu xúʼko̱ tani makríñanʼ ikháánʼ ga̱jma̱a̱ bi̱ gúdxawanʼ” (1 Tim. 4:13, 16). Ajngáa rí na̱jkua̱ kúʼyúlúʼ naʼni káwíin xa̱bu̱. Ikhaa jngó gíʼdoo wéñuʼ numuu rí muʼnimíjna̱ manindxu̱lúʼ mbáa bi̱ najmañuu naguxnuu ga̱jma̱a̱ bi̱ naʼsngáa májánʼ. Folleto rígi̱ mambáyaʼ mu majmáán matani rígi̱. Guʼyáá tikhu xú káʼnii ejmaa folleto rígi̱:

Jeobá nindxu̱u̱ bi̱ “Naʼsngáaʼ itháan májánʼ” (Is. 30:20). Ga̱jma̱a̱ folleto rígi̱, ikháánʼ ma̱ndoo majmañaaʼ matraxnuu ga̱jma̱a̱ marasngáa itháan májánʼ, mú xámbumaʼ rí ajngáa rí nuʼthá na̱ʼkha̱ náa Jeobá ga̱jma̱a̱ ikhaa nindxu̱u̱ bi̱ na̱ʼkha̱ kaguii̱n xa̱bu̱ (Juan 6:44). Ikha jngó tsejtsi mbiʼi gátanda̱ʼa̱a̱ rí maxnáʼ xi̱ʼ kaʼwu ndrígóo. Gajmaaʼ má xúʼko̱ Ajngá rawunʼ Dios índo̱ gáʼyóoʼ. Atani mbuyáá rí nindxu̱u̱ Ajngóo Jeobá raʼkháa ajngáʼ ikháánʼ. Atani asndu xó má eʼngo̱o̱ mu bi̱ kuwa rudxawanʼ maguánu maʼndún kuyáá itháan Jeobá.

Dios niʼtháanʼ maratha ajngóo rí itháan gíʼdoo numuu rí asndu nditháan na̱nguá nijuiʼthá náa xa̱bu̱ numbaaʼ. Nduyaxu gajkhun rí á mu ikháánʼ naku̱ma̱ʼ xtayáá ‹tsiakii rí na̱ʼkha̱ náa Dios›, maʼngaaʼ matanimbánii (1 Ped. 4:11).

A̱ngia̱nʼ bi̱ kuwa rusngáa náa ñajunʼ rígi̱,

Cuerpo Gobernante ndrígu̱ún bi̱ Nutaraʼa numuu Jeobá